Hibru 3 - U Bulunagana U Niga

E Iesu e pan nena e Mosis

¹ A matsi hahatoulana, e Sunahan e ngö sil railimiou tego katuun uaiam limiou i tanen. Na limiou go hakats naiam e Iesu. E Sunahan e hala sile mei e Iesu tegomi aposol uen turu lotu i tarara na tegomi tsunono pan meraien u pris turu lotu i tarara.

² E Iesu e kukute hanigei e Sunahan te hopö kap naien tara toukui teka, te markato haniga has menai e Mosis a toukui i tanen i gusuna u katuun tere Sunahan.

³ A katuun te habuti a hun haposa a solonen e pan bala nena u katuun i tanen. Na e markato has uana iesana, e Iesu e ka mena a solo te pan bala nena a solo tere Mosis.

⁴ A mamana hun haposa e ka mena a katuun te habuteien, kaba e Sunahan te habuti a mamanaka hoboto.

⁵ E Mosis, a katunun kui tere Sunahan, e katoe a toukui a niga i gusuna u katuun hoboto tere Sunahan, bate hatei nena a manka tega rangein e Sunahan i murimuri.

⁶ Kaba e Kristo, a Pien Tson tere Sunahan, e tara kap haniga rena u katuun tere Sunahan. Na tegi hamana haniga uu ra i tanen bate hamana silera a manka man niga i tanen, ara u katuun hamana i tanen.

U katuun tere Sunahan e tatei husar

^7-8 U Namnamei u Göagono e poeiena: “Te hengoe mia limiou u raranga tere Sunahan i romana, ba limiou tema tatei mar hipus len uami ti mar hipus uu tubumilimiou bate tori tsuga nariou lia batena torohane ria lia tara makum a palaka.

⁹ Aa, u tubumilimiou i tarei a man toukui pan i tar turu tohats u maloto u hiningal, kaba nori i torohana noa haseiou lia.

¹⁰ Ba nori u katuun teka e kato haraharaha korue riou lia, ba lia e poeiegu, ‘Nori e roron tori hasoalar. Ba nori tema kukutieri a maroro i tar.’

¹¹ Na lia u raharaha koru me ranga hamana gia iasa me poeiegu, ‘Nori ema antunan la koru uari tara hanin husa i tar.’ ”

¹² A matsi hahatoulana, haneiam. Möa tu ka meiam u tori u omi te hahamanana bate laba namiou e Sunahan te töatöa nitöana.

¹³ Alimiou go hihitaguhi iam turu mamana u lan antunana te ka noa uana a pöata. Taraha, a markato a omi ena mots gamo ranou limiou bate kato hahihipus ranou limiou.

¹⁴ Tegi hamana hatagala nitöa uu ra tere Sunahan ti mar hamana mam uu ra, ara e ka uara tere Kristo.

¹⁵ Na lia e hatei hahuol ragi limiou a ka te ranga nena u Buku u Göagono: “I romana, te hengoe moua limiou u raranga tere Sunahan, alimiou ema tatei mar hipus len uamoi timar hipus uu tubumilimiou bate tori tsuga nariou lia.”

¹⁶ Eresi nori u katuun ti hengo u raranga tere Sunahan bate tori tsuga naren? U katuun te peigi rema e Mosis tara han i Itsip.

¹⁷ Na eresi u katuun ti raharahi e Sunahan turu tohats u maloto u hiningal? Nonei e raharaher u katuun ti kato homi bate mater, bate laba rarien tara makum a palaka.

¹⁸ E Sunahan e rangein eresi tara pöata te ranga hamana uaien iasa bate poeiena, “Nori ema antunan la koru uari tara hanin husa i tar”? Nonei e rangein u katuun ti hipus naien.

¹⁹ Na ra e atei sil talera nori ima la mei tara hanin husa i tanen, taraha nori i hahamanein e Sunahan.