Hibru 13 - U Bulunagana U Niga

Aragi kato hasasaali e Sunahan

¹ Ngil raiam a man hahatoulana i tamilimiou te hamana uami limiou tere Kristo.

² Na limiou go ngö has merami u katunura i lehana i luma i tamilimiou. A palair u katuun i markato uu teka turu angelo, kaba nori ima atei sil raien.

³ Ma solopala rami u katuun te ka ria tara karabus. Hakats here rami alimiou e ka gono mera men tara karabus. Hakats sil has raiam u katuun te kato hakamits raier, kato here has rami u katuun e kato hakamits has rariou limiou.

⁴ Alimiou hoboto ego hagöagoneiam a markatona tara hitöl bate hiahamhamana namiou a peisa milimiou. A tson na tahol egima sake lel lanai ta taina ta tahol tsi ta taina ta tson gi soho gono meien. Taraha e Sunahan e hahunei nou a tson na tahol temar kato uaier teka.

⁵ E möa tu ngil korueiam a moni, ba limiou te sasaala memiou a manka te ka memi limiou. Taraha, e Sunahan e pei, “Alia ema antunan laba ragi limiou tsi ema antunan solopala ragi limiou.”

⁶ Ba ra te tatei ongolora bate poeiera, “A Tsunono e taguhe noulia. Alia ema antunan matoutegi ta ka tegi kateia u katuun tuun i tar.”

⁷ Hakats sil raiam u tsunono i tamilimiou, nori ti hatei mam railimiou u raranga tere Sunahan. Hakats kap naiam a manka man niga te butuma tara markato a niga i taren, ba limiou te hamana mia tere Sunahan timar hamana has uaien.

⁸ E Iesu Kristo, nonei puku noahasina i manasa, na i romana na tara mamana pöata. Nonei ema tatei palis nei.

⁹ U hihatuts tema atei sileri te las ba ranoui limiou a maroro tere Sunahan egima kukute ii. A torimilimiou ema antunan lu nanei ta nitagala tara mamana mar lo na tara kannou. A man lo teka ema taguhu ranei u katuun te kukutie ren. E möa. A tori milimiou ega tagala mei a nihitaguhu tere Sunahan.

¹⁰ Ara u kristen e ka mera a makumun haats, nonei a kuruse tere Kristo. U Jiu te lotu ria tara markatona i manasa ema tatei lotu ria tara makumun haats i tarara teka.

¹¹ Tara Lo turu Jiu, pöata te luena a tsunono pan turu pris u rahatsing tara bulmakau a tson na meme bate la mena neien iahana Makum a Göagono Koru tego luba menaien a man markato a man omi, a tuenrei ren e haats hakapa raria tara makumun haats ielesala tara han.

¹² Na e Iesu e mate hasia ielesala tara taun tega hamatskö meraien ra tere Sunahan turu rahatsing peisa i tanen.

¹³ Aragi laban a han te ka rara bate la uara tere Iesu ielesala, bara tena söata haseiera a nimatsingolo timar hamatsingolo has menai u katuun e Iesu.

¹⁴ Taraha, ara ema ka meri ta han i puta teka tega ka nitöa romana. E möa. Ara e hahalosera a han tena la nama romana, teka nitöa nou.

¹⁵ Ba tere Kristo aragi haats nitöa uu tere Sunahan te solosei mena reira e Sunahan te ranga uarara i tanen.

¹⁶ Alimiou goma solopalemi tego kato haniga mera milimiou a palair u katuun bate hiatagtaguhu miou. A markato teka e ngil korue nen na e kato hasasaalena e Sunahan.

¹⁷ Hengo haniga raiam u tsunono i tamilimiou, bate kukute miou u raranga i taren. Taraha, nori e tara kapin toa rariou limiou. Te hengo ramouen limiou, ba nori te sasaala meriou a toukui i taren. Kaba te möa nouen, ba toriren te tiama nou, ba ka teka tema taguhu ranoui limiou.

¹⁸ Singo be ramu moulam tere Sunahan. Taraha, alam e hasagohem a torimulam e gogosona i matana e Sunahan, na lam e ngilin kato hanigantöa nem a mamanaka.

¹⁹ Alia e rangata hatagala silegu tego singo sil mena limiou alia be Sunahan te hala boroboro pouts mena meilia i tamilimiou.

U singo

^20-21 E Sunahan, te hala ranei ra a masalohana, e tatei hala ranei limiou a mamanaka a niga, antunana tego kato mena milimiou u ngil i tanen. Nonei te hatakei poutsi a Tsunono i tarara e Iesu, nonei a katuun te taratara kap rena u katuun i tanen bate here nei a katuun te taratara kap rena u sipsip i tanen. Nonei e hatakei poutseien tara tou mate me haröto nena u rahatsing i tanen te kato hatagalena u rangan hiahanhaniga te kits gono meien e Sunahan na u katuun. Nonei u raranga te ka nitöana. Nonei e tatei taguhu ranou limiou ba limiou te katoemiou a manka te niga balana i matanen, te hamana uamia limiou tere Iesu Kristo. Aragi solosei e Kristo tara mamana pöata i murimuri. U mana.

U kapakapana u ranga

²² A matsi hahatoulana, hengo hanigeiam u raranga te koloto negulia teka batema sökanami, taraha u pas teka u makmakum.

²³ Alia e hatei ragi limiou e toularara e Timoti i halakasa hakapeia tara karabus. Te la hasesei namen romana, ba nonei te la gono menou lia tegona tara merai lia limiou.

²⁴ Hala menami u hanhaniga i tamulam tara pal kapan hoboto i tamilimiou na turu katuun hoboto tere Sunahan. A matsi hatoulana hasiri Itali e hala has rari limiou u hanhaniga i taren.

²⁵ A nihitaguhu tere Sunahan e tatei kagono meranou limiou hobotontöa. U mana. Nonei talasi.