Hibru 12 - U Bulunagana U Niga

E Sunahan e Tamarara

¹ Aragi hakats silir u katuun u parpara te ka hahis rarioura ti harötein u nihamana. Na ragi luban a mamanaka hoboto te kato halolomoto ranoura, tegi piata ura turu resis te hopö kap beraira e Sunahan. Aragi luban a man markato a man omi te pile kap ranoura, bara te kukute hatagalera a maroro te haröto raira e Sunahan.

² Aragi tara las uu tere Iesu. Nonei a mouna u nihamana i tarara na nonei te kato hamanena a manka te hamana sile rara. Nori i nila naien tara kuruse, na nonei ema rama ii. Nonei ema matsingolo rai u katuun tega mate here menaien a katuun a kopkop, taraha nonei e atei sil nonei ena sasaala koru nou. Na i romana nonei e gumna tara pal matou tere Sunahan noahas.

³ Alimiou go hakats haniga naiam e Iesu. Nonei e tagala sil korui e Sunahan, e noahasina ti kato hohomi koru menaien u katuun u omi, ba limiou tema tatei sökana moi bate tor tsuga miou.

⁴ E manana, alimiou e hiatatung gono memiou a markato a omi, kaba alimiou uma hiatatung hatagala koru noami bate antunana tego mate uaiam limiou.

⁵ Alimiou a galapien tere Sunahan u solopala hakapeiam a man raranga a man niga te ranga gono merai limiou e Sunahan? Ba nonei e poeiena, “A pien i tar, möa tu tara papali te hahuna menanei lö a Tsunono. Na pöata te hahune nen lö, möa tu tori tiama.

⁶ Taraha, a Tsunono e hahuna rena u katuun hoboto te ngil koru ranen. Na, nonei e singata has rena u katuun hoboto te ngö raneien a galapien i tanen te kato homi rien.”

⁷ Alimiou go lueiam a kamits tu mar lu mena milimiou u nihahuna turu tamamilimiou. Taraha, pöata te kamits mia limiou, e haröto nena e Sunahan e kato here ranei limiou a galapien i tanen. Na e möa ta pien tegama hahunei e tamanen.

⁸ Na tema lue mia limiou a nihahuna temar lu uaier a palair a galapien tere Sunahan, alimiou ema pien uami i tanen. E möa. Alimiou e here rami a galapien u pikeilatu.

⁹ Ara hoboto e kameiera u tamarara i puta ti hahuna raiou ra, ba ra te hapan raren. Kaba aragi hala puta korui a peisarara tere Tamarara i Kolö bate luera a nitöatöa hamana.

¹⁰ U tamarara i puta i hahuna merai ra a tsitabubun pöata temar niga uaien turu hakhakats i taren. Kaba e Sunahan e hahuna sil ranei ra ega taguhu raiou ra bara temar niga has uara, te markato has uanen.

¹¹ Pöata te hahuna rariara, ara e kamitsira batema ka haniga rei. Kaba i murina u nikamits ara e ka haniga rou ba torirara te sasaala nitöa nou.

U rangan hihatuts

¹² Alimiou go söata seiam a lima milimiou te omina. Bate hatagalemiou a tukuluna mou milimiou tema tagala nei.

¹³ Taguhu raiam a palai bate sila ria tara maroro a matskö, bate tagala miou ba limiou te ka haniga miou.

¹⁴ Alimiou go torohana hatagala sileiam tego ka haniga gono mera milimiou u katuun hoboto. Taraha, a katuun tema göagono nei ema antunan tara nanei a Tsunono.

¹⁵ Tara kap haniga raiam a palai bate moa nou ta töa tega habirits ban a nihitaguhu tere Sunahan. Ta töa ena mots tori homina i gusumilimiou bate hatakeiena ta raharaha bate kato homiena u hakats tara palai.

¹⁶ Alimiou go tara kap hanigaiam, batema tsikolo mi. Na limiou goma sigalemi e Sunahan te markato uu e Iso. Nonei a pien tson a hamua te ka mei a nikapan, kaba nonei e halan a nikapan i tanen tere toulanen a tetenei me hol tune neien a tsi kannou tuun.

¹⁷ Alimiou e atei silemiou, i murina te markato uaien teka ba nonei e ngilin lu pouts nena a nikapan i tanen na mamanaka a niga tere tamanen, kaba nonei ema antuna ii. E Iso e tabe koru sileien, kaba e möa lel ta maroro tega palis pouts menaien a ka te katoeien.

¹⁸ Alimiou uma la uami turu pokus, ti markato uu katunura i Israel ti la uaien turu Pokus i Sinai. Te kamei u pannen u tula u kulupu na u kuhil na pannen a lomolomo.

¹⁹ U katuun i hengo a ka te ling herei a tuhil na u raranga te katoi a katuun banori e matout korur mema ngilin hengo lel nari u ranga teka.

²⁰ Nori i matout korui u raranga tere Sunahan te pei, “Te sebele noua ta katuun tsi ta töa ta ka u pokus, e ti hamate raroui ta hatu.”

²¹ Na e Mosis has e matout koru hasi a manka te tareien me poeiena, “Alia e toltololo koru has megu a nimatout.”

²² Kaba limiou uma la uamei tara han te markato uana teka. E möa. Alimiou u la uamuma turu Pokus i Saion, te ngöeri a han tere Sunahan te töatöana, na te ngö haseri a Jerusalem a Tsimus te kana i Kolö. Alimiou u la uamuma turu angelo u parpara koru te ka hobotor bate sasaala nitöar.

²³ Alimiou u la uamuma turu hagum turu katuun te here hoboto ri a pien a hamua tere Sunahan, a soloren ti koloto raia i Kolö. Alimiou u la uamuma tere Sunahan, nonei te ona rena u katuun hoboto, na u namnamei turu katuun u matskö te kato haniga pouts raien.

²⁴ Alimiou u la uamuma tere Iesu, nonei te kits gono meraira na e Sunahan u rangan haniga u tsimus. Alimiou u la uamuma turu rahatsing i tanen te tatsihasa sil raioura me hala nena a nihitaguhu, te niga bala nena a ka te rangein u rahatsing tere Ebol.

²⁵ Na limiou go haneiam. Alimiou goma raman hengo nami e Sunahan te ranga uanen i tamilimiou. U katuun tima ngilin hengo ii tara pöata te ranga ien i puta, nori ima antunan bus hamous banari a nihahuna i tanen. Na ra ema antunan bus hamous ba narien romana tega ranga uamen i tarara te kanen i Kolö.

²⁶ Pöata te rangaia e Sunahan i manasa, ba u tsiktsiki e tagasina. Kaba i romana nonei e ranga hamana koru lel talana bate poeiena, “Alia e gas töa lele gou u tsiktsiki na u kolö has.”

²⁷ U raranga teka e haröto nena e Sunahan e gasena romana a manka te katoeien bate luba ranen ba manka tema antunan tagas nei te kana romana.

²⁸ Na ragi haniga uu tere Sunahan te ka uaria ra tara nipepeito i tanen tema antunan gas nari. Aragi hatsunoneien na ragi singo uu i tanen, bate hapane ren na aragi matout haseien.

²⁹ Taraha, e Sunahan i tarara e here nei u pan nen u tula te ats koruna.