Hibru 10 - U Bulunagana U Niga

¹ A Lo turu Jiu e haharuei nena a manka man niga tega lama, kaba ema halesala ranera. Nonei ema haröto ranei ra a mouna a manka teka. Na Lo ema antunan kato haniga nitöa ranei ra. Na man haats te hala ner turu mamana u hiningal, ema antunan kato haniga nitöa ranei u katuun te la hasukusukur bate hatsunoner e Sunahan. E möa.

² Sanena u katuun te hatsunoner e Sunahan ti hagalus ba hakapein a man markato a man omi i taren, nori sane ma tatei hakats lel nari a man markato a man omi i taren, na u haats e tatei kapa hasina.

³ Kaba e möa. A markato turu haats e kato rena u katuun bate hakats pouts ner a man markato a man omi i taren turu mamana u hiningal.

⁴ Taraha, u rahatsing tara bulmakau a tson na meme ema antuna koru nei tega luba menaien a man markato a man omi.

⁵ Pöata te katsin lama e Kristo tara han i puta, ba nonei e poeiena tere Sunahan, Alö ema ngil lenemi tegi haats uaien i tamölö. E möa. Alö i hale ii lia u tuenrei, ba lia te tatei katoe gou a mamanaka hoboto tu hopö kap bei lö alia ego katoeien.

⁶ Alö ma sasaala memi te haats mena rien a sipsip na bulmakau a ohots tara makumun haats bate hala mena rien i tamölö. Na lö ma sasaala has memi te haats uaren i tamölö tego luba menai lö a man markato a man omi.

⁷ Na lia e mar ranga uagu teka, O Sunahan, alia i la sile ma tegomi kato menai lia u ngil i tamölö, ti mar koloto has menaien turu bukuna tara Lo.

⁸ E Kristo e mar ranga mam ua lala teka, “Alö ma ngil lenemi tegi haats uaien i tamölö. Na lö ema sasaala memi te haats mena rien a sipsip na bulmakau a ohots tara makumun haats bate hala mena rien i tamölö. Na manka te haats mena rien i tamölö, bate haats siler tego luba menai lö a man markato a man omi, alö ma sasaala has memien.” Nonei e mar ranga uu teka, noahasina te matskö uana a man haats hoboto teka turu raranga tara Lo.

⁹ Be Kristo e pei lelena, “Alia u la silema tegomi kato menai lia u ngil i tamölö.” Be Sunahan e hakapeiena a markato a toutounei turu haats be palise neien a markato tere Kristo, te kato menaien u ngil tere Sunahan.

¹⁰ E Iesu Kristo e halan a peisanen a töa koru a pöata tara mamana pöata. Nonei e kato raira u katuun u matskö tere Sunahan, taraha nonei e katoi a ka te ngili e Sunahan.

¹¹ A man pris hoboto turu Jiu e roron tuolur bate katoeier a toukui i taren turu mamana u lan bate hala hapara ner u töa u mar haats. Kaba u haats teka e möa koru tego antunan luba menaien a man markato a man omi.

¹² Kaba e Kristo e halan u töa koru u haats tara man markato a man omi, ba nonei ena gumna tara pal matou tere Sunahan.

¹³ Nonei e hahalosena a pöata tena hala nenama romana e Sunahan u pakö hoboto i tanen be Kristo tena pitaputa ranouen.

¹⁴ Turu töa puku u haats, nonei e kato haniga nitöar u katuun te kato raien u katuun u matskö tere Sunahan tara markato i taren i puta.

^15-16 Na u Namnamei u Göagono e ranga hamana has uu teka: “Nonei u rarangan hia hanhaniga u tsimus teka te kitse gou lia turu katunura i Israel tara pöata te la nama romana: alia e hakei goua a lo i tar i toriren, na turu hakhakats i taren ba nori te hakats sil nitöa narouen bate kukutie ren.” Nonei temar ranga uu a Tsunono.

¹⁷ Ba nonei e mar ranga lel uana teka, “Alia ema hakats sil lele goi a man markato a man omi i taren.”

¹⁸ Na pöata te luba nanoua e Sunahan a man markato a man omi i tarara, gara ema antunan haats sil lele ri a man markato a man omi i tarara.

Aragi la hasukusuku uu tere Sunahan

¹⁹ Na matsi hahatoulana, ara e tatei tasu ria iahana Makum a Göagono Koru. Taraha, u rahatsing tere Iesu e hatagala ra noura bara tema tatei matouterei a Makum a Göagono.

²⁰ Tara tou mate i tanen nonei e kalati a maroro a tsimus tegi singo uu ra tere Sunahan. Nonei a marorona tara nitöatöa te silanama turu tuenrei i tanen. Na tara pöata te mateia e Iesu, u labalaba te kute kapiin a tamana iahana Luman Lotu Pan e takiis kata. Na ra e antunan tasu tala ria iahana Makum a Göagono Koru te kana e Sunahan.

²¹ Na ra e ka tala mera a pris a tsunono pan te tara kap nena a luman lotu hamana tere Sunahan.

²² Aragi la hasukusuku tala uu tere Sunahan. Na ragi hakats hamanaia i torirara bate hamana hatagalara. Na torirara ega gogoso bate moana ta man markato ta man omi tegi hasagohi ra, na tuenreirara i galuseia turu ramun u gogoso koru.

²³ Aragi pile hakarapotein a ka a niga te hamana sile rara bate hatei rari u katuun, taraha ara e atei silera e Sunahan e kato hamane nou romana u raranga u mana i tanen.

²⁴ Aragi hakats sil hasir a man hahatoulana i tarara, bate taguhu raren tegi hatara menaien u ngilngil i taren bate katoeier a man toukui a man niga.

²⁵ Ara gima hanöan hagum ii, te markato uaier a palair u katuun. E möa. Aragi kato hatagala kap nitöari a man hahatoulana, taraha u Lan Pan tara Tsunono e sukusuku hakapama.

²⁶ Na ti atei sil hakape iara u raranga u mana bara te kato homi noahasira, ge möa lel tala tu haats tega luban a man markato a man omi i tarara.

²⁷ Aragi matout lasi u Kout tere Sunahan na u tula te ats hahiski nitöana tena ats ria romana u katuun te omier e Sunahan.

²⁸ Alimiou e atei silemiou a markato turu Jiu: te hipus naia a töa katuun a Lo tere Mosis ba huol tsi a topisa katuun te hatangana hoboto naren te kato homi uaien, ga nori ema antunan taatagi naroien. E möa. Nori e atung hamatie ren.

²⁹ Kaba a nihahuna te pan bala koruna e hahalosena a katuun te omiena a Pien Tson tere Sunahan. Taraha, nonei e sigalena u rahatsingina turu ranga te kitsi e Sunahan. Nonei u rahatsing te kato mam meien a katuun a matskö tere Sunahan. Na nonei e ranga homi has nena u Namnamei tere Sunahan te taatagi nen.

³⁰ Ara e atei silera e Sunahan e mar ranga uu teka, “Alia tena hipou gou romana. Na lia noahas tena palise gouen romana.” Na nonei e pei hasi, “A Tsunono noahas tena ona ranou u katuun i tanen.”

³¹ A ka a omi koru e butu noua tara katuun tena hahune nou e Sunahan te töatöa nitöana.

³² Alimiou go hakats pouts naiam a pöata i manasa. I murina tu butu tutuun mia limiou turu ualesala tere Sunahan, alimiou u lueiam a kamits na niomi a parpara, kaba limiou uma hapolasa mi. E möa.

³³ Palaina pöata u katuun i ranga hohomi raiou limiou bate kato homi raria limiou i matar u katuun, na palaina pöata nori i markato has uu teka tara man hahikapien i tamilimiou.

³⁴ Alimiou u taatagi sil raiam u katuun ti haka raia tara karabus. Na pöata ti lueia u katuun a manka i tamilimiou, alimiou u sasaala noahas iam, taraha alimiou i atei sileiam e ka mena a manka man niga koru e kana.

³⁵ Alimiou goma hapolase mi u nihamana u tagala i tamilimiou, be Sunahan te hala ranei romana limiou u hamatana u niga.

³⁶ Alimiou go hamana hatagala koruiam bate kukute miou u ngil tere Sunahan ba limiou te lue miou a ka a niga te ranga hamana naien.

³⁷ Taraha, u Buku u Göagono e poeiena: “Ema pina noi ba katuun tego lama tena la nama romana. Nonei ema hamokomoko namei romana.

³⁸ U katuun i tar te kato hamatskör e töatöa sila roua te hamana uaren. Kaba te hakopis pouts noua ta töa i taren, balia te raharahe gouen.”

³⁹ Kaba ra ema antunan hakopis pouts rei batena taiara. E möa. Ara u katuun te hamana uara tere Sunahan, nonei e taguhu koru ranou ra.