Galesia 6 - U Bulunagana U Niga

Alimiou go hihitaguhi iam

¹ A matsi hahatoulana, te atei sile mia limiou ta töa ta katuun i gusumilimiou e kato ta ka ta omi, alimiou te kukute miou na te kame miou u Namnamei tere Sunahan e tatei kato hamatskö poutsemiou a markato tara katuun teka. Kaba alimiou go tami mia i tanen batema poeiemi alimiou e niga bala namen. Na limiou go hahanei has iam taka ena mots kato harus ranou limiou.

² Te ka mena a töa i tamilimiou a nitiama pan, ba limiou te taguhe men. Ba markato teka te haröto nanou alimiou e hengo hanigemiou u raranga tere Kristo.

³ Kaba limiou goma mar hakats uami teka bate poeiemiou, Alia a katuun pan na lia ema tatei hitaguhu gi. E möa. A katuun temar hakats uana teka e gamoena a peisanen bate here nei a katuun papala.

⁴ Man tötöa man katuun hoboto e tatei tara marei peiseier tega niga u a markato i taren tsi tega omi uaien. Na katuun te kato hanigana e tatei sasaala mena a markato a niga i tanen, kaba nonei ema tatei pei nei a markato i tanen e niga bala nena a markato tara tana katuun.

⁵ A man töa man katuun hoboto e tatei söater a nitiama te butu gono mena a markato pouts i taren.

⁶ A katuun te hengoena u hihatuts turu raranga tere Sunahan e tatei hala nena a palaina a manka man niga i tanen tara tson hihatuts i tanen.

⁷ Alimiou goma hengoemi u raranga te poeiena a katuun e tatei gamoena e Sunahan. E möa. E möa ta katuun tega antunan gami e Sunahan. E here nei a katuun te lebe iena a manka tara kui i tanen. Te lebe noen a ka a omi, a ka a omi has te butu nou. Na te lebe noen a ka a niga, ba ka a niga has te butu nou.

⁸ Na e kato has uana iesana, te kukutiena a katuun u ngilngilina i puta, a tou mate lasi te palise nou a markato teka. Kaba te kukutie nen u ngilngil turu Namnamei tere Sunahan, be Sunahan te palise noien a nitöatöa te ka nitöana.

⁹ Nonei tegima karous beira tegi kato menaira a markato a niga. Te katon töa naroara a markato a niga, ba ta töa ta pöata bara te lue rou u hamatana u niga tara toukui i tarara.

¹⁰ Na man pöata te antuna rara bara te tatei taguhu raiera a pala te hamanar, bate taguhu has raiera u katuun hoboto.

U kapakapana u raranga

¹¹ Alimiou go taraiam, a nikoloto pan i tar te koloto peisa mena gule lia a kapakapana u pas teka.

¹² U katuun te tuke mera rilimiou u hapö e ngil tuneier tegi tara marei meraien na tegi ma ha kamits merain te hamana mena rien a tou mate puku tere Kristo te tatei lu pouts mera nei u katuun tere Sunahan.

¹³ U katuun noahas te kukutier a markato te hapö menari a hatöatongo tere Sunahan, nori has ema kukute hamaneri a palaina a man Lo turu Jiu. Nori e ngilin hapö merari limiou tegi hatei meraien u katuun te kukute menami limiou u raranga i taren.

¹⁴ Kaba lia, alia e hatei ragoui u katuun a Tsunono puku i tarara e Iesu Kristo te mateia tara kuruse. A kuruse i tanen e mar mouna uana teka: a markatona i puta ema tagala lel nanei lia, na lia ema kato sil lel hasegi a markatona i puta.

¹⁵ Te hapö menari a hatöatongo tere Sunahan i pikpiköna katuun na tema hapö hasneia a katuun, e here hoboto talenei a manka palapala. A ka puku lasi te panina, te kato hatsimus merai ra e Sunahan.

¹⁶ E Sunahan e tatei taatagi rena u katuun hoboto te hengo hanigeier u raranga teka, bate hala nena a masalohana turu katuun te hamana ria i tanen.

¹⁷ Na lia ema ngil lenegi ta katuun ega hale ii lia ta nitiama. A man gahil tu lueia lia turu katuun ti omie ioulia e haröto nena alia a katunun kui tere Iesu.

¹⁸ A matsi hahatoulana i tar, a nitaatagi tara Tsunono i tarara e Iesu Kristo e tatei kagono meiena u namnamei i tamilimiou hoboto. U mana. Alia e Pol