Galesia 3 - U Bulunagana U Niga

A markato tara Lo na markato turu nihamana

¹ Alimiou u katunura i Galesia alimiou u katuun u tutu. Alam u hatara hakapa rai limiou e Iesu Kristo, te mate uaien tara kuruse tego luba menaien a man markato a man omi.

² Na lia e ngilin rangata ragi limiou a töa ka: u Namnamei tere Sunahan e la uama i tamilimiou tu kukute mena milimiou a Lo turu Jiu, tsi tu hengo mena milimiou u Bulungana u Niga bate hamane men?

³ Alimiou e tutu korumiou! Alimiou u butun kristen sila muma turu Namnamei tere Sunahan. Kaba limiou e katsin hahonoto len memien a nitagala peisa i tamilimiou?

⁴ A nikamits ti lu mameiam limiou turu Bulungana u Niga, alimiou u lu pinopino tune men? Kaba lia ema peigi alimiou i lu pinopino tune men.

⁵ Tara pöata te hala nanoua e Sunahan u Namnamei i tanen i tamilimiou, bate katoena a man mirakol i gusumilimiou, nonei ema kato menoi a ka teka te kukute mena milimiou a Lo turu Jiu. Kaba nonei e kato menoien te hengo menami limiou u Bulungana u Niga bate hamane men.

⁶ U Buku u Göagono e mar ranga uana teka: Temar hamana menai e Abraham e Sunahan, ba nonei e ngö neien a katuun a matskö.

⁷ Ba lö te tara talemen, u katuun te hamanar nori a galapien tere Abraham.

⁸ I manasa koru e Sunahan e atei sil mami u katuun tema Jiu ri, ena hamana roua i tanen na turu Bulungana u Niga. Ba nonei te ngö ranoien u katuun u matskö. Na i manasa koru nonei e hate ii e Abraham u Bulungana u Niga teka. Ba nonei e poeiena, “Alia ena kalala sila ragoua a man hun katuun hoboto i puta i tamölö.” Temar ranga noahas uana u Buku u Göagono.

⁹ E Abraham e hamana uu tere Sunahan, be Sunahan e kalala gono mera neien u katuun hoboto timar hamana has uu i tanen.

¹⁰ U katuun te hasola ria tara Lo turu Jiu bate poeier nonei lasi a maroro tena butu sila roien tere Sunahan, nori u katuun te korupakö raiena e Sunahan. Taraha, u rarangana turu Buku u Göagono e poeiena, “U rangan korupakö tere Sunahan e hake ria tara katuun tema kukute hanige nei a man raranga hoboto ti koloto naia turu bukuna tara Lo.”

¹¹ Na katuun ema antunan matskö neia i matana e Sunahan te kukute tuun mena neien a man Lo. Kaba a katuun te hamana uana tere Sunahan nonei e ngöe neien a katuun a matskö, nonei e töatöa sila noua turu nihamana i tanen.

¹² Kaba a markato tara Lo turu Jiu e halhal nena markatona turu nihamana. Taraha, u Buku u Göagono e mar ranga uana teka, “A katuun te kukute nitöa nena a man raranga hoboto tara Lo nonei te töatöa nou.”

¹³ Na e mar ranga has uana teka, “A katuun te hakute ria turu ruei bate matena e ka mena u rangan korupakö tere Sunahan i peisanen.” Na e Kristo te sakahis raiara turu rangan korupakö te hala nena a Lo, taraha nonei e luba naia u rangan korupakö teka i peisanen te mate ien tara kuruse.

¹⁴ E Kristo e markato uu teka ba u katuun has tema Jiu ri te kalala sila raria tere Abraham ti hamana uaien tere Iesu Kristo. Nonei e markato uu teka ba tara nihamana i tarara bara e luera u Namnamei u Göagono tere Sunahan ti ranga hamana nen.

A Lo na u ranga hamana

¹⁵ A matsi hahatoulana, alia e hatei ragi limiou u töa u haharueina temar ka uarara tara man tötöa man lan. Tega kitseia a katuun u ranga, ba u katuun te haniga naren, e möa ta katuun tega tatei pekoeien romana na tega tatei hapona hasia turu ranga i tanen.

¹⁶ Na e kato has uana iesana, e Sunahan e hale ii e Abraham na u hatutubunei i tanen u ranga hamana. U raranga teka ema ranga nanei a katuun a parpara. E möa. E ranga nena a töa puku a katuun, nonei e Kristo.

¹⁷ U raranga te katoe gulia e markato uana teka: i mamnen koru e Sunahan e kato gono mei e Abraham u ranga hamana. Na Lo turu Jiu, te butu hamurimurima i murina u 430 u hiningal, ema tatei kato pekoe nei u ranga hamana tere Sunahan.

¹⁸ Sanena e Sunahan tega taguhu sila raia ra tara markato tara Lo, nonei sane tapusun katoi u ranga hamana i tanen. Kaba e möa. E Sunahan e taguhu sile ii e Abraham a markato turu ranga hamana.

^19-20 Gaha te hala sile ii e Sunahan a Lo? Nonei e hala sileien ti kato homi uu katuun bate ngilin haröto raneien a mouna a markato a omi i taren. Na Lo e ka hapopoia tara pöata tega butuia nonei a katuun tere Abraham, e Kristo, a katuun te hala mei e Sunahan u ranga hamana i tanen. A man Lo tere Sunahan u angelo ti la mam memen ba nori emi hale rien e Mosis be Mosis e hala nanen turu katuun. Kaba pöata te hala naia e Sunahan u ranga hamana i tanen tere Abraham, nonei e kato pepeiseien, na e möa ta katuun tega taguheien.

²¹ Aha te poeiena u raranga teka? A Lo e hiatatung mena u ranga hamana tere Sunahan? E möa koru! Sanena tego kaia a töa lo te antunan kato hatöatöa rena u katuun, e Sunahan sane kato hamatskö sila rana u katuun tara Lo. Kaba e möa.

²² U Buku u Göagono e mar ranga uana teka, a markato a omi e karabus raiena u katuun hoboto i puta tara nitagala i tanen. A ka teka i kato sile ii u katuun te hamana uaier tere Iesu Kristo egi lui a ka te ranga hamanein e Sunahan.

²³ Temala noa meia a pöata turu nihamana, a markato tara Lo e here ii a karabus nara i herei u karabus, e antunaia tara pöata te butuma u nihamana.

²⁴ A Lo e here ii a tson taratara kap i tarara, e antunan töaia te butuma e Kristo bara e hamana reia i tanen me töan matskö raia i matana e Sunahan.

²⁵ Na pöata turu nihamana e butu hakapa tala, na tson taratara kap ema tarakap lel ranoui ra.

²⁶ Na te hamana mia limiou tere Iesu Kristo, ba limiou te katuun hoboto uamou tere Sunahan.

²⁷ Alimiou tu lu hamaneiam a baptais tere Kristo, e katuun uamiou i tanen bate hakatsin töa namen.

²⁸ Na te katuun uami limiou tere Kristo, e möa lel ta toun Grik na ta Jiu, na ta katunun kukui puku na ta katuun tegoma kukui puku ii, na ta tson na ta tahol. Alimiou hoboto te hamana mia tere Iesu Kristo e here talemi a töa katuun.

²⁹ Na limiou te pala uamiou tere Kristo e here hasemi a galapien hamana tere Abraham, na ka te ranga hamanein e Sunahan tega hala naien tere Abraham e la has uana i tamilimiou.