Galesia 2 - U Bulunagana U Niga

E Pol na palair u aposol

¹ I murina u maloto na u tohats u hiningal, ba lam mere Banabas e la pouts lel uaiem i Jerusalem. Alia i lu hasela e Taitus me la gono has mera noulam.

² E Sunahan noahas te hatarein tego la uu lia. Ba lia ena gum gono meraiegu a pal kapan turu Lotu me hatei ragien u Bulungana u Niga, ti roron ranga merai lia u katuun te halhal ria turu Jiu. Alia u mar hakats u teka: A toukui ti katoema lia i manasa te antunana i romana ena mots lalapukuna.

³ Alia u ka gonomei a hahikapien i tar e Taitus a toun Grik, kaba pal kapan teka ima ranga sile ii tegi hapö menaien.

⁴ Kaba palair u katuun tima kristen ii hasohaleia a peisaren turu katuun u kristen. Nori emi katsin tari ta saha ka tego katoi lam u katuun tere Iesu Kristo. E Iesu nonei te purese ba raialam tara Lo turu Jiu, kaba u katuun teka i ngilin hakits pouts len raiou lam.

⁵ Kaba lam ima hengo koru las raien. Alam i ngilin tara kap haniga berai limiou u hihatuts hamana tegoma palis uaien.

⁶ Na pal kapan turu lotu ima hapone ii tu töa tu raranga tara man ranga i tar. Alia ema hakats hapara nagi te pal kapan uaren taraha, e Sunahan ema hakats has nanei a solo a kapan tara katuun. E möa.

⁷ Nori i tari e Sunahan e hale ii lia a toukui tegona hatei menai lia u Bulungana u Niga turu katuun te halhal ria turu Jiu, temar hala has menaien e Pita a toukui tego hatei menaien u Bulungana u Niga turu Jiu.

⁸ E Sunahan e hale ii e Pita a nitagala tego la menaien u raranga tere Sunahan turu Jiu. Na te kato has uaien i tar e Sunahan e hala hase ii lia a nitagala tego la menai lia u raranga i tanen turu katuun te halhal ria turu Jiu.

⁹ Na ere Jemis mere Pita ne Jon a pal kapan turu Kristen, nori i tara sabe te hala menai lia e Sunahan a toukui teka, ba nori e haniga rariou lam mere Banabas. Na lam u haniga hobotein tego hatei noahas menai lam u Bulungana u Niga turu katuun te halhal ria turu Jiu, na tegi hatei noahas menaien u Bulungana u Niga turu Jiu.

¹⁰ Nori i hatei puku railam tego taguhu merai lam u katuun tima kamei taka na ti kaka puku, na nonei koru has u ngilngil i tar.

E Pol e ranga hapiou ni e Pita i Antiok

^11-12 Pöata te la uu e Pita tara taun i Antiok, nonei e ron nou gono mam mer u kristen tima Jiu ii. Kaba i murina timi tukuia u katuun te hala rema e Jemis, be Pita e la hatalis ba rena u katuun tima Jiu ii, ba nonei ena nou halhalina. Taraha, nonei e matoutir u kristen, ti pei menaien u Jiu ima tatei nou gono merai u katuun tima pala uai i taren.

¹³ Na pöata te katoeia e Pita a ka teka, ba palair u Jiu ti kristen e kukute haser te markato uu e Pita, na e Banabas has. Ba lia e ranga hapiou megia e Pita i matar u katuun, taraha nonei ema kato hamatskö ii.

¹⁴ Kaba pöata tu tareia lia tima kukute hamatskö menaien temar hihatuts uana u Bulungana u Niga, ba lia e ranga paka megia e Pita i matar u katuun hoboto me poeiegu, “Alö a Jiu. Na lö u kato haniga mam tu markato uu lö te kato uar u Kristen te tema Jiuri. Ga taraha tsiponi ba lö te kato silem i romana u katun te tema Jiuri e gi kato uu te kato uar u Jiu?”

U Jiu na palair u katuun e matskö silaria te hamana uaren tere Kristo

¹⁵ E manana ara i tuhanaia turu Jiu na ra ema katuun halhal rei te ngö rari u katuun u omi. E möa.

¹⁶ Kaba ara e atei silera a katuun te kukuteiena a Lo turu Jiu ema matskö neia i matana e Sunahan. E möa. U katuun te hamana ria tere Iesu Kristo, nori u katuun te ngö ranoui e Sunahan u katuun u matskö. Ara e atei silera e möa ta katuun tega antunan matsköia i matana e Sunahan te kukute mena neien a Lo turu Jiu.

¹⁷ Kaba pöata te hamana ria ra tere Kristo bate hamana silera tego kato hamatskö merai ra e Sunahan, ba palai te poeier ara e here rari u katuun tema pala uari turu Jiu te kato homir batema kukutieri a Lo. E hana, e Kristo te haniga nena tegi kato homi u ra? E möa koru talasi!

¹⁸ Kaba te hapolasa ba nena a katuun a markato tara Lo bate kukute pouts lele nen, nonei a katununa tara markato a omi.

¹⁹ A Lo turu Jiu e haröte nei lia, alia e heregi a katuun e mate hakapa, taraha alia ema antunan kukute haniga nitöa nagi a Lo. Na tara maroro teka alia e töatöa gono megu e Sunahan. Na lia u kute gono hakapa meia e Iesu tara kuruse me mate gono megen.

²⁰ Alia i lu hakapi a nitöatöa a tsimus. Kaba nitöatöa teka ema nitöatöa uanei i tar. Emoa. Kaba e Iesu nonei te kana i tar. Na mamana markato na man toukui te katoe gialia i puta, alia e katoe gien tara marorona turu nihamana. Na lia e hamana gia tara Pien Tson tere Sunahan. E ngil korue ioulia me mate silena tego taguhu menaien lia.

²¹ Alia ema ngilin katoegi a nitaatagi tere Sunahan a ka pinopino. Tega kato haniga raira a Lo tere Mosis ba ra te butu haniga ria i matana e Sunahan, bora, ge Iesu e mate pinopino tala.