Epesis 6 - U Bulunagana U Niga

A man munmun tahol na galapien i taren

¹ A galapien, alimiou go hengo haniga raiam u tamamilimiou na u tsinamilimiou, taraha a ka teka e nigana i matana a Tsunono.

^2-3 U Buku u Göagono e poeiena, alö go solosei hapani e tamamölö na e tsinamölö ba lö tena ka haniga mou batena töatöa halehana moa i puta. Nonei a lo tutuun turu Maloto u Raranga tere Sunahan te hatei nena a ka a niga tega hale ii e Sunahan a katuun te hengoe nen.

⁴ Na limiou u tamar a galapien, alimiou goma ranga sisi nitöa mia tara galapien i tamilimiou bate kato haraharaha ramen. E möa. Kaba alimiou go hatuts ramien u raranga tara Tsunono.

U katunun kui na u tson mammam i taren

⁵ U katunun kui, alimiou go hengo raiam u tson mammam i tamilimiou. Alimiou go hapan ramen bate torohana hatagala silemiou tego kato hasasaala mera mien. Na limiou go kui hanigaiam bate kui heremi u katunun kui tere Kristo.

⁶ Alimiou goma tatei kui sil tuun nemi a toukui teka tegi haniga merai limiou u katuun te pepeito kap rariou limiou. E möa. Kaba limiou go kui memien u tori u niga bate kukutie miou u ngilngil tere Sunahan.

⁷ Alimiou go sasaala meiam a toukui i tamilimiou, taraha alimiou ema kui bemi a katuun tuun. E möa. Alimiou e kuibe hase miou a Tsunono.

⁸ Ba Tsunono te hala nanou a hihol a niga turu katuun hoboto te kuir, na katuun te kui peisa mena u ngil i tanen na tara katuun has te hakuie ier.

⁹ Na limiou u tson mammam, alimiou go markato has uaiam iesana turu katunun kui i tamilimiou, ba limiou tema ranga hamatmatout ramien. Alimiou na u katunun kui i tamilimiou e ka memiou a töa puku a Katuun Pan i tamilimiou i Kolö, na nonei e ngil hahihinatoe hoboto rena u katuun.

A man kaan hiatatung hoboto tere Sunahan

¹⁰ Alia e mar hakapa menagi u raranga i tar teka. Alimiou go tagala mia tara Tsunono na tara nitagala pan i tanen.

¹¹ Alimiou go hamatsköe iam a peisa milimiou bate tuol hakarapoto namou a man gamo tere Satan, bate heremi u soldia te hahaloser a hiatatung.

¹² Taraha, ara ema hiatatung merei u katuun tuun. E möa. Ara e hiatatung mera u liliahanei u omi na i kolö na a pal kapan i taren. Ara e hiatatung mera a nitsunono i taren na u liliahanei u omi te tara kap ner a han i puta te ka noana turu kuhil.

¹³ Te markato uanen teka ba limiou te hake miou a man kaan hiatatung hoboto tere Sunahan ba limiou te tatei tuol hakarapoto mia tara pöata a omi bate tuol noa has mou tara pöata te kapana a hiatatung.

^14-17 A katuun te hiatatung silena e Sunahan e kato uana tara soldia te hamatsköena a man kaan hiatatung i tanen. Nonei e hapouseiena a lete na e hasogeiena a kaan hatukap turu lumluma na e hasogeiena u sendol na e pile nena a kaan hatukap na e hakopeiena u hatan hiatatung na e pile nena u kilatan hiatatung. Te markato tala uanen teka ba limiou te katoemiou u ranga te manana bate katoemiou a markato a matskö bate polasemiou u Bulungana u Niga tara masalohana. Na limiou go pile hakarapoto has naiam u nihamana bate lu hasemiou a nihitaguhu tere Sunahan, be Satan tema antunan kato homi ranoui limiou. Ba limiou te hake mia u raranga tere Sunahan i torimilimiou. U Namnamei tere Sunahan e kato homieiena a toukui tere Satan.

¹⁸ Alimiou go singo nitöa mia tara nitagala turu Namnamei tara mamana pöata te singo mia limiou tere Sunahan, ba limiou te katoemiou u mamana u mar singo. Na katuun te singona egoma tatei hanöa bana ii te singo uanen, ba nonei te singo sil has raiena u katuun hoboto tere Sunahan.

¹⁹ Na limiou go singo be hase moulia, ba tara pöata te katsin ranga goua lia be Sunahan te hale noui lia u raranga, ba lia tema matout goui tego habulungana menai lia u Bulungana u Niga te mous i manasa.

²⁰ Nonei a ka teka te ka sile gia lia tara karabus, ti habulungana menai lia u Bulungana u Niga. Na limiou go singo sile moulia balia tema tatei matout gi tego habulungana menai lia u Bulungana u Niga.

E Pol e hakapena u pas i tanen

²¹ E Tikikus nonei a hahatoulana koru i tarara tara hun katuun te hamana ria tere Iesu, na nonei a katunun kui a niga koru tara Tsunono. Nonei ena hatei ranoui limiou ime te marka uagu lia.

²² Nonei koru a ka te hala sile gouien lia i tamilimiou, tegona hatei meraien limiou ime te marka uamu lam na tegona hatagala has menaien a torimilimiou.

²³ E Sunahan e Tamarara na e Iesu Kristo a Tsunono e tatei hala nariou a masalohana na u ngilngil hamana i tamilimiou hoboto te hamana mia tere Iesu, bate taguhu has rariou limiou tego hamana haniga uaiam limiou.

²⁴ E Sunahan e tatei taatagi rena u katuun hoboto, ba u ngilngil i taren tere Iesu Kristo a Tsunono i tarara tema antunan kapa nei. Nonei talasi. Alia e Pol