Epesis 5 - U Bulunagana U Niga

A nikakana turu ualesala

¹ Alimiou a galapien tere Sunahan na nonei e ngil koru ranou limiou na limiou go markato uaiam i tanen.

² E Iesu e taatagi koru raioura me mate sil ranoura. A tou mate i tanen e here nei u haats te soka hamasi hanigan töa uana tere Sunahan, be Sunahan te ngil korue nen. Te markato tala uanen teka ba limiou te ngil koru has ramiou a palaier u katuun.

³ Alimiou u katuun tere Sunahan alimiou goma ranga has nami a tou tsikolo na u hirata u omi na te mamangil menari a mamanaka.

⁴ Alimiou goma rarare homi mi na e goma tatei ranga homi mi. Na limiou goma tatei hiounga homi hasmi. Alimiou u katuun tere Sunahan, ema niga koru nei tego markato uaiam limiou teka. Alimiou go haniga tuun las uaiam tere Sunahan.

⁵ Alimiou go atei sil hanigeiam a ka teka, a mar katuun teka ema tatei lu korue nei romana ta töa ta makum tara Nipepeito tere Kristo na tere Sunahan: a katuun a tsiktsikolo na katuun te hirata homina na katuun te mamangil nena a mamanaka. A katuun te mamangil nena a mamanaka e omi here nei a katuun te hatsunonena a got gamogamo.

⁶ Hanei sileiam tego gamo merai ta katuun alimiou u ranga pinopino. Nonei a mamanaka teka te kato haraharahena e Sunahan, be Sunahan te hahuna ranou u mar katuun temar hipus uaier teka.

⁷ Na limiou goma kapiena has rami u mar katuun teka.

⁸ Alimiou i ka has mia turu kuhil. A ka teka e haharuei nena a markato a omi. Kaba i romana alimiou e ka tala mia turu ualesala tara Tsunono. Ba limiou te ka here rami u katunura turu ualesala.

⁹ Taraha, u ualesala te habutena a mamanaka te nigana na te matsköna na te manana.

¹⁰ Na limiou go torohanan atei sileiam a ka te haniga korue nou a Tsunono.

¹¹ Alimiou goma ka gono merami u katuun te katoeier a markatona turu kuhil. E ma habute nei ta ka ta niga. Na limiou go haröto naiam te omi uana a markato teka.

¹² Alia e matsingolon ranga halakasa koru negu a manka te kato hamouse ren.

¹³ Kaba u ualesala te katoeiena a mamanaka bate hahankana tegi tara menaien.

¹⁴ A mamanaka te hahankana tegi tara menaien e tatei butun ualesalana. Nonei te ranga beiena u Buku u Göagono bate poeiena: “Alö te sohom, tagule! Takei ba poutsin a tou mate i tamölö. Be Kristo te hale noi lö u ualesala.”

¹⁵ Nonei tego ka haniga koru beiam limiou bate tara kap haniga namiou a mar nikaka i tamilimiou. Alimiou goma here rami u katuun u tutu, kaba limiou go here rami u katuun te ka mer a niatei a niga.

¹⁶ E möa ta töa ta pöata tega ski, taraha nonei a pöata a omi teka.

¹⁷ Alimiou goma kato here rami u katuun u tutu, kaba limiou go torohanan atei sileiam a ka te ngilena e Sunahan.

¹⁸ Na limiou goma spak mi. A markato teka e kato hohomiena a katuun. Kaba limiou go saputu meiam u Namnamei tere Sunahan.

¹⁹ Na pöata te ka hoboto mia limiou ba limiou te kömemiou u sam na u köman lotu na u köma te köma ria turu namnamei. Ba limiou te köma memi u köman lotu tara Tsunono bate köma memien u nihamana i torimilimiou bate soloseie men.

²⁰ Alimiou go haniga nitöa mia tere Sunahan e Tamarara, tara mamanaka na tara mamana pöata, ba limiou te katoe mien tara solona e Iesu Kristo a Tsunono i tarara.

A man munmun tahol

²¹ Alimiou go haröto naiam te hapan mena milimiou e Kristo ba limiou te haka putemiou a peisa milimiou.

²² Alimiou a touhaliou go haka puteiam a peisa milimiou tara pal tson i tamilimiou, te markato has uami limiou tara Tsunono.

²³ Taraha, a tson te pan nena a tahol i tanen te kato has uana e Kristo nonei te pan nena a hun katuun i tanen. Na hun katuun tere Kristo e hereri a tuenrei nen. Na e Kristo nonei a Nihitaguhu tara hun katuun i tanen.

²⁴ A hun katuun tere Kristo e ka puta ria tere Kristo. Na limiou has a touhaliou ego ka puta has mia tara pal tson i tamilimiou.

²⁵ Alimiou a pal tson ego ngil koru raiam a touhaliou i tamilimiou, te markato has uu e Kristo nonei e ngil korui a hun katuun i tanen ba nonei e mate sil ranen.

²⁶ Nonei e mate sil tega baptais meraien a hun katuun i tanen, me kato hagogoso mera neien u raranga tere Sunahan, be kato hagöagono has ranen.

²⁷ Nonei e kato mei a ka teka tego lu mera meien a hun katuun i peisanen bate taratara haniga nitöana. A hun katuun tere Kristo alimiou goma ka memi ta ka tega omia i matana e Kristo. Na nonei e ngilena a hun katuun i tanen egi hagöagoni a peisa ren bate ka haniga nitöar.

²⁸ Nonei has tego markato uaiam limiou a pal tson, alimiou go ngil koru raiam a touhaliou i tamilimiou temar ngil has mena milimiou a peisa milimiou. Na tson te ngilena a tahol i tanen e ngil hasena a peisanen pouts.

²⁹ E möa ta katuun tega tatei rama poutsin a peisa nen. E möa. Nonei e hanoue nen bate tara kap haniga koru has nanen, te kato has uana e Kristo. Nonei e tara kap haniga koru has rena a hun katuun i tanen.

³⁰ Taraha, ara e pala uara turu tuenrei i tanen.

³¹ Na u Buku u Göagono e mar ranga uana teka, a tson e la ba nena e tamanen na e tsinanen batena ka gono mena a tahol i tanen. Ba nori te katoeier a töa katuun.

³² Nonei u raranga u kapan koru teka te haharueina nena e Kristo na hun katuun i tanen e hereri a töa katuun.

³³ Na limiou a man tötöa a man tson ego ngil koru raiam a man touhaliou i tamilimiou, temar ngil has mena milö a peisa mölö pouts, na limiou a touhaliou go haka puteiam a peisa milimiou tara pal tson i tamilimiou.