Epesis 4 - U Bulunagana U Niga

U tuenrei e ka mena a mamana makum te kui hobotona

¹ Alia e Pol, alia e karabus silegu te kui menagi lia a toukui tara Tsunono. Na e Sunahan e hopö kap raiou limiou tego katuun uaiam limiou i tanen. Na lia e hatei ragou limiou ego marka uaiam temar ngil uana e Sunahan.

² Alimiou go hatetenei iam a peisa milimiou tara mamana pöata na limiou go ranga hatami hasiam bate niga mia tara tana katuun. Alimiou go hiangilngil iam batema hakats sil balemi a manka man omi tara tana katuun.

³ Alimiou go torohana hatagala iam tego pile kap hoboto mena milimiou u töa u hakats te hala nema u Namnamei tere Sunahan, ba limiou te ka haniga hobotomiou.

⁴ E ka mena u töa u tuenrei na u töa u namnamei, na e Sunahan e ngö sil has railimiou tego hahaloso mena milimiou a töa ka a niga tena la nama i murimuri.

^5-6 E ka mena a töa Tsunono na u töa u nihamana na töa a baptais na töa Sunahan, nonei e Tamarara hoboto. Nonei e ka seina i tarara hoboto na nonei e kui silana i tarara hoboto na nonei e kana iaharara hoboto.

⁷ E Kristo e hala puku nema a man töa man nitagala tara man töa man katuun i tarara e popona tara man nitagala man kapan te ngilin hala nen turu katuun i tanen.

⁸ Na u Buku u Göagono e mar ranga uana teka: “Pöata te la uen iasa ba nonei e la gono merena u karabus, me hala nena a man nitagala turu katuun i tanen.”

⁹ Na ime temar mouna uana a makumun ranga teka, “te la uaien iasa”? U raranga teka e mar mouna uana nonei has te la tutuun mam koru uama i puta.

¹⁰ Nonei a katuun te la uama i puta na nonei has te la uu iasa koru tara mamana makum hoboto i kolö. Nonei e kato sile ii a ka teka tego ka uen tara mamanaka hoboto tara mamana makum.

¹¹ Na nonei e hala nema a man nitagala teka turu katuun: a palai i hala ramei a nitagalana tara aposol, na palai a nitagalana tara propet, na palai a nitagalana tara tson hahabulungana, na palai a nitagalana tara tsonun halotu na tson hihatuts.

¹² Nonei e kato silei a ka teka tego taguhu meraien u katuun tere Sunahan ba nori te kui beren. Na tegi kato hatagala menaien u tuenrei tere Kristo bate panina.

¹³ Na toukui teka e la lasnou e antunana tara pöata tena hamana hoboto rouara bate ka mera u töa u nihamana. E antunanoa tara pöata tena atei sil haniga hobote rouara a Pien Tson tere Sunahan bate here nei a töa a niatei. Ba ra tena butu here roi a katuun te ka mena u nihamana na markato a niga a tangoho, te markato uana e Kristo.

¹⁴ Ba i murimuri bara tema here lele roi a galapien. Taraha, a galapien e hamana ria tara man hihatuts turu katuun u gamogamo hoboto te butu rima, u katuun te gamo raren ba nori te katoeier a man markato a man omi. Esi te hengo ranen bate hula hakatsina e here nei a ka te hula hapouseina i tasi, tsi a ka te söatena a lomolomo bate hula tapana. Kaba ara gima markato uai tara katuun teka.

¹⁵ Aragi hiangilngil bate ranga nera a ka te manana. E kato uana teka ba ra te pan susul rou bate here roi e Kristo, a kapan turu katuun i tanen. Nonei e here nei u baku te hakuiena u tuenrei hoboto.

¹⁶ A luta tara spana e harokoto hatagala hobotena a mamana makum turu tuenrei. Na pöata te kui haniga hobotona a mamana makum, ba u tuenrei hoboto te pan hanigana. Ara u katuun tere Kristo e here hase rei a man makum turu tuenrei. Na ragi hiangilngil bate hiatagtaguhura ba u nihamana i tarara te pan susuluna.

I me tegi marka uu ra

¹⁷ Na tara solona a Tsunono alia e hatei ragi limiou a ka teka, na lia e ranga hatagala koru nagien i tamilimiou. Alimiou goma marka lel uami te markato uaier u katuun tema hamanari.

¹⁸ Nori e ka halehana ba ner a nitöatöa tere Sunahan. Na bakuren e kuhilina na e kamer u tori u omi, taraha, nori e hipus korur bate kato hatutueier u hakats i taren.

¹⁹ Nori i möa lel ta nimatsingolo i taren, na e tsikolo pinopino tunur. Na nori e tagala sil korueier tegi kato menaien a mamana markato a omi.

²⁰ Kaba e Kristo ema mar hatuts merai limiou teka.

²¹ Alimiou u hengo hanigeiam u raranga u mana tere Iesu, na limiou e atei sil hasemiou a manka a man mana te hatuts raien limiou.

²² Na limiou go ba neiam u ngilngilina i puta i tamilimiou. U ngilngil teka e kana tara nikaka mam i tamilimiou na nonei e kato homi susul ranou limiou.

²³ Na torimilimiou na u hakhakats i tamilimiou egi hatsimus pouts nitöani.

²⁴ Na limiou go marka uaiam temar ngil uana e Sunahan, na markato i tamilimiou ega matskö bate göagonona.

²⁵ Alimiou go hanöa ba neiam a markatona turu gamo bate ranga namiou a ka te manana tara tana katuun, taraha ara hoboto e pala uara tara hun katuun tere Kristo.

²⁶ Te raharaha mia limiou, haka ba neiam a raharaha. Ena mots kato ranou limiou ba limiou te kato homi miou. Alimiou go hakapeiam a raharaha i mam te tsiruku na a pitala.

²⁷ Alimiou ena mots kui bemi e Satan a maroro.

²⁸ A katuun a kopkop ega hanöa ban a tou kop bate tanian kuina. Nonei ega kuin a limanen peisa, ba nonei te ka menou a mamanaka bate taguhu hasena a katuun te moana ta ka.

²⁹ Alimiou goma ranga nami u ranga u omi. Kaba limiou go katoeiam u raranga u niga tega taguhi a katuun te ranga gono memi limiou, bate kato hasasaale nen.

³⁰ Alimiou goma kato hataatagemi u Namnamei u Göagono tere Sunahan, taraha nonei a hatöatongo tere Sunahan te haröto nena te hanöa ba mena milimiou romana a manka man omi hoboto.

³¹ Alimiou go ba neiam u mar hakats te ka nitöa menami limiou a raharaha. Na limiou goma si koru has mi. Na ego möa lel has ta hiaraharaha na ta hiangenngena na tu hamal. Alimiou go hakapeiam u mamana u mar hakats u omi tara tana katuun.

³² Alimiou go hiakaka hanigaiam ba limiou te hiataatagi miou. Alimiou go solopaleiam a markato a omi tara taina katuun bate tara poutse men, temar luba has menai e Sunahan a man markato a man omi i tamilimiou tara solona e Kristo.