Epesis 3 - U Bulunagana U Niga

A toukui te kato bei e Pol u katuun tema Jiu ri

¹ Alia e Pol, alia i hakarabus sile ii ti kui menai lia a toukui tere Iesu Kristo.

² Alia e ateigu alimiou u atei sil hakapeiam e Sunahan te hale mei lia a toukui teka ego taguhu merai lia alimiou, taraha nonei e taatagi koru ranoura.

³ Nonei e haröte ii lia u ngilngil i tanen ti hamous mameien. Na lia u koloto hakapa berai limiou a tsi tabubun raranga tara ka teka.

⁴ Na te rite moa limiou u raranga teka ba limiou te luemou a niatei ti mar atei sil menai lia u ranga momous te hatei mamin e Kristo.

⁵ I manasa a ka teka ima hatei rai u katuun, kaba i romana u Namnamei tere Sunahan e haröto naien turu aposol na turu propet u niga i tanen.

⁶ Nonei u raranga momous teka e markato uana: alimiou u katuun tema Jiu mi e ka gono hoboto mera moulam bara te katoeiera a töa hun katuun. Alimiou has e lue miou a manka man niga tere Sunahan. Na u ranga hamana teka e kato sila naia e Sunahan tere Iesu Kristo. Na ka teka e butu sila ma turu Bulungana u Niga.

⁷ E Sunahan e taatagi naiou lia me hale ne lia a nitagala pan i tanen, nonei e katoe ii lia a katunun kui i tanen tego habulungana menai lia u Bulungana u Niga i tanen.

^8-9 Alia e ka puta koru gia turu katuun hoboto tere Sunahan. Kaba e Sunahan e taatagi naiou lia me hale ne lia a toukui tego hahatei merai lia alimiou u katuun tema Jiu ri a manka a man kapan te nigana tere Kristo, bate haröto has ragi u katuun hoboto temar butu hamana uanou u raranga te hamouseier tere Sunahan. E Sunahan te habuti a mamanaka, e hamous u raranga teka tara man pöata i manasa noa.

¹⁰ Nonei e kato sile ii a ka teka tego haröto menaien a mamana mar niatei i tanen i romana. E haröto sila naien turu katuun i tanen ba u angelo na pal kapan tara han i Kolö te tatei tare ren.

¹¹ Nonei a ka te ngileien i manasa na tara mamana pöata, na nonei a ka teka e butu hamana sila talana tere Iesu Kristo a Tsunono i tarara.

¹² Ba ra tema tatei matout tala rei, bate singo hamatskö uara tere Sunahan, taraha ara e hamana uara i tanen bate katuun has uara i tanen.

¹³ Na lia e hatei ragou limiou, alimiou goma tori tiama silemi te sagoho kamits sil mera gilia limiou. Taraha, a ka teka e haröto nena alimiou ema katuun papala mi i matana e Sunahan.

U ngilngil tere Kristo

^14-15 Pöata te hakats nagia lia a manka teka, ba lia te hatukunugu bate singo uagu tere Tamar, nonei te katoe a mamanaka te kana i Kolö na i puta na nonei has te hala raien a man solo.

¹⁶ Alia e singo silegu e Sunahan ega hala sila nama a nitagala i tanen i tamilimiou turu Namnamei i tanen, ba u namnamei i tamilimiou te tatei tagala hapopona tara nikapan i tanen.

¹⁷ Na lia e singo sil hasegu e Kristo e tatei kana i torimilimiou, alimiou te hamana mia i tanen. A mouna ka te singo sil korue gulia, turu hakhakats na markato i tamilimiou: alimiou go hiangilngil iam.

¹⁸ Alia e singo silegu alimiou na u katuun hoboto tere Sunahan e tatei ka memiou a nitagala tego atei sil mena milimiou temar ngil hapopo mera nei e Kristo u katuun. U ngilngil i tanen e pan koruna, na e ngahangaha koruna na e la nitöa uana iasa na i puta has. Na e la hoboto uana tara mamana han na tara mamanaka.

¹⁹ Alia e singo silegu alimiou e tatei atei silemiou ime temar ngil koru mera nei e Kristo u katuun, noahasina te pan bala mena nei u ngilngil teka a niatei turu katuun. Kaba a mamanaka a niga te saputu mena e Sunahan alimiou e saputu has memouen.

²⁰ Alia e soloseiegu e Sunahan, te antunan kato saluhe nena a mamanaka hoboto tara nitagala te kuina i torirara, a manka tima singo sil hasei ra na tima hakats has nai ra.

²¹ Nonei e tatei luena a solo pan turu katuun i tanen na tere Iesu Kristo tara mamana pöata hoboto i murimuri. U mana.