Epesis 2 - U Bulunagana U Niga

A tou mate na nitöatöa

¹ I manasa alimiou i hipusiam bate katoe miou a mamana a markato a omi, nonei te kato hamate raiou limiou.

² Alimiou u kukuteiam a markato a omina i puta, bate hengoemiou a tsunonona tara man spirit a man omina iasa, nonei a spirit a omi te hakui rena u katuun te hipus naier e Sunahan.

³ Ara hoboto i markato uu ti kato uaien. Ara i kukute u ngilngil peisa i tarara i puta, bate kato uara turu ngilngil turu tuenrei na turu hakats i tarara. E Sunahan e raharaha raioura na u katuun hoboto, taraha a markato a omi e takui ia i tarara.

^4-5 Kaba e Sunahan e roron taatagi koru ranoura. Nonei e taatagi hantuna raiara te kato hatöatöa pouts gono meraien ra e Kristo, ara ti ka halhal ban a nitöatöa tere Sunahan tara nihihipus i tarara i tanen. Na e Sunahan e lu pouts meraira a nihitaguhu peisa i tanen.

⁶ Nonei e hatakei pouts gono meraira e Kristo tegi tsunono gono menaien ra tara han i Kolö.

⁷ Nonei e kato mei a ka teka tega haröto menaien a nihihitaatagi na niniganiga pan i tanen tara mamana pöata i murimuri. Nonei e ngilin haröto ranei u katuun hoboto temar niga mera neien ra, na ka te kato berai ra e Iesu Kristo.

⁸ E Sunahan e lu pouts merai ra tara nihihitaatagi peisa i tanen turu nihamana i tarara. A ka teka ema butu mei a toukui i tarara. E möa. E Sunahan e hala pukpuku raienra.

⁹ Ara ima kui sile ii a ka teka. Te markato uanen teka bara tema tatei hala seie rei a solorara.

¹⁰ E Sunahan e kato raira u katuun u tsimus ti hamana uu ra tere Iesu Kristo. Nonei e kato hatsimus sil raira tegi kato menaira a man markato a man niga te hopö kap mam sil raien ra.

Ara e here rari a töa hun katuun te hamana uara ra tere Kristo

¹¹ Alimiou u katuun halhal ima posa gono merai lam u Jiu, na limiou e atei silemiou alam e ngö rami limiou u katuun tema ka memi a hatöatongo tere Sunahan i pikpikö milimiou, taraha alam e roron hapö nem a hatöatongo tere Sunahan kaba limiou u möa.

¹² Alimiou go hakats pouts naiam nonei tara pöata alimiou u ka halhal ba naiam e Kristo. Alimiou tu ka halehana ba naiam u katuun tere Sunahan. A man rangan hiahanhaniga te kits gono meraien u Jiu ema la uai i tamilimiou. Alimiou u möa ta Sunahan tara han i puta teka, batema ka memi ta ka tego hamana sileiam limiou.

¹³ Alimiou u ka halehana iam i manasa, kaba i romana alimiou e hamana uamiou tere Iesu Kristo, na turu rahatsing tere Kristo e Sunahan e lu hasukusuku meranei limiou i tanen.

¹⁴ E Kristo te gono pouts raioura me kato poutsera a töa hun katuun, ba nonei e hela banena a ololo te lukata raioura. Nonei peisa te nolo pouts beraiou ra. Ara e hiataratara pouts talara, taraha e Sunahan e kato here pouts raira a töa katuun.

¹⁵ E Kristo e luba hakapa ban a Lo tere Mosis na u mamana u raranga te kaia i tanen. A tou mate i tanen e hakapa a Lo na u ranga u mal na u mamana u mar raranga nonei tara Lo te kato raiou ra bara te hiakaka halhalira. Nonei e kato sile ii a ka teka tego kato meraien a huol a hun katuun a töa hun katuun bate hamana uaier i tanen.

¹⁶ E Kristo e mate sileia tara kuruse tego luba menaien u hiapakpakö te kaia i tarara i manasa, bara te pala uara tere Sunahan bate ka here rei a töa a hun katuun.

¹⁷ Be Kristo emi habulungana nena u rangana tara masalohana i tarara hoboto. Nonei e rarareia u Bulungana u Niga turu katuun ti kaia i lehana, na e rarare has ia turu katuun ti ka hasukusukuia i tanen.

¹⁸ Turu Namnamei tere Kristo ara hoboto e antunan la hasukusuku uara tere Sunahan, taraha e Kristo e kato berai ra a ka teka.

¹⁹ Alimiou ema katuun halhal lel talami. Alimiou a töa han tala turu katuun tere Sunahan, bate hun katuun uamiou i tanen.

²⁰ Alimiou e heremi a luma, na u aposol na u propet e here rari u punluma. Na e Iesu Kristo e here nei a tuulgus tara luma.

²¹ E Sunahan e gono hoboto meranei u katuun i tanen tere Kristo, na ra e here rei a luman lotu a göagono te hatakei bera ii ra e Sunahan.

²² Na limiou has a hapalana a luman lotu teka, e Sunahan e haka gögono raiou limiou u katuun hoboto i tanen, banonei na u Namnamei u Göagono te tatei kana tara luma teka. Alimiou e ka gono mera moulam na e Sunahan e ka gono mena u Namnamei i tanen iaharara.