Aposol 7 - U Bulunagana U Niga

E Stiven e rangaia i matana u Kout Pan

¹ Ba tsunono pan turu pris e rangatena e Stiven, “U ranga teka e manana?”

^2-3 Be Stiven e ranga palisina me poeiena, “A matsi hahatoulana na matsi hahatamana, hengo iam! A Sunahan turu ualesala e butuia tere tuburara e Abraham tara pöata te ka ien i Mesapotemia ba nonei tema la noanei i Haran, me poeiena, ‘Alö go laban a hun katuun na han i tamölö ba lö te lauam tara han te hatare goi lia alö.’

⁴ Ba nonei e laba nena a han i Kaldia mena kana i Haran. Ba i murina te mateia e tamanen, be Sunahan e hala mena meien tara han te ka tala mia limiou teka.

⁵ “E Sunahan ema hale ii e Abraham ta makum turu tsiktsiki teka ba nonei te tatei teie nen. E möa koru ta tsitabubun tsiktsiki tega solosolo meien. Kaba e Sunahan e ranga hamanein tega hala menaien u tsiktsiki teka i murimuri, ba nonei te tatei tei gono mera nen u hatutubunei tanen i murimuri. Kaba e Abraham e möa noa ta töa ta pien tara pöata te katoeia e Sunahan u ranga hamana teka.

⁶ E Sunahan e mar ranga uu teka i tanen me poeiena, ‘U tubumölö i murimuri ena ka roua tara palair u han turu tana u katuun, ba nori tena hakukui puku rariou bate kato homi rariou e antunanoa turu 400 u hiningal.

⁷ Kaba lia e hahuna ragou romana u katuun te hakukui puku rarouen, ba i murimuri ba u katuun i tar te laba narima romana nonei a han te kukui puku rien batemi hatsunone roua lia tara han teka.’

⁸ Be Sunahan e hale nei e Abraham a markato te hapö menari a hatöatongo tere Sunahan turu pikpikö, bate haröto nena u raranga te kits gono mei e Sunahan e Abraham e manana. Be Abraham e hatuhanena e Aisak me pöena a pikpikönen turu hatöalina u lan ti poseia e Aisak. Be Aisak e hatuhanena e Jekop me kato has mena neien iesana. Be Jekop e hatuhana rena a maloto na huol a pien tson me kato has mera neien iesana. Na nori tala u tuburara.

^9-10 “A man munmun toulana teka i hiomia tere Josep me hahol naren, ba nonei ena kukui pukuna i Itsip. Kaba e Sunahan e ka gono meien, me luba naneien a mamana nomi hoboto te butuia i tanen. Ba pöata te butuia e Josep i matana e Pero a Kingina i Itsip, be Sunahan e haniga korue nen me hale neien a niatei a niga. Ba e Pero e hopö kap sile nei e Josep tega pepeito kap menaien a mamanaka tere Pero na u katuun i tanen na han hoboto has i Itsip.

¹¹ Ba bes pan e butuna tara mamana han i Itsip na i Kenan has. A bes teka e pan koru, ba u katuun e bes homi korur. Ba u tuburara ema antunan sabe nari ta kannou.

¹² Be Jekop e hengo nena te ka uu a kannou i Itsip, me tula rena a galapien tson i tanen tara tou la tutuun.

¹³ Tara hahuoluna a tou tataala, be Josep e halakasena nonei e si koru turu toulanen, te töan atei sil haseia e Pero a hun katuun tere Josep.

¹⁴ Be Josep e hala nena u raranga tere tamanen e Jekop me hatei nena tegi la hakapa hoboto koru uamen i tanen i Itsip. Nori i antuna hobotoia turu 75 tara katuun.

¹⁵ Ba e Jekop e la uana i Itsip tena kaien, te mate has ien, na galapien has i tanen, nori u tuburara.

¹⁶ A tsinö ren ina kaho raia turu kahokaho te holeia e Abraham tara pala tere Hamor i Sikem.

¹⁷ “A pöata e sukusuku tala tego butu hamanaia u ranga hamana te kato e Sunahan tere Abraham, kaba u hihase turu katuun tarara i Itsip e para susul.

¹⁸ Kaba a tana king e pan lel ma i Itsip tema atei silei e Josep.

¹⁹ Nonei e gamoer u katuun i tarara me ranga meraiena u tuburara tegi laba meraien a man göama i taren ielesala bate mater.

²⁰ E Mosis i poseia nonei tara pöata teka na nonei e taratara haniga koruia i matana e Sunahan. Tara topisa a tsihou e tamanen na e tsinanen i taratara kap naien i luma i taren.

²¹ Kaba tina haka piou naien ielesala, ba pien tahol tere Pero emi lue nen me hahahu here naneien a pien tson tanen.

²² Be Mosis e hatutseri a mamana niatei a niga turu katunura i Itsip, na u raranga na toukui i tanen e tagala koru.

²³ “Tara pöata te ka meia e Mosis u 40 u hiningal, ba nonei e hakats nena tegona tara meraien u katuun i tanen a Israel.

²⁴ Pöata te tareien a toun Itsip e atungi a toun Israel ba nonei ena taguhena a toun Israel me atung hamatena a toun Itsip.

²⁵ Nonei e kamei u hakats te kato uana, a pala i tanen egi tara bate tara marueier, e Sunahan e katsin taguhu sila ranen tara nitagala tere Mosis. Kaba nori ima ate ii.

²⁶ “Ba turu hamahö be Mosis ena tara rena a huol a toun Israel bate hiatatungur. Ba nonei e torohanan hamatskö ranen me poeiena, ‘Hengoiam! Alimiou a töa hun katuun. Aha te hiatatung sile milimiou?’

²⁷ Kaba a katuun te kato homi a tai e tula ban e Mosis me poeiena, ‘E si te hale ii lö a nitsunono tego tara kap merailö alam bate hahamouem a markato i tamulam?

²⁸ Alö e katsin atung hamate here has nami lia a toun Itsip tu atung hamati lö i nolaha?’

²⁹ Pöata te hengoeia e Mosis u mar ranga teka be Mosis e bus ba nena a han i Itsip mena ka here nei a katuun te moa ta han tara han i Midian. Pöata te ka ien tara han teka ba nonei e hitöluna me hatuhanena a huol a pien tson.”

³⁰ Be Stiven e ranga lenina me poeiena, “Pöata te la hakapaia u 40 u hiningal, ba töa angelo e butuna tere Mosis tara makum a palaka turu Pokus i Sinai me butu nama turu ruei te kulupu.

^31-32 Pöata te tareien e Mosis ba nonei e asingoto koruna me la hasukusukuna tegona tara menaien u ruei te kulupu kaba ema ats ii. Ba u töa u ranga e la nama tara Tsunono iahana u kulupu me poeiena, ‘Alia e Sunahan turu tubumölö, e Sunahan tere Abraham mere Aisak ne Jekop.’ Be Mosis e toltololona me matoutun tara uana turu kulupu.

³³ Ba Tsunono e hateie nen, ‘His ban u sendol i moumölö. A makumun tsiktsiki te tuol mia lö e göagonona.

³⁴ Alia u tara hakapi a man markato a man omi te katoer u katunura i Itsip tara hun katuun i tar. Alia u hengo hakapa hasi te har uaren, na lia e koul sile guma tegomi taguhu meraien. Alö go lama. Alia e hala pouts mena gilö i Itsip.’”

³⁵ Be Stiven e ranga lel noa hasina me poeiena, “Nonei e Mosis ti raman u katunura Israel me poeier, ‘E möa ta katuun tega hale ii lö a nikapan na markato te ona menari markato i tamulam!’ Nonei lasi a katuun te hala here nai e Sunahan a tsunono na katuun tega luba raien a nomi. E Sunahan e hatagala sila naien tara angelo te butuia i tanen tara tsi ruei te kulupu.

³⁶ E Mosis e kato u mamana mirakol i Itsip me lu halakasa ba ranei u katuun i Itsip. Ba nonei e katoena u mirakol turu tasi ti ngöei u Tasi u Rörö na u mamana u mirakol tara makum a palaka e antunaia turu 40 u hiningal.

³⁷ Nonei e Mosis te hateir u katunura i Israel me poeiena, ‘E Sunahan e hatuolenou a töa propet turu katuun i tamilimiou i murimuri, kato has uanou temar hatuol menaien lia.’

³⁸ Nonei e Mosis te ka gono mer u katunura i Israel ti gono hobotoien tara makum a palaka. Nonei e ka gono mei u tuburara na a angelo has te rangaia i tanen turu Pokus i Sinai. Nonei e lui u raranga tere Sunahan, u rarangana tara nitöatöa, tega hala raien ra.

³⁹ “Kaba u tuburara ima ngilin hengo nai u raranga i tanen. E möa. Nori i tori tsuga naien me ngilin la pouts uaier tara han i Itsip.

⁴⁰ Ba nori e hateier e Eron, ‘Alö go kui bera mei ra a man got ba nori te mam rariou ra. Ara ema atei sile ri aha te butuia tere Mosis, a katuun te lu halakasa ba ramei ra a han i Itsip.’

⁴¹ Tara pöata teka nori i kui u kesa te mata here ii a tunan bulmakau ba nori e kato menari u haats i tanen. Nori i sasaala koru mei a ka ti katoeien a lima ren peisa.

⁴² Kaba e Sunahan e habirits me haka ba ranen ba nori e hatsunono uaier tara pitala na tsihou na u pitopito, temar koloto uu a propet turu Buku u Göagono: ‘Alimiou u katunura i Israel! I manasa alimiou u ka mia tara makum a palaka turu 40 u hiningal, ba limiou e atung hamate ramiou u bulmakau na u sipsip me haats ramen. A markato teka u kato mena milimiou i tar? E möa.

⁴³ Alimiou u lue iam a luma labalaba tara got gamogamo a solonen e Molok, me söata gono memien a pitopito tara got gamogamo e Repan, nori a man kesa tu kui sile milimiou tego hatsunono mena mien limiou. Te markato uanen teka balia te luba has ragou limiou bate hala mera goilimiou i hapalana i Babilon.’ “A propet temar ranga uu teka.”

⁴⁴ Be Stiven e ranga lel noa hasina me poeiena, “Tara pöata ti kaia u tuburara tara makum a palaka, nori i ka mei a luma labalaba ti roron singoien tere Sunahan. E Sunahan e haröte ii e Mosis tego mar kui menaien a luman lotu teka, ba nori te töan mar kui mena rien temar haröto menai e Sunahan e Mosis.

⁴⁵ Ba i murinen bu tuburara e la gono merima e Josua tegimi lu menaien u tsiktsiki turu palair u katuun te tsuga baraia e Sunahan i matar u tuburara. Tara pöata teka nori emi pioun nonei a luma labalaba me hakei rien turu tsiktsiki teka e antunaia tara pöata tere Devit a King.

⁴⁶ “E Sunahan e haniga korui e Devit, be Devit e singo uana i tanen tega tatei kui menaien a töa luma a niga tere Sunahan tere Jekop.

⁴⁷ Kaba e Solomon a pien tson tere Devit te kui bei e Sunahan a luma.

⁴⁸ “Kaba e Sunahan Iasa Koru ema tatei ka neia tara luma ti kui u katuun. E markato uana temar ranga uu a propet:

⁴⁹ ‘A Tsunono e poeiena, Alia e king gia tara mamana makum hoboto i Kolö na i puta. A saha mar luma te kui be moi limiou alia ba lia te husa gia i tanen?

⁵⁰ A han i tar e ka hobotona tara mamana makum, taraha alia peisa tu kui a mamanaka hoboto.’ “E Sunahan e mar ranga uu teka.”

⁵¹ E Stiven e ranga lel noahas ia tara pal kapan turu Kout me poeiena, “Alimiou u katuun u hihipus! Alimiou e tori here noa hasemi u tematan! Alimiou e talingatu ba koru namiou u raranga tere Sunahan! Alimiou e hipus nitöa namiou u Namnamei u Göagono ti markato has uu tuburara!

⁵² U tuburara i kato homir u propet hoboto i manasa. Nori i atung hamatir u katuun tere Sunahan ti habulungana mamin tego la uama romana a Katuun a Matskö i tanen, nonei e Kristo. Na limiou u hala hakapa mena mien turu katuun ti omieien ba nori e atung hamatie ren.

⁵³ Alimiou tu lue iam a Lo te hala menai e Sunahan turu angelo, na limiou uma kukutie mien te la noa hasina i romana!” E Stiven e mar ranga uu teka.

E Stiven i titi hamate ii u hatu

⁵⁴ Pöata ti hengoeia a pal kapan u ranga tere Stiven, ba nori e raharaha korue ren me kutu ha karkarangaker a liho ren.

⁵⁵ U Namnamei u Göagono e saputi e Stiven, ba nonei tara tötoso uana i Kolö me tarena u ualesala pan tere Sunahan, na e Iesu e tuol ia tara pal matou tere Sunahan.

⁵⁶ Be Stiven e poeiena, “Alia e taregu u Kolö e kalatana na e Iesu te butun Katunuma e tuolna tara pal matou tere Sunahan!”

⁵⁷ Kaba nori i tupu kapiin a talingaren me ele hapan tuun mer u ranga, me takei hobotor me piatar tina pile kap menaien e Stiven.

⁵⁸ Ba nori e las ba na rien a taun mena titi hate ren. U katuun ti saka mam meien u ranga i his ban a man hasobö a man ngahangaha i taren me hakei rien i rehina a töa katuun a hitots a solonen e Sol.

⁵⁹ Tara pöata ti titi hateien e Stiven, ba nonei e mar singo uana teka, “O Iesu a Tsunono, lui u namnamei i tar!”

⁶⁰ Ba nonei e hatukununa me ku hapan koruna me poeiena, “O Tsunono, moa tu palisi a markato a omi te katoeren teka!” E Stiven e mar ranga uu teka me matena.