Aposol 6 - U Bulunagana U Niga

A tohit a katuun i taguhir u aposol

¹ Tara man pöata teka u hihase turu katunun tsitsilo e para susul. U katuun ti atei sil u rangan HaGrik i raharaher u katunura i Hibru u amoaba i taren ima tara sil rai tara pöata ti molamola naia a kannou.

² Ba maloto na huol a aposol e ngö gögono rer u katunun tsitsilo hoboto me poeier, “Ema niga koru nei tego hapolasan hahatei menai lam u raranga tere Sunahan bate tara kap nem a kannou.

³ Alimiou go hopö kap raiam a tohit a katuun i gusumilimiou te ka mer a solo a niga i matar u katuun, na u Namnamei u Göagono ega saputuia i taren bate ka meier a niatei a niga. Ba ra te haka raiera u katuun teka egi tara kapiin nonei a toukuin kannou teka.

⁴ Ba lam te kui nitöa moua tego singo u lam tere Sunahan na tego taguhu has merailam u katuun turu raranga tere Sunahan.”

⁵ U katuun hoboto i haniga korui u raranga ti katoi u aposol. Ba nori e hopö kap naier e Stiven, a tson te ka mei u nihamana u kapan na te saputu mei u Namnamei u Göagono. Ba nori e hopö kap has naier e Pilip ne Prokoras ne Naikena ne Timon ne Pamenas na e Nikolas. E Nikolas a katununa i Antiok te la uama tara pala turu Jiu.

⁶ Ba nori e hatuol raria u katuun teka i matar u aposol, ba nori e singo uaier tere Sunahan me hatakope ria a limaren i taren tega kalala meraien e Sunahan tara toukui i taren.

⁷ U raranga tere Sunahan e tasata susul noahas. Na u hihase turu katunun tsitsilo i Jerusalem e para susul koru hamanasa tala, na para koru has a man pris turu Jiu i hengo koru talei u nihamana teka.

Nori i pile kapiin e Stiven

⁸ E Sunahan e haniga korui e Stiven me hale neien a nitagala a kapan, nonei e katoe u mirakol e gono i gusur u katuun.

⁹ Ba palair u katuun e tanian raharaher e Stiven. Nori a pal katuun tara töa luman lotu turu Jiu ti ngöei a luman lotu turu Friman. Nori u katunur i Sairini na i Aleksenria na i Silisia na i Eisia.

¹⁰ Kaba u Namnamei tere Sunahan e hale ii e Stiven a niatei a niga koru, nori ima antuna ii temar ranga sila uu e Stiven.

¹¹ Ba nori e hol raier a palair u katuun tegi pei menaien, “Alam u hengoi te ranga homi menaien e Mosis na e Sunahan!”

¹² Ba nori e hala ner u ranga te kato haraharahir u tsunono na u tson hihatuts tara Lo. Ba nori ena tarer e Stiven me pile kap naren mena piou narien i matana u Kout Pan.

¹³ Ba nori e hatuol rer u katuun tegimi gamo uaien bate poeier, “A katuun teka e roron ranga homi nena a luman lotu a Göagono i tarara na Lo has tere Mosis.

¹⁴ Taraha, alam u hengoei te pei menaien, ‘Nonei e Iesu ni Nasaret e kato rure nou a Luman Lotu Pan bate palise nou a man markatona i manasa te hala raira e Mosis!’”

¹⁵ U katuun hoboto ti gum ia turu Kout i tara tötoso uu tere Stiven me tarer a matanen e here ii a matana a angelo.