Aposol 3 - U Bulunagana U Niga

A töa katuun a mou omi e niga pouts

¹ Turu töa u lan e Pita mere Jon i la uu tara Luman Lotu Pan tara pal 3 kilok tara lahi, a pöatan singo.

² Ba töa katuun a mou omi te söata hatasue ria tara tamana ti ngöei “A Tamana a Niga.” E tsinanen e mar posa noahas menaien teka. Turu mamana u lan nonei i söata nitöa menai tara tamana teka, tega singo be me naien a peisanen ta tsi moni turu katuun ti tasuia tara Luman Lotu Pan.

³ Tara pöata te tareien ere Pita mere Jon ti katsin tasu uaien, ba nonei e singoe iena ta tsi moni i taren.

⁴ Ba nori e tara tötoso uaier i tanen be Pita e poeiena, “Tara uama i tamulam!”

⁵ Ba nonei e tara uana i taren me hakats nena tega lu menaien ta ka i taren.

⁶ Be Pita e poeiena i tanen, “Alia u möa ta moni, kaba lia e hale goilö a ka te ka megu lia. Tara solona e Iesu Kristo na i Nasaret, alia e ranga megou lö, alö go tataala!”

⁷ Be Pita e lueiena a pal matou i tanen tega hatakei menien, ba man pitpitana u mou na man pagpagotona man mounen e tagala poutsur.

⁸ Ba nonei e kurapa seina me tuoluna me tanian tataalana! Ba nonei e tasu gono merena ere Pita mere Jon i Luman Lotu Pan, me kurapa lalana me soloseiena e Sunahan turu ranga i tanen!

⁹ U katuun hoboto i tara te tataala uaien ba nori e soloseir e Sunahan.

¹⁰ Ba nori e töan tara marei taler nonei lasi a katuun te roron singo ta moni te gumien tara Tamana a Niga. Nori i asingoto koruni a ka te butuia tara katuun teka.

Pita e rarareia iahana Luman Lotu Pan

¹¹ U katuun hoboto i asingoto koru me piata uaier i taren, tara makum ti ngöei a “Luman Oho tere Solomon” i rehina Luman Lotu Pan. Na nonei a katuun teka e pile noahas ia tere Pita mere Jon.

¹² Be Pita e tara ranen me poeiena i taren, “Alimiou u katunura i Israel e asingoto koru namiou a ka teka bate tara tötoso uamuma i tamulam? Kaba a katuun teka ema niga mela lei a nitagala peisa i tamulam tsi a markato a niga i tamulam bate tataalana. E möa.

¹³ A Sunahan tere Abraham mere Aisak na e Jekop na u tuburara i hala sei a solona a katunun kui i tanen e Iesu. Nonei a katuun teka tu hala mena milimiou turu katuun ti paköeien. Na e Pailat a gamman e ngilin purese e Iesu bate lana, kaba limiou u tori tsuga namen i matana e Pailat.

¹⁴ Nonei a katuun a matskö na niga koru, kaba limiou u tori tsuga namen. Alimiou u singo tsipon nemi e Pailat ega hapurese berami limiou a katuun a hihipuli.

¹⁵ Alimiou u atung hamateiam a Mouna a Nitöatöa. Kaba e Sunahan e hatakei poutseien tara tou mate i tanen, na lam u tari a ka teka bate hahatei namen.

¹⁶ A markato te hamana mena milam e Iesu na te haniga mena milam a solonen, nonei a markato te hatagala poutse lala a katuun teka te tare milimiou na te atei sile milimiou. E Iesu te habuti a nihamana i tamulam, na nihamana teka te kato haniga poutse lala a katuun teka i matamilimiou hoboto.

¹⁷ “A man hahatoulana, alia e atei silegu a ka omi teka u kato memi limiou na pal kapan has i tamilimiou a nitutu.

¹⁸ Ba tara markato teka be Sunahan te kato hantoeiena u raranga i tanen ti hatei mamin u propet hoboto, te poeiena e Mesaia ega sagohi a kamits pan, na e Sunahan e kato hamana noa hasi a ka teka.

¹⁹ Paliseiam u hakats i tamilimiou bate habirits ua miou tere Sunahan, be Sunahan te luba nanou a man markato a man omi i tamilimiou.

²⁰ Te markato uamou limiou teka, ba Tsunono te habute nou a nitagala a tsimus i tamilimiou, ba nonei te hala pouts has mena namei romana e Iesu i tamilimiou, nonei e Mesaia te hopö kap mam beraien limiou.

²¹ Nonei ega ka buia i Kolö e antunana te butu nama romana a pöata te kato hatsimuse noa e Sunahan a man ka hoboto, temar ranga sila uaia e Sunahan turu propet u matskö i tanen i manasa.

²² E Mosis e pei, ‘E Sunahan a Tsunono i tamilimiou e habute nou romana a töa propet turu toulamilimiou i murimuri bate taguhu ranou limiou, kato has uana te markato has meien lia. Alimiou go hengoeiam a mamanaka te ranga mera neien limiou.

²³ Ere si u katuun tema hengoe roi a ka te ranga nanou a propet teka, e lu kata raroua turu katuun tere Sunahan ba nori tena taia riou.’

²⁴ “E Samuel na u palair u propet has ti butu hamurimurima i tanen, nori hoboto i rangein a pöata te kana i romana.

²⁵ Alimiou u pal katuun turu propet. Na limiou u katuun te lu hasemiou a manka turu ranga hamana te hale ii e Sunahan u tubumilimiou. Nonei e pei tere Abraham, ‘Alia e kalala sila ragoua a man hun katuun hobotora i puta tara pala i tamölö.’

²⁶ Be Sunahan e hopö kap nena a katunun kui i tanen e Iesu, me hala mam mena meien i tamilimiou tega kalala meraien limiou. Nonei e ngilin habirits ba ranei limiou a man markato a man omi i tamilimiou.”