Aposol 28 - U Bulunagana U Niga

A tolo i Malta

¹ Pöata tu sung hakapaia lam, ba lam e töan atei silem a tolo teka i ngöei i Malta.

² U katunur tara tolo teka i kapiena haniga koru raiou lam. A langits e polo tania ba ka e hamuri koruna, ba nori e hatseier u tula me ngö rariou lam.

³ Ba e Pol ena soro hobotenama a kopa ruei, ba pöata temi hopöeien a rue turu tula ba töa kökötsi a omi e bus lakasa nenama u hiski memi kotena a limanen.

⁴ Pöata ti tareia u katunura tara tolo teka a kökötsi e kuteia i limana e Pol, ba nori e hiararangar me poeier, “A katuun banei teka a hihipuli romana. Nonei e katosabe nama i tasi, kaba a got na tara hipou e hapiou nena tega töatöa uaien.”

⁵ Be Pol e tsibil ba nena a kökötsi me rus uana turu tula, kaba e Pol ema lu homi ii.

⁶ Ba nori e pepeito kap ner tego puku uu a limanen tsi tego singotei rus uaien bate matena. Nori i solon hahaloso kaba nori ima tarei ta ka ta omi ega butuia i tanen, ba nori e paliser u hakats i taren me poeier, “Nonei a töa got.”

⁷ E Publius, a tsunono tara tolo teka, e ka mei a makumun tsiktsiki te sukusukuia tara makum teka. Nonei e las raioulam ba lam e ka gono memen turu topisa u lan.

⁸ Tara pöata teka e tamana e Publius e opö mei a peisanen e lolanga mei a siki na e ka has mei u purus. Be Pol ena tare nen me singo uana tere Sunahan. Ba nonei e hatakopena a limanen i tanen me kato haniga poutse nen.

⁹ Pöata te kato uaien teka ba u katuun hoboto tara tolo teka ti ka mei a siki e la uarima i tanen banonei emi kato haniga pouts has ranen.

¹⁰ Ba nori e hala rari lam a manka a man parpara. A töa tolaalana i Aleksenria e hahalosoia tara tolo teka tega kapa uu tasi pan. Ba i murina tu ka hakapaia lam tara tolo a topisa a tsihou, ba lam e katsin la lel talam, ba nori e hoseier a mamanaka hoboto tu ngili lam, tara tolaala.

E Pol e tukuia i Rom

¹¹ Ba lam e osa mia tara tolaalana i Aleksenria me lam, a solonen u Mun Toulana u Puna e ohoia tara tolo ti kaia lam.

¹² Ba lam ena hasung mia i Sirakus me keiem u topisa u lan.

¹³ Ba lam e laba nem a taun teka be sila mia i rehina kotolana mena sung mia tara taun i Ritsiam. Ba turu hamahö ba belbelaha e takei nama, ba turu hahuoluna u lan ba lam ena tuku mia i Puteoli.

¹⁴ Ba tara taun teka ba lam e saberaiam u katuun ti hamanaia tere Iesu. Ba nori e ngö rariou lam ba lam ena ka gono meramen u tohit u lan. Ba lam e töan la uaiem i Rom.

¹⁵ U katuun ti hamanaia tere Iesu i Rom i hengoin tu la uama lam, ba palai e taatago mera rimei lam tara taun te kaia i gusuna kalana a solonen a Hanin Töana i Apias. Na palai i taatago mera mei lam tara taun ti ngöei a Topisa Taven. Pöata te tara raien e Pol ba nonei e haniga uana tere Sunahan ba peisanen e tagala poutsuna.

A taun i Rom

¹⁶ Pöata tina tukuia lam i Rom ba tsunono turu soldia e haniga nena tego ka pepeisa uu e Pol na töa puku a soldia, tega taratara kap naien.

¹⁷ U topisa u lan e la hakapa be Pol e ngö gögono rena a pal kapan turu Jiu. Pöata ti gono hoboto men ba nonei e poeiena i taren, “A matsi hahatoulana i tar, alia uma katoei ta töa ta ka tego tula puta menai lia u katuun i tarara na u mar hihatutsina turu tuburara. Kaba nori i karabuse ma lia i Jerusalem, ba nori e hala mena rilia turu katunura i Rom.

¹⁸ Pöata ti rangrangatei lia ba nori e katsin hapurese riou lia, taraha nori ima sabie mei ta töa ta ka tegi atung hamate sile ien lia.

¹⁹ Kaba pöata tima haniga ia u Jiu, alia u möa lel ta maroro ba lia e töa kato silegu tego la peisa uu lia turu kout tere Sisa. Kaba alia ima ka mei ta ka tego kout gono sil merai lia a hun katuun i tar.

²⁰ Nonei a ka teka te ngö gögono sil mera gi lia alimiou bate ngilin ranga gono mera goulimiou. Taraha, nonei a nihamana te kame gulia tara katuun te hahaloser u katunura i Israel te kits sile gia lia tara tsien teka.”

²¹ Ba nori e poeier i tanen, “Alam uma luei tu pas i Judia tega ranga sile ioulö. Na man hahikapien i tamulam ima söata hase mei tu rangana i Judia tega markato uu teka, na e möa has ta katuun tega ranga homi sileiou lö.

²² Kaba alam e ngilem alö peisa tego hatei rameilam a ka te hamana mia lö. Taraha, alam e atei silem u katuun tara han hoboto ema ngileri u lotu teka.”

²³ Ba nori e hakeier u lan tegi gono hoboto meien e Pol, ba u katuun u parpara e la uarima tara makum te kaia e Pol. Tara bongbong mena antunena a lahibong nonei e ranga hatararein a Nipepeito tere Sunahan. Nonei e kato sil tega antunan palis meien u hakats i taren tere Iesu, bate hatei raneien u raranga te kana tara Lo tere Mosis na u raranga turu propet.

²⁴ A palai i hamani a ka te ranga naien, kaba a palai i hahamana naien.

²⁵ Ba nori ema hiahanhaniga ri, ba pöata ti katsin taruraien be Pol e hala lel raneien ien u tana u raranga. Ba nonei e poeiena, “U Namnamei u Göagono tere Sunahan e ranga hamana i manasa tara pöata te harangeien e Aisaia a propet tere Sunahan me ranga gono mena u tubumilimiou.

²⁶ Nonei e pei tere Aisaia: ‘Alö gona hateir u katuun teka bate poeiem, Alimiou e hahengo mou bate hengo tuun las mou, kaba limiou ema atei sile moi ta töa ta ka. Alimiou e tara mou bate tara tuun las mou, kaba alimiou ema tara hamana koru moi.

²⁷ Taraha, u katuun teka a tui i taren e bout hakapa, na talingaren ema hengo haniga nei na nori i hasoho hakapa hasi a mataren. Nori e namots tara naier a mataren, na e namots hengo naier a talinga ren, ba tui taren te ateina. Nori e raman habirits pouts uaier i tar balia te kato haniga pouts ragen.’ “E Sunahan temar ranga uu teka.”

^28-29 Be Pol e pei hasena, “Na lia e hatei ragoui limiou, a nihitaguhu teka tere Sunahan e la tala uana turu katuun tema Jiu ri, nori tena hengo riou.” Pöata te ranga hakapa ia e Pol ba u Jiu e tarurar me hiangenngenar.

³⁰ Nonei e kaia tara makum teka u huol u hiningal na e hol peisa hasi a makum te kaien na e haniga koru hasir u katuun hoboto timi tareien.

³¹ Nonei e hihatutsin a Tsunono e Iesu Kristo na Nipepeito tere Sunahan. Nonei ema matout ii, na e möa ta katuun tega hapiou naien.