Aposol 25 - U Bulunagana U Niga

E Pol e kato sil tega la uaien tere Sisa

¹ E Pestus e la hakapa uama i Sisaria tegomi tara kap menaien a provins i tanen, ba i murina u topisa u lan ba nonei e laba nenama i Sisaria me kete sei uana i Jerusalem.

^2-3 Ba u pris pan na pal kapan turu Jiu e la uaier i tanen me sakeri e Pol a man ranga. Nori i ranga hatagala uu tere Pestus me poeier, “Alö go taguhu ramou lam balö te hala mena mumei e Pol i Jerusalem.” Nori i ngilin na mous kap ia i mam tara maroro tegi sila meia e Pol bate pulie ren.

⁴ Be Pestus e ranga palis uana i taren me poeiena, “E Pol e karabus na i Sisaria. E ma lehana noi balia te la uagou i Sisaria.

⁵ Na pal kapan i tamilimiou e tatei la gono has meriou lia. Na te kato homi ia a katuun teka ba limiou te tatei na kout gono memen.”

⁶ Pöata te ka hakapa gono meraien e Pestus u töal tsi u maloto u lan, ba nonei e töan gala uana i Sisaria. Ba u hamahö ba nonei e gumna tara luman kout, ba nonei e hangö na lala e Pol.

⁷ Pöata te tuku hakapa ia e Pol ba u Jiu ti lama i Jerusalem e tuol hahise ren, ba nori e sake rien u parpara u ranga u tiama. Kaba nori ima antunan haröte ii e Pestus tego mana uu a man ranga teka.

⁸ Be Pol e mar ranga palis uana teka, “Alia uma katoe ii ta töa ta ka ta omi tara lo turu Jiu, na tara Luman Lotu Pan has, na tara gamman pan has e Sisa.”

⁹ Kaba e Pestus e ngilin kato hasasaaler u Jiu. Ba nonei e rangatena e Pol, “Alö e ngilin la uam i Jerusalem balia tena hengoe goua u kout i tamölö i Jerusalem?”

¹⁰ Kaba e Pol e pei, “A luma teka te tuol gia lia i romana nonei a luman kout tara gamman pan e Sisa. A luma lasi teka nonei a makum te tatei hengoe ria u kout i tar. Alö u atei hakapa, alia uma katoe ii ta töa ta ka ta omi turu Jiu.

¹¹ Te ka megia lia ta ka ta omi, tsi tu katoeia lia ta töa ta ka te antunana tego mate mei lia, alia ema tatei bus ba nagi a nihahuna teka. Kaba e möa tega mana uu a man ranga te kout merien lia, na e möa has ta töa ta katuun tega hala menai lia i taren. Alia e hasoso silegu u kout pan tere Sisa!”

¹² Ba i murina te hiararanga gono mam meia e Pestus u tsonun pepeito i tanen me töan poeiena tere Pol, “Alö e kato silem tego la uu lö tere Sisa, bara nigana, alö e la uamou tere Sisa.”

E Pol e tuol ia i matana e Agripa na e Benis

¹³ I murina u lahisa u lan e la hakapa be Agripa a King na e hahinanen e Benis e tuku ria tara taun i Sisaria tegina tara menaien e Pestus.

¹⁴ Nori i gamon ka gono meien u lahisa u lan, be Pestus e ranga hatei nena e Pol tara king. Ba nonei e poeiena, “A töa tson e kana teka e karabus noaia tara pöata tere Piliks.

¹⁵ Tara pöata tu la uu lia i Jerusalem ba u pris pan na pal kapan turu Jiu e kout naren, ba nori e rangate riou lia tego pei menai lia nonei egi hahunei.

¹⁶ Ba lia e ranga palis meragen me poeiegu, ‘Alam a tei Rom ema hahuna mam memi a katuun i mam te gum hoboto mera nen u katuun te kout na ren, ba nonei te ka mena a pöata tego ranga palis menaien u ranga te kout merien u katuun.’

¹⁷ “Ba tara pöata ti gono hobotoien teka ba lia e haseseigu turu hamahö ba lia e gum gia turu gumgum tara tsonun hahamou turu ranga be ngö regu u soldia tegi la mena meien e Pol i tar.

¹⁸ Ba u katuun ti kout meien e tuolur, kaba ima kout meien ta marka ta omi tu hakats meien lia.

¹⁹ Nori i raharaha meien a manka lasi turu lotu peisa i taren na tara töa katuun te mate, a solonen e Iesu. Be Pol e poeiena e Iesu e töatöa noahasina.

²⁰ Alia uma atei sil hanigei u mar ranga te markato uana teka, ba lia e ranga megu e Pol tego tatei la pouts uaien i Jerusalem batena kout mera neien u ranga teka.

²¹ Kaba e Pol e ranga hatagala sil tega ka noa uaien tara karabus antunana tara pöata te la nen romana turu kout peisa tara gamman pan e Sisa. Balia e poeiegu egi tara kap noani e antunana tara pöata te hala nagien romana lia tere Sisa.” E Pestus te mar ranga uu teka.

²² Be Agripa e poeiena tere Pestus, “Alia e ngilin hengo negu u ranga tara katuun teka.” Be Pestus e poeiena, “Alö e hengoe men romana i mahö.”

²³ Ba turu hamahö be Agripa mere Benis e la gono merima u hiharöto pan, ba nori ena tasu ria iahana makum te hengoe ria u kout. Ba u tsunono pan turu soldia na pal kapan tara taun e tasu gono meren. Be Pestus e hala nena u raranga ba nori e tasu merima e Pol.

²⁴ Be Pestus e poeiena, “O King Agripa na u katuun hoboto te ka ria teka. Alimiou e tare miou a katuun teka, a solonen e Pol. U katuun hoboto turu Jiu i Jerusalem na teka has i hala sil meien tar tara man raranga man omi. Ba nori e ku hapan mer tegoma tatei töatöa lel uai e Pol.

²⁵ Kaba alia uma sabei ta töa ta ka te tegi atung hamate meien. Na nonei peisa e kato silena tega lauaien turu kout tere Sisa, balia e hanigagu tegi hala menaien.

²⁶ Kaba alia uma koloto noei tu pas tere Sisa a tsunono i tar, taraha alia ema atei silegi aha tego ranga sil mei lia e Pol. Balia temi piou nagien i matamilimiou, na i mata mölö bala o King Agripa. Ba pöata te kapa noa a man harangata teka balia te ka toum megou ta ka tego koloto sil mei lia e Pol.

²⁷ Taraha, alia e poeiegu ema niga nei tego hala menai lia a karabus turu kout pan balia tema hatei nagi a saha ka te kout sil merien.”