Aposol 24 - U Bulunagana U Niga

A pal kapan turu Jiu i koutin e Pol

¹ U tolima u lan e kapa, be Ananias a tsunono pan turu pris e la uanama i Sisaria me la gono mera nama a pal kapan turu Jiu, na katunun raranga i taren, a solonen e Tetulus. Ba nori e hateieri e Piliks a gamman u ranga ti katsin kout meien e Pol.

² Ba gamman e ngöena e Pol. Be Tetulus e tanian sake nei e Pol u ranga me poeiena, “A tsi tsunono o Piliks, alö u taguhu raiou lam tara nigumgum a niga koru na e möa ta hiatatung tega butu. Na turu hakats u niga i tamölö, alö u taguhir a pala i tamulam tu hamatskö menai a manka man para te omi i manasa turu han hoboto.

³ A torimulam e haniga koruena a ka teka, ba lam te haniga koru hase mölö.

⁴ Kaba alia e namots hatu kap nagou lö a pöata lehana. Alia e ranga hataatagi gia i tamölö tego hengo menai lö u ranga i tamulam.

⁵ “Alam u sabe a tson teka e Pol a katununa tara markato a omi. Nonei e roron habutena a raharaha na hiatatung i gusur u Jiu tara han hoboto i puta. Na nonei a töa tson mammam has turu katuun ti lukater a pala i tamulam me ka uaier tara tana pala te ngö rari a hun katunura i Nasaret.

⁶ Nonei e torohana hasi tega kato hakorkoriana menaien a Luman Lotu Pan i tamulam, kaba lam u pile kap naien. Na lam u ngilin kout naien tara lo i tamulam.

⁷ Kaba a tsunono e Lisias na u soldia i tanen i tagala koru, me luba rarien lam.

⁸ Na e Lisias e ranga mer u katuun ti katsin kout naien egimi butuia i tamölö. Ba lö noahas te tatei rangate men, balö te tatei atei peisa moa i tanen a mamanaka te kout memien lam.” E Tetulus temar ranga u teka.

⁹ U Jiu has i taguhe ien me saka menari u ranga tere Pol. Nori i ranga hatei hoboto me poeier, “A man raranga hoboto teka e manana.”

E Pol e hatein u ranga i matana e Piliks

¹⁰ Ba gamman e hanigana tega kato menai e Pol u raranga i tanen. Be Pol e poeiena, “Alia e atei silegu turu hiningal u para alö a tsonun hahamou turu ranga tara pala i tamulam u Jiu. Ba lia te sasaala megu te ranga palis uagu lia i tamölö.

¹¹ Te rangata ramouen lö balö te tatei ase hase mou u töa u maloto na u huol u lan puku te kapa tu la uu lia i Jerusalem tegona kato menai u lotu.

¹² Na pal kapan turu Jiu ima tarei tego hiatatung gono menai lia ta töa ta katuun turu ranga iahana Luman Lotu Pan. Na nori ima tara hasei tego hatakei mei lia tu hagum tu omi turu katuun iahana a man luman lotu tsi iahana taun. E möa.

¹³ Na turu ranga te kout merien lia, nori ema antunan habutu naroui tu töa ta mouna tu raranga te tatei kato hamanena u ranga i taren teka. E möa.

¹⁴ Kaba alia e hatei goulö, nonei a Maroro teka tara Tsunono te ngöe rien ‘A markato te peko menari a hun katuun,’ e manana alia e roron kukutie gen. Alia e kukutiegu a Maroro teka ba lia te singo uagu tara Got turu tubumulam e Sunahan. Alia e hamanegu u raranga hoboto te kana tara Lo tere Sunahan na u ranga hoboto ti kolotein u propet.

¹⁵ Na lia e hamana silegu nonei a ka te hamana sil hase ren, nonei te hatakei poutse noua romana e Sunahan u katuun ti mate, u katuun u matskö na u katuun tema matskö has ri.

¹⁶ Ba tara mamana pöata a torir e tagala silena tego matskö uu lia i matana e Sunahan na i matar u katuun has.”

¹⁷ Be Pol e ranga lenina me poeiena, “Tara man hiningal te la hakapa alia u kaia tara palaina u han, ba lia e töan la pouts uagu i Jerusalem. Alia u la mema u moni tegona taguhu merai lia u katuun ti möa ta ka, na lia u la sil hasi tegona haats uu lia tere Sunahan.

¹⁸ Na lia u kato hakapi a markato tego gogoso uu lia i matana a Lo. Alia u markato u teka iahana a Luman Lotu Pan ba nori e tare riou lia. Na e möa ta pal katuun tegi ka gono meiou lia, na e möa has tu geta.

¹⁹ Kaba a palair u Jiu ri Eisia e mi pile kap naiou lia. Na te ka merien tu ranga i tar, nori gi la uama i matamölö bate kout nariou lia.

²⁰ Te möa nen, ba u katuun teka te hatei rilö a saha a nomi ti sabeien i tar, tara pöata tu tuol ia lia i matana u Kout Pan turu Jiu.

²¹ Toum u töa puku lasi u ranga. Pöata tu tuol ia lia i gusuren ba lia e mar ku uagu teka, ‘Alia e hamanegu e Sunahan e hatakei pouts rena romana u katuun ti mate. Nonei lasi a mouna a ka te kout merien lia i matamilimiou.’” E Pol emar ranga uu teka.

²² E Piliks e molo atei haniga sil u nihamana na markato turu kristen. Ba nonei e ranga mera nei u Jiu egi hahaloso ba nonei e poeiena, “Pöata te la nama romana a tsunono e Lisias, ba lia te tatei hamatsköe gou u ranga i tamilimiou.”

²³ Nonei e rurari u hagum me ranga menei a kapten turu soldia ega hakeia e Pol tara karabus, kaba nonei e goma hakarabus hatagala korueien. Na nonei e hanigeir a man hahikapien tere Pol tegi taguhu menaien tara matsi ka te ngileien.

E Piliks e hakeia e Pol tara karabus turu huol u hiningal

²⁴ U lahisa u lan e kapa, be Piliks e la gono menama a tahol i tanen e Drusila a toun Jiu. Be Piliks e ngöena e Pol me hengoeiena u raranga i tanen te hatei naien a mouna a ka te hamana siler u kristen tere Iesu Kristo.

²⁵ Pöata te raranga naia e Pol a markato a matskö, na tega hala puta menai a katuun u ngil i peisanen, na te kout gono mera noua e Sunahan u katuun, be Piliks e matout koruna me poeiena, “La tala. Te ka megoua lia ta pöata ba lia te ngö lele goulö.”

²⁶ E Piliks e hakatsin e Pol ega haleien ta moni ba nonei te hapurese nen tara karabus. A pöata a para nonei e roron ngö menaien i tanen bate hiararanga gono menen.

²⁷ U huol u hiningal e la hakapa, be Posius Pestus e palisena e Piliks tara toukui i tanen. E Piliks e ngilir u Jiu egi haniga uu i tanen ba nonei ema hapurese ba nanei e Pol tara karabus.