Aposol 23 - U Bulunagana U Niga

¹ Be Pol e tara hamatskö uana tara pal kapan me poeiena, “Man hatoulana, alia u ka mei u hakats u alesala nitöa i matana e Sunahan te la noa hasina i romana, a torir ema pei töe ii ‘Alö e kato homim.’ E möa.”

² Ba tsunono pan turu pris, e Ananias e ranga merena u katuun ti tuol ia i rehina e Pol egi tapali a rungnen.

³ Te mar kato uaien teka be Pol e poeiena i tanen, “E Sunahan e tapala hase nou lö, taraha alö a katuun a nigan ranga tuun! Alö e gum silem tego kato hamatskö menai lö alia tara lo, kaba lö has te pekoem a lo, taraha alö e ranga memula u katuun teka egi tapale ioulia!”

⁴ Ba u katuun ti tuol ia i rehina e Pol i poeier, “Alö e ranga homi nem a tsunono pan turu pris tere Sunahan!”

⁵ Be Pol e poeiena, “Man hatoulana, alia ema atei sile gulei te tsunono pan uanen turu pris. Sanena tego atei sil mena lei lia nonei a tsunono pan turu pris, alia sane ma ranga homi nagu leien. Taraha, u Buku u Göagono e poeiena, ‘Alö goma ranga homi sile ii a katuun pan turu katuun i tamölö.’”

⁶ Tara pöata te atei sileia e Pol u Sadiusi na u Parasi i ka hobotoia turu hagum pan teka, ba nonei e ku uana i taren me poeiena, “Man hatoulana, alia has a Parasi na pien turu Parasi. Alia e ka gia turu kout, taraha alia e hamana gia tara tou takei pouts tara tou mate!”

⁷ Nonei e ranga hakapa uu teka ba hiagetageta e taniana i gusuna u Parasi na u Sadiusi, ba u hagum teka e lakatana i hagus.

⁸ Taraha, u Sadiusi e roron poeier a katuun te matena ema takei pouts nei romana tara tou mate, na nori e roron pei haser e möa ta angelo na e möa has tu namnamei. Kaba u Parasi e roron hamana ria tara manka hoboto teka.

⁹ Ba hiagetageta teka e butu hapan susuluna, ba palair u tson hihatuts tara Lo tere Mosis ti kaia tara pala turu Parasi e tuolur me ranga sisir me poeier, “Alam ema sabiemi ta ka ta omi tara tson teka. Toum u namnamei tsi a angelo te ranga meien.”

¹⁰ Pöata te takei hatagala susul ia a hiaraharaha, ba tsunono turu soldia e matoutena u katuun e namots las kakatser e Pol! Ba nonei e ranga merena u soldia egi la batena luba naruma e Pol bate la merumen tara luman soldia.

¹¹ Ba tara bong ba Tsunono e tuolna i rehina e Pol me poeiena, “Möa tu matout. Alö tu hatei nama lia i Jerusalem, alö ena markato has uamou teka i Rom.”

Nori i korupaköni e Pol

¹² Tara bongbong bu Jiu e hagumur me korupakö ner e Pol. Nori i kati u hamal pan tegi atung hamate menai e Pol ba nori ema nou ri na ima ua has ii.

¹³ U hihase turu katuun ti kati u korupakö teka e kurapa harohi u tohats u maloto.

¹⁴ Ba nori e la uaier turu pris pan na tara pal kapan mena poeier, “Alam e katoe muma u hamal pan tegoma nou menai lam ta ka e noana tara pöata te atung hamate moa lam e Pol.

¹⁵ Bora, alimiou na pal kapan turu Kout Pan ego hale mula tu raranga tara tsunono turu soldia na i Rom bate hatei muleien tego lu mena meien e Pol bate la merumen. Alimiou go gamo ramen bate poeiemula, ‘Alam e ngilin rangata lel namen.’ Ba lam tena hahalose men bate atung hamate mouen i mam tegomi tuku uaien teka.”

¹⁶ Kaba a töa pien tson, a hanangona e Pol, e hengoen u korupakö teka, ba nonei e lana mena tasuna i luman soldia mena hateiena e Pol.

¹⁷ Be Pol e ngöena a töa kapten me poeiena, “Lu mena lei a pien tson teka tara tsunono turu soldia, taraha nonei e ka mena a töa ka tega hatei naien.”

¹⁸ Ba kapten teka e lue nen me na piou nanen tara tsunono mena poeiena, “E Pol a karabus e ngöe lalou lia me tahule nei lia tegomi piou menai a pien tson teka i tamölö, taraha nonei e ka mena a töa ka tega hatei naien i tamölö.”

¹⁹ Ba tsunono e pile nena a limanen me gamon la hatalis menen me rangate nen, “Alö e katsin hatei mi lia aha?”

²⁰ Ba pien e poeiena, “U Jiu e haniga hoboto narima tegi rangata menaien lö tego lu mena lei lö e Pol turu Kout Pan i mahö. Nori e gamo rima bate poeier, ‘Alam e ngilin rangata lel nem tu harangata i tanen.’

²¹ Kaba alö goma hengo raien, taraha u tohats u maloto tara katuun batena kurapana e mous riou bate hahalose ren. Nori e katoe rima u hamal pan tegima nou uaien na tegima ua has uaien e antunana tara pöata tegi atung hamateien e Pol. Nori e mous hahaloso hamanasa tale ren, na nori e hahaloser u ranga i tamölö.”

²² Ba tsunono e poeiena, “Möa tu hahatei ta töa ta katuun te hatei mena mulei lö alia a ka teka.” Ba nonei e hala poutseiena a pien.

Nori i hala menai e Pol tere Piliks a gamman

²³ Ba tsunono turu soldia e ngörena a huol a kapten i tanen me poeiena, “Lui a 200 tara soldia, na 70 turu katunura turu hos, na 200 turu katunura turu saka, ba limiou te takei mou i 9 kilok bate la mou i Sisaria tara bong i romana.

²⁴ Lu hasiam a man hos te hihitaguhu nariou tegi hosa menaien e Pol ba limiou te peito kap haniga namouen, ba limiou tena piou namien tere Piliks a gamman.”

²⁵ Ba tsunono e kolotena u töa u pas tega markato uu teka:

²⁶ “O Piliks, alö a gamman te soloseie mulam. Alia e butu gia i tamölö i romana. Alia e Klodias Lisias.

²⁷ U Jiu i pile kapiin a tson teka me katsin atung hamatie ren. Alia u hengoin nonei a toun Rom ba lia e la gono meregu u soldia i tar mena luba ragien u Jiu.

²⁸ Alia u katsin atei sil aha ti kout sil meien balia te lu mena gien turu Kout Pan i taren.

²⁹ Alia u sabe ti kout sil menaien a man kana tara lo peisa i taren, kaba nori ima kout sil meien ta ka tega antunaia tegi atung hamate menaien tsi tegi karabus menaien.

³⁰ Na tara pöata tu hengo naia lia u Jiu i korupakö naien, ba lia te hala menagien i tamölö. Na lia u ranga mer u katuun ti kout meien egina hateia i mata mölö aha te kout sil merien. Nonei lasi a tsi ranga i tar.”

³¹ Ba u soldia e hengoer u ranga tara tsunono i taren ba nori e luer e Pol mena piou narien tara taun i Antipatris tara bong.

³² Ba u hamahö ba u soldia e kopis pouts uaier i luman soldia, ba u katunura turu hos e la gono mer e Pol.

³³ Ba nori ena piou narien i Sisaria mena hala naier u pas tara gamman, ba nori e hatuoler e Pol i matanen.

^34-35 Ba gamman e tarena u pas me rangatena e Pol, “A han tamölö i me?” Pöata te hengo naien e Pol a toun Silisia ba nonei e poeiena, “Alia e hengoe gou romana lö tara pöata te la ruma romana u katuun te kout nariou lö.” Ba nonei e ranga merena u soldia i tanen tegi pepeito kap haniga menai e Pol iahana luman gamman tere Herot.