Aposol 21 - U Bulunagana U Niga

E Pol e osaia tara tolaala tega la uaien i Jerusalem

¹ Alam u laba raien mena osa mia tara tolaala ba lam e seil hamatskö uam tara töa tolo i Kos. Ba u hamahö ba lam ena tuku mia tara tana tolo i Routes. Ba lam e laba nem i Routes me la uam tara taun i Patara.

² Ba lam ena sabeiem a töa tolaala te katsin la uu tara provins i Ponisia, ba lam e osa mia i tanen me lam.

³ Ba lam e tarem a tolo i Saiprus me la karasa ba mena mien tara pal keruka me lam. Ba lam e la uaiem tara provins i Siria mena sung mia tara taun i Taia. A tolaala ega hakouleia a kakö tara han teka.

⁴ Alam u tarer u kristen tara han teka, ba lam e ka gono mera men u tohit u lan. Tara nitagala turu Namnamei tere Sunahan nori i ranga mei e Pol tegoma la uaien i Jerusalem.

⁵ Pöata te kapaia a man lan i tamulam tara han teka, ba lam e takeim me lam. U kristen hoboto, a man munmun tahol na galapien i taren emi hipiouia ielesala tara taun. Ba lam e hatukun mia i kotolana me singom.

⁶ Ba lam e hiahanhaniga gono mera men, mena osa mia tara tolaala, ba nori e la poutsur i han i taren.

I Sisaria e Agabas e hatein u ranga tara propet

⁷ Alam u osaia tara tolaala mena tuku mia tara taun i Tolemes. Ba lam e tara rem u kristen, be ka gono mera men u töa u lan.

⁸ Ba turu hamahö ba lam e la uaiem i Sisaria tina tuku ia lam i luma tere Pilip, a katuun te hahabulunganein u raranga tere Sunahan. Nonei a töa tara tohit a katuun ti hopö kapir i Jerusalem ba lam e ka gono memen.

⁹ Nonei e ka mei a tohats a pien tahol a kukubei i tanen ti atein rangein u raranga turu propet.

¹⁰ Pöata ti gamon kaia lam, ba töa propet a solonen e Agabas e gala nama i Judia.

¹¹ Nonei e la uama i tamulam be mi lueiena a lete tere Pol, be kitse nei a lete a peisanen, a man mounen na man limanen has. Ba nonei e poeiena, “U Namnamei u Göagono tere Sunahan e mar ranga uana teka, ‘U Jiu i Jerusalem ena markato has uariou teka ba nori te kitseriou a katuun terena lete teka. Ba nori te hala mena rouien turu katuun tema Jiu ri.’”

¹² Tara pöata tu hengoeia lam a ka teka, ba lam na u katuun hoboto e ranga hataatagi tori silem e Pol tegoma la uaien i Jerusalem.

¹³ Ba nonei e ranga palisina me poeiena, “Aha te tabe sile milimiou? Alimiou e kato hatitiama koruemiou a torir. Te ngilin kits narouen lia tara karabus, alia e tatei karabusugu, na lia e haniga hasigu tegona mate sil menai lia e Iesu i Jerusalem.”

¹⁴ Nonei e tagala sil koru tega la uaien ba lam e hanöam me poeiem, “E Sunahan e tatei kato mena neien turu ngil i tanen.”

¹⁵ Ba lam e kato hamatsköem a manka i tamulam be kete sei uaiam i Jerusalem.

¹⁶ A palair u katunura i Sisaria ti hamanaia tere Iesu i la gono has meraiou lam. Ba nori ena piou raria lam i luma tere Nason, a katununa tara tolo i Saiprus. Nonei e kaia turu katuun ti hamanaia tere Iesu i manasa noa, ba lam ena ka mia i luma i tanen.

E Pol e tari e Jemis

¹⁷ Tara pöata tu tukuia lam i Jerusalem ba pal katuun ti hamanaia tere Iesu e sasaala koru mer ti tara meraien lam.

¹⁸ Ba u hamahö be Pol e peigi ranou lam hoboto tuna tara menai lam e Jemis. A pal kapan tara pala tere Iesu i ka hoboto has.

¹⁹ Be Pol e hatsi söasa ranen, be hatei raneien a mamanaka hoboto te katoe e Sunahan me poeiena, “E Sunahan e taguhe moulia ba nonei te kato be ranei u katuun tema Jiu ri a toukui a niga.”

²⁰ Pöata ti hengo naien a ka teka, ba nori e soloseier e Sunahan. Ba nori e poeier i tanen, “A tsi hatoulana, alö e atei silem u Jiu te hamana ria tere Iesu e para korur na nori hoboto e kukute hanigeier a man Lo tere Mosis.

²¹ Nori i hengoen tu hatuts mera mei lö u Jiu hoboto te ka ria turu han turu katuun tema Jiu ri ba lö te poeiem nori gi tori tsuga ban a man Lo tere Mosis, ba lö e ranga has nem tegima hapö menaien a hatöatongo tere Sunahan tara galapien i taren, ba nori tema tatei kukute haseri a markato turu Jiu.

²² Gaha tala te katoe roura? Nori e hengo na riou te tuku hakapa uamula lö.

²³ “Bora kato tala uu temar ranga uamulam. Alam e ka mem a tohats a tson te ka ria teka ti hamana uu iasa i matana e Sunahan.

²⁴ Alö gona piou raien ba limiou te la hobotomiou tara Luman Lotu Pan batena haröto nem tego matskö uaiam limiou tara Lo turu Jiu. Na lö go hol has beraien, ba nori te kobana ba ner u hulu i bakuren. Ba u katuun hoboto te atei sile riou u mamana u ranga ti ranga sil mei lö u katuun ema mana nei. Nori e atei sile riou alö te kukutem a man Lo tere Mosis.

²⁵ Na alam u hala hakapa nela u pas turu katuun tema Jiu ri te hamana ria tere Iesu. U pas teka e hatei nena u haniga i tamulam tegi kato menaien a tohats puku a ka: nori egi agonein a ka te haats ba naria turu kesa, na nori egi agonein u rahatsing, na nori egi agonein a ka te kepa hamate naria i totongolonen na nori egi ma tsikolo ii.”

²⁶ Be Pol e lu rena a pal tson, ba u hamahö ba nori e la hoboto uaier turu lotu. Na turu lotu teka nori ina tuol ia i matana pal kapan turu lotu turu Jiu me hamana uaier iasa tere Sunahan ti matskö uaien tara Lo turu Jiu. Be Pol e tasuna tara Luman Lotu Pan bena hatei nena u haats i taren e katoe rouen turu hatohitina u lan. U haats teka e haröto nanou u raranga i taren e manana.

Nori i pile kapiin e Pol i Luman Lotu Pan

²⁷ Te katsin kapaia u tohit u lan teka, ba u Jiur i han i Eisia e röte ria e Pol i Luman Lotu Pan. Ba nori e kato haraharaha rer u katuun hoboto be pile kap ner e Pol.

²⁸ Ba nori e ku hapanir me poeier, “U katunura i Israel, mi taguhu ramou lam! Nonei lasi a tson teka te hatuts rena u katuun tara man han hoboto tegi tori tsuga ba menai u katunura i Israel a Lo tere Mosis na Luman Lotu Pan teka. Na tana ka lel has, nonei e piou hasir u katuun tema Jiu ri iahana Luman Lotu Pan ba nonei e kato habahi hakapena a makum a Göagono teka!”

²⁹ Taraha nori i tara mami e Tropimas a toun Epesis me tara gono merien e Pol iahana taun, ba nori i poeier e Pol e la gono meien i Luman Lotu Pan.

³⁰ Ba u katuun iahana taun e hiagetageta hobotor, ba nori e piata gögonor me pile kap ner e Pol me las halakasa ba narien a Luman Lotu Pan. Ba nori e hapili boroboro raier u tamana tara Luman Lotu Pan.

³¹ Pöata ti katsin atungeien e Pol, ba u töa u raranga e la uana tara tsunono tara Retsimen te poeiena u katuun hobotora i Jerusalem e hiagetagetar.

³² Ba tsunono e lu rena u soldia na palair u kepten ba nori e piata gala hobotor turu katuun. Ba pöata ti tareien a tsunono na u soldia, ba nori e hanöan singata ner e Pol.

³³ Ba tsunono turu soldia e lana tere Pol me pile kap nanen ba nonei e ranga merena u soldia i tanen tegi kits menien a huol a tsien. Ba nonei e rangatana, “Esi nonei teka, na ha te katoe lalen?”

³⁴ Ba u katuun e ku hobotor, ba palai e poeier a töa ka na palai e poeier a tana ka. U katuun i geta hapan koru, ba tsunono ema antunan hengo sabe nanei aha koru te butu lala. Ba nonei e ranga merena u katuun i tanen tegi lu menai e Pol i luman soldia.

³⁵ Pöata te tukuia e Pol turu tötö tara luma ba u soldia e söata tuner e Pol, taraha u katuun i tagala sil korui tegi lu menaien.

³⁶ U katuun i kukute raien bate kur, “Atung hamate iam!”

E Pol e ranga hatarareia turu katuun

³⁷ Pöata ti sukusukun tasu menai u soldia e Pol iahana luman soldia, ba nonei e poeiena tara tsunono turu soldia, “Alia e ka megu a tsi ranga i tamölö.” Ba tsunono e poeiena, “Alö e hahatongon ranga uaiem turu HaGrik?

³⁸ Alia e pei lasegu alö a toun Itsip tu kato haraharaher u katuun me las mera nei u 4,000 u tsonun hihipuli me la mera neien tara makum a palaka.”

³⁹ Be Pol e poeiena, “Alia a toun Jiu na tara taun i Tasus, a taun te panina tara provins i Silisia. Alö go haniga ba lia te ranga gia turu katuun.”

⁴⁰ Ba tsunono e hanigana be Pol e tuoluna turu tötö tara luma be hasoasei nena a limanen turu katuun. Ba u katuun e kakamotor be Pol e rangana i taren turu HaHibru.