Aposol 2 - U Bulunagana U Niga

U Namnamei u Göagono tere Sunahan e kouluma

¹ Pöata te butuma u Lan u Göagono ti ngöei u Pentikos, u katuun tere Iesu Kristo i ka hoboto ia tara töa makum.

² Ba töa a ka te olongo here mei u ualupu pan e songots butu nama i Kolö, memi saputu hobotena a iahana luma ti gumien.

³ Ba nori e tareier a ka te here ii u kulupu na te here ii u mia e la kalakalana mena tö ria i bakuna man tötöa man katuun hoboto.

⁴ Ba nori e saputu hoboto meier u Namnamei u Göagono tere Sunahan, te haranga raien na te hala raien a niatei na nitagala tegi antunan ranga uaien tara man taina man ranga.

⁵ U Jiu u para koru ti kamei u nihamana u kapan koru turu han hoboto ti kaia i Jerusalem tara pöata teka.

⁶ Ba pöata ti getaia u katunun tsitsilo, ba u katuun u parpara e piata hoboto ruma me asingoto koru ner ti hengo menaien ti ranga uaien tara man ranga hoboto i taren.

⁷ Ba nori e asingoto korur me rangatar, “Alia e poeiegu u katuun te rangar a tei Galili.

⁸ Ga e hana bara man tötöa te hengoera a man ranga i tarara?

⁹ Ara u katununa tara man provins i Patia na i Midia na i Ilam na i Mesapotemia na i Judia na i Kapadosia na i Pontas na i Eisia.

^10-11 Na i Pritsia na i Pampilia na i Itsip na tara man makum i Libia te sukusuku uana i Sairini. Na palair u katunura i Rom, u Jiu hamana na pala halhal ti lu hasi u lotu turu Jiu, na palair u katunura i Krit na i Arebia. Ara hoboto e hengo raren ba nori te ranga ria turu mar ranga i tarara bate hatei ner a man toukui pan te katoe e Sunahan!”

¹² Ba nori e asingoto hobotor me lagi hakhakatsir me hia rangrangatar, “Aha nonei koru te markato uana teka?”

¹³ Kaba palai i ranga hamatsingolo raien me poeier, “U katuun teka e tutu mer a uain.”

E Pita e ranga ia turu katuun

¹⁴ Kaba e Pita e tuol gono mer a maloto na töa a aposol me ranga hapanina me poeiena turu katuun, “U katunura i Judia na limiou hoboto te ka mia i Jerusalem, hengo mia i tar ba limiou te atei haniga miou.

¹⁵ Alam ema tutu memi a uain temar ranga ua milimiou, taraha a ka e bongbong noana.

¹⁶ E möa, a ka teka e ranga mam noani e Joel a propet tere Sunahan i manasa me poeiena:

¹⁷ ‘E Sunahan e poeiena, Tara pöata i murimuri te sukusukun kapa noa romana a pöata hoboto, alia e katoe gou a ka teka: Alia e hala nagou u Namnamei i tar turu katuun hoboto. A galapien tson i tamilimiou na galapien touhaliou has ena ranga nariou romana u rangan propet. U hitots i tamilimiou ena tare riou a man hiharöto, na u tsonpan ena sinasohe riou a man sinasoho.

¹⁸ E manana. Na tara man tsonun kukui puku na touhalioun kukui puku has alia e hala nagou u Namnamei i tar, ba nori tena ranga nariou u rangan propet.

¹⁹ Na lia te haröto nagou a man hiharöto iasa i kolö na manka te butu noua i puta turu tsiktsiki u rahatsing na u tula na u ruhu pan.

²⁰ I mam te butu noua u Lan u kapan koru tara Tsunono a pitala e kuhil nou na tsihou e rörö here noi u rahatsing.

²¹ A Tsunono e taguhu ranou u katuun te singo uaier i tanen, ba nori tema tatei omi roi.’” E Sunahan e mar ranga uu teka.

²² “Alimiou u katunura i Israel, hengoeiam u raranga i tar. E Iesu na i Nasaret nonei a katuun te hopö kapiin e Sunahan. Na e Sunahan e haleien a nitagala ba nonei te katoeiena a man mirakol pan i matamilimiou, na manka teka e harötein te mana uana e Iesu. Alimiou e atei sile miou a ka teka, taraha nonei e butuia tara han teka.

²³ A katuun teka i hala rai limiou, e kukute noahasena a man hakats tere Sunahan te kato mam noahaseien i manasa, ba limiou e kato hamatie men, taraha alimiou u tagala sileiam u katuun u omi gi nila naien tara kuruse.

²⁴ Kaba e Sunahan e hatakei poutseien tara tou mate i tanen. E Sunahan e purese banai e Iesu a kits tara tou mate i tanen, taraha a tou mate ema antuna korui tega pile kap menaien e Iesu.

²⁵ E tuburara e Devit e rangein e Iesu i manasa me poeiena tere Sunahan: ‘Alia u tara nitöani a Tsunono i matar. Nonei e kana tara pal matou i tar ba lia tema tatei matout gi.

²⁶ A torir e sasaalana na u raranga i tar e haröto nena a nisasaala i tar. Na peisar e hahanei nitöa sile nou a tou takei pouts.

²⁷ Taraha, alö ema laba namoi u namnamei i tar bate kakana tara makum turu mate. E möa. Alö ema haniga namoi tego koreme uu a tsomi i tamölö. E möa.

²⁸ Alö u haröte ii lia a maroro te la uana tara nitöatöa. Na lö e kato hasasaala korue mou lia, taraha alö e ka gono memou lia.’ E Devit temar ranga uu teka.”

²⁹ E Pita e ranga lel me poeiena, “A matsi hahatoulana i tar, alia e ranga halesala negu e Devit a King i tarara na i manasa e mate hakapa ba nori e honge ren tara kiou, na kioun mate i tanen e ka noa hasina i romana.

³⁰ Nonei a propet, na nonei e atei sil e Sunahan e haleien u raranga te mana uu iasa. E Sunahan e ranga hatagala hamana mam noani tega hatuol menaien ta töa tara hun katuun tere Devit turu gumgum u kapan.

³¹ E Devit e atei sil a ka teka ba nonei e ranga mam nena e Mesaia a katuun te hopö kapiin e Sunahan. Ba nonei e poeiena, e Mesaia ega takei poutsia tara tou mate i tanen. E markato uana teka, ‘E Sunahan ema laba naien ba nonei te kakana tara makum turu katuun ti mate. E möa. A tuenrei nen ema koreme ii.’

³² Nonei e Iesu teka e Sunahan e hatakei poutseien, na alam u tara hoboteien ba lam te habulungana namen.

³³ Na nonei e la hakapa uu iasa mena gumna i rehina e Sunahan, be Sunahan e hale neien u Namnamei u Göagono te ranga mam naien i manasa. Na, a ka te tare milimiou na te hengoe milimiou nonei u Namnamei teka te hala rameien lam.

^34-35 E Devit ema la sei uai i Kolö, kaba nonei e pei, ‘A Tsunono e pei tara Tsunono i tar: Gum ia tara pal matou i tar, e antunana tara pöata te kato ragoua lia u pakö i tamölö u kaan tötö i tamölö.’

³⁶ “Bora, hatei raiam a tei Israel: E Sunahan e katoeien a Tsunono na Mesaia, nonei e Iesu a katuun ti hahalosi ra ti nila namia limiou tara kuruse.”

³⁷ Pöata ti hengoeia u katuun u raranga teka, ba nori e toku korur be ranga meier e Pita na u palair u aposol me poeier, “A matsi hahatoulana, aha tego kati lam?”

³⁸ Be Pita e poeiena i taren, “Hapolasa ba neiam a man markato a man omi na man hakats a man omi i tamilimiou ba limiou tena habaptais mia tara solona e Iesu Kristo ba man markato a man omi i tamilimiou te luba nariou ba limiou te lue miou u Namnamei u Göagono i tanen.

³⁹ U Bulungana u Niga teka e la uana i tamilimiou na tara galapien has i tamilimiou i murimuri. Na nonei e la has uana turu katuun hoboto te ka ria turu han i lehana na turu katuun hoboto te ngö rena e Sunahan.”

⁴⁰ Be Pita e hatei has raneien u raranga u parpara lel me ranga hataatagina i taren me poeiena, “Haneiam! Alimiou e namots lu hase miou a nihahuna te la uanama turu katunura i romana.”

⁴¹ U katuun ti hengoe u ranga i tanen bate sasaala meren i baptaisir. E sukusukuia turu 3,000 turu katuun ti baptaisir nonei turu lan teka temi hahonoto gono mer u katunun tsitsilo.

⁴² Nori i ha hengo hanigan töaia turu hihatuts turu aposol bate singo gono meraren tere Sunahan, na nori i nou gono has mer u aposol.

U katuun ti hamana i ka haniga hoboto

⁴³ Ba u aposol e katoeier u mirakol u parpara, ba u katuun e matout korur.

⁴⁴ U katuun ti hamana i ka hoboto bate hiamolamola ner a mamanaka i taren.

⁴⁵ Nori i haholin a manka i taren bate molamola naier a moni turu katuun hoboto ti möa ta moni.

⁴⁶ Turu mamana u lan nori i la hoboto uu tara Luman Lotu Pan tina singo hoboto uaien na nori i nou hoboto mei u hakats u niga na nisasaala pan.

⁴⁷ Nori i solosei nitöani e Sunahan bate ka mer a niniganiga turu katuun ti ka hoboto meraien. Na turu mamana u lan a Tsunono e halasei susuli u hihase turu katuun u tsimus ti hamanaia tere Iesu Kristo.