Aposol 19 - U Bulunagana U Niga

E Pol e kui ia i Korin

¹ Tara pöata te kaia e Apolos tara taun i Korin, be Pol e silana tara makum te ka mei a man pokus ba nonei ena butuna i Epesis, tena sabe raien a palair u kristen.

² Ba nonei e rangata ranen, “Alimiou u lu haseiam u Namnamei u Göagono tara pöata tu tanian lueia limiou u nihamana turu kristen?” Ba nori e poeier, “E möa. Alam uma hengo has nai u Namnamei u Göagono.”

³ Be Pol e rangata lel ranen, “Ga saha mar baptais tu lueiam limiou?” Ba nori e poeier, “Alam u lui a baptais tere Jon.”

⁴ Be Pol e poeiena, “Pöata te baptais raia e Jon u katuun ba nonei e poeiena, ‘Habirits ba naiam a man markato a man omi i tamilimiou.’ Ba nonei e hatei raneien tegi hamana uaien tara katuun te kute nama i tanen, nonei e Iesu.”

⁵ Pöata ti hengoeien u raranga teka ba nori e töan habaptais ria tara solona e Iesu a Tsunono.

⁶ Pöata te hatakopeia e Pol a limanen ieluren, ba u Namnamei u Göagono e koul uanama i taren. Ba nori e ranga ria turu mamana u mar ranga, me ranga ner a manka te butu moto nou.

⁷ Toum romana a maloto na huol a katuun te habaptais nonei tara pöata.

⁸ Be Pol e tasu uana iahana luman lotu turu Jiu, ba tara topisa a tsihou, nonei e rangan töa lasiin u Bulungana u Niga. Nonei e ranga hatagala meraien me torohanan hatakeiena u hakhakats u niga i taren tara Nipepeito tere Sunahan.

⁹ Kaba a palai i hipus naien batema hamanari me ranga homi hasner a Maroro tara Tsunono i matar u katuun. Be Pol e lurena u kristen me la gono mera nen, na turu mamana u lan nonei e hatei naia u raranga iahana luman skul tere Tiranas.

¹⁰ U raranga teka e la me antunena u huol u hiningal. U katuun hoboto u Jiu na u katunura i Grik ti kaia tara provins i Eisia i hengo hoboti u raranga tara Tsunono.

A galapien tson tere Siva

¹¹ E Sunahan e hatakui sila naia u mamana u mar mirakol tere Pol.

¹² U hangitsip tsi u labalaba te sebeli a tuenreina e Pol i söata menai turu katuun ti siki ba man siki taren te laba ranen, na u liliahanei u omi i koul ba hasir u katuun bate lar.

¹³ Ba palair u Jiu e torohanan kato haser a mar toukui teka me poeier a solona e Iesu a Tsunono tegi hakoul meraien u liliahanei u omi turu katuun. Na nori a man töa i roron ranga u teka, “Alia e ranga hatagala koru megou lö tara solona e Iesu te roron ranga nena e Pol, koul ban!”

¹⁴ U tohit u munmun toulana ti kato a markato teka nori a galapien tson tara töa pris pan turu Jiu a solonen e Siva.

¹⁵ Kaba töa liliahanei a omi e ranga palis raien me poeiena, “Alia e atei silegu e Iesu na e Pol e ka mer a nitagala, kaba lia ema atei sil ragi limiou!”

¹⁶ Ba katuun te ka mei a liliahanei a omi e kurapa uana i taren be atung ranen me tagala saluhe ranen me kato hohomi koru rena a peisaren me kiis kaakata ba raneien a man hasobö i taren. Ba nori e bus ba ner a luma teka me la mer a beloso.

¹⁷ Ba u Jiu na u Grik hoboto ti kaia i Epesis e hengo ner a ka teka, ba nimatout a kapan e butuna turu katuun hoboto, ba nori e soloseier e Iesu a Tsunono.

¹⁸ U katuun u parpara koru ti hamana i lama memi pokeier a mamana a markato a omi ti katoeien i manasa.

¹⁹ Na para koru a katuun ti roron katoe u matuna na hirakö i gono hoboti a man bukun matuna na hirakö i taren me haatse ria turu tula i matar u katuun hoboto. Ba nori e aser a hihol tara buku hoboto teka me antunana tara 50,000 a makumun silva.

²⁰ Tara markato teka, ba u raranga tara Tsunono e sata uana tara han a parpara me tagala saluhena.

A tei Epesis i ku homin e Pol

²¹ Na i murina a manka teka, ba u Namnamei tere Sunahan e haleie nei e Pol u hakats tega la uaien tara provins i Masedonia na i Gris, bate la hamurimuri uana i Jerusalem. Be Pol e poeiena, “I murina tena tare goua lia a man han teka, balia tena tara hase gou i Rom.”

²² Ba nonei e tula rena a huol a katunun hitaguhu i tanen, ere Timoti mere Irastas, ba nori e la mam uaier i Masedonia. E Pol e gamon ka noa buia tara provins i Eisia.

²³ Tara pöata teka a nomi pan e butuia i Epesis tima ngil menai u katuun a Maroro tara Tsunono.

²⁴ E Demitrias e kukuiei a manka a silva. Nonei e roron kui tatateie a matsi makumun silva a mankan lotu ti hakeia tara luman lotu pan tere Atemis, a got gamogamo a tetahol ti roron hatsunono uu katunura i Epesis. E Demitrias e roron habuti a toukuin hahol a para turu katunun kui i tanen.

²⁵ Nonei e goner u katuun teka ti kamei a töa mar toukui me poeiena, “A pal tson, alimiou e atei sil hasemiou a toukuin hahol teka e roron habutena a moni i tarara.

²⁶ Na katuun teka e Pol e habirits hakapi u hakats tara katuun a parpara be poeiena, ‘U kesa te kuieri ualima ema got hamanari.’ Alimiou u tare men na limiou u hengo hakapa hase men. Nonei ema markato peisa uai teka i Epesis. E möa. Nonei e kato hasema a man ranga teka tara han a parpara koru iahana provins teka i Eisia.

²⁷ U raranga tara katuun teka e namots kato homiena a solo tara toukui i tarara. Na tana ka lel, u raranga i tanen e namots kato homi hasena a solo tara luman lotu pan tara got a tetahol e Atemis, bate here nei a ka pinopino turu hakats turu katuun. U katunura i Eisia hoboto na u katuun tara han hoboto e roron hatsunoner a got a tetahol teka. Kaba u raranga tara katuun teka e Pol, e katsin kato hataia tsiponena a nikapan i tanen.” E Demitrias e mar ranga uu teka.

²⁸ Pöata ti hengoeien u raranga teka ba nori e raharaha korur. Ba nori e kur me poeier, “E Atemis a tetahol i tarara u katunura i Epesis te pan koruna!”

²⁹ Ba u katuun hobotora i Epesis e hiagetagetar. Nori i takei hoboto me piata uaier tara makumun hagum. Ba nori e las raier ere Gaius mere Aristakus be la gono mera ren. Nori a huol a katununa i Masedonia ti roron lala gono mei e Pol.

³⁰ E Pol e ngilin la uu i gusur u katuun, kaba u kristen i hapiou naien.

³¹ Na palai hasir u gamman ni Eisia a man hahikapien tere Pol, nori i hala has nema u raranga i tanen bate ranga hatagala meren tegoma tatei la uaien iahana makumun hagum.

³² U hagum teka ema niga lel ii, a palai i ku ni u tan u mar ranga, na palai i ku ni u tana lel has u mar raranga. Na para koru a katuun ema atei sile ii a mouna a ka timi gono sileien.

³³ Ba u Jiu e tula menari e Aleksenda i hagus, ba palair u katuun e ku siler tego kato menien u ranga. Be Aleksenda e hasoasei nena a limanen tegi kakamoto uaien ba nonei te ranga palisena u ranga i taren.

³⁴ Kaba ti tara mareien nonei a Jiu, ba nori e totou ku hobotor me poeier, “E Atemis a tetahol i tarara u katunura i Epesis te pan koruna!” Nori i mar ku las uu teka e antunaia tara huol a aua.

³⁵ Ba töa katuun pan ni Epesis e kato hakakamoto rena u katuun me poeiena, “Ara u katunura i Epesis, u katuun hoboto e atei siler i Epesis nonei a taun te tara kap nena a luman lotu tara tetahol pan e Atemis, na taun has tara hatu a göagono te rusma i Kolö.

³⁶ Möa koru ta katuun tega hipusin u raranga teka. Alimiou go kakamotoiam ba tema katoemi ta töa ta ka ta omi.

³⁷ Alimiou ti lu remuma a huol a katuun teka, kaba nori ima kope ii ta ka tara luman lotu. Na nori ima ranga hahakos has nai a got a tetahol i tarara.

³⁸ Te ngilin kout mena e Demitrias na u katunun kui i tanen a töa katuun, e ka mena a pöatan kout. Na gamman e ka hasina. Nori egi hamatsköeia u ranga i taren turu kout.

³⁹ Na te ka lel memia limiou tu taina tu ranga, ba limiou te hamatsköe mien romana tara pöatan hagum.

⁴⁰ Ara ena mots lueier ta niomi tara hiagetageta teka, ara i möa ta ka tegi rangein te hatei nanou a hiagetageta te kato lala.”

⁴¹ Pöata temar ranga hakapa uu a kapan teka, ba nonei e tula kalakala rena u katuun ba u hagum e tarurana.