Aposol 16 - U Bulunagana U Niga

E Timoti e la gono mer ere Pol mere Sailas

¹ Ere Pol mere Sailas i la mam uu tara taun i Debi be la lelir i Listra te kaia a töa kristen a hitots, a solonen e Timoti. E tsinanen a toun Jiu, nonei a kristen has kaba e tamanen a toun Grik.

² U kristenira i Listra na i Aikoniam i hamana korui a markato tere Timoti me poeier, “Nonei a katuun a niga.”

³ Pol e ngil korui e Timoti ga la gono meien. Ba nonei e lue nen me hapö nanen, taraha, u Jiu hoboto ti kaia tara han teka i atei sil e tamane Timoti a toun Grik. A tei Grik ima kukute ii a markato te hapö uaier ti tagala mei u Jiu.

⁴ Pöata ti tataala ien tara man taun teka nori i hateirai u kristen u raranga ti kitseia u aposol na pal kapan i Jerusalem bate poeier, “Alimiou go kukuteiam a ka teka.”

⁵ Ba u nihamana turu kristen e butu hatagala koruna, na u hihase i taren e butu hapan susul turu mamana u lan.

E Pol e tari a katununa i Masedonia

⁶ Nori i silaia i gusuna a provins i Prigia na i Galesia. U Namnamei u Göagono e hatei raien tegima tatei hihatuts menaien u raranga tere Sunahan tara han i Eisia.

⁷ Pöata tina butuien i Misia, ba nori e torohanan katsin la uaier iahana a provins i Bitenia. Kaba u Namnamei tere Iesu e hatu kap raien.

⁸ Ba nori e la karasa ba ner i Misia me la uaier tara taun i Troas.

⁹ Tara bong be Pol e tarena u töa u hiharöto. A töa tsonuna i Masedonia e tuol me poeiena i tanen, “Alö go aroho uama i Masedonia batemi taguhu ramou lam!”

¹⁰ Pöata te tara hakapeien u hiharöto, ba lam e haseseim me torohanan lauaiem tara provins i Masedonia, taraha alam u atei sil e Sunahan e ngö sil rai lam tegona polasa menai lam u Bulungana u Niga turu katuun tara han teka.

E Lidia e hamanaia tere Iesu

¹¹ Ba lam ena osa mia tara tolaala be laba nem a taun i Troas me aroho hamatskö uaiem tara tolo i Samotres. Ba u hamahö ba lam e la sokö uaiem tara taun i Niapolis.

¹² Alam u laban i Niapolis be kete uaiem tara taun i Pilipai, a han pan tara provins i Masedonia, a han has turu katunura i Rom. Ba lam e gamon ka bumia i Pilipai.

¹³ Turu Lan u Göagono turu Jiu, ba lam e lakasa uam ielesala tara taun i rehina ramun olo tu peia lam te kaia a makum ti roron singoia u Jiu. Ba lam e gumum me raranga gono merem a touhaliou ti gono hakapaia nonei tara makum.

¹⁴ A töa tahol a solonen e Lidia e kaia i gusura a touhaliou ti hengoia i tamulam. Nonei a taholuna tara taun i Taiataira na nonei e roron haholin u labalaba a hihol i tanen te la sei. Nonei e roron hatsunoni e Sunahan, ba Tsunono e kalatena a torinen ba nonei e hanige iena u raranga tere Pol.

¹⁵ Ba nonei na u katuun ti sösohoia i luma i tanen e habaptaisir. Ba nonei a tahol e ranga hataatagina me poeiena, “Te atei sile mia limiou alia e hamana hatagala koru uagu tara Tsunono, ba limiou temi ka bumia i luma i tar.” Ba nonei e tagala sil koru ranou lam ba lam e lam i luma i tanen.

Ere Pol mere Sailas i kaia tara karabus i Pilipai

¹⁶ Turu töa u lan alam u la uu tara makum ti roron singoia, be tupalem a taholun kukui puku te ka mei a masaloho te hatein a manka tena la nama. A tahol teka e harangi a töa liliahanei a omi, ba nonei e lu bera nei u katuun ti hakuie ien a pan nen a moni.

¹⁷ Pöata te kukuteien e Pol na lam, nonei e ku nitöani, “A pal tson teka u katunun kui tere Sunahan iasa koru. Nori e haröto rari limiou a maroro te lu sila namia limiou a nihitaguhu tere Sunahan.”

¹⁸ A tahol teka e kato nitöa las uu teka turu mamana u lan. E Pol e sökana koru mei te rangan töa uu a tahol ba nonei e habiritsina me poeiena tara liliahanei, “Alia e ranga megou lö tara solona e Iesu Kristo, alö go koul ban a tahol teka.” Ba nonei tara tsi pöata puku has ba liliahanei e laba nanen.

¹⁹ U katuun ti hakui a tahol teka i atei sil a ka ti lulueien a moni e kapa tala. Ba nori ena las boroboro raier ere Pol mere Sailas me las tsibil me rarien tara makumun töana i matar a pal kapan.

²⁰ Ba nori ena piou rarien turu katuun tara gamman me poeier, “A pal tson teka u Jiu, nori emi kato homier a taun i tarara.

²¹ Nori emi hihatuts has ner a markato te hapiou nena a lo i tarara. Ara ema tatei hanige rei a ka teka, taraha ara a tei Rom.”

²² Ba u katuun e hatangana hoboto ner u ranga teka. Ba gamman e hatangana hasir ba u katuun i taren e kiis kata ba ner u hasobö tere Pol mere Sailas, ba nori e singata rarien a pata.

²³ I murina ti singata hohomi koru rarien ba nori ena lapo ba rarien tara luman karabus. Me poeier tara tson pepeito kap tara luman karabus, “Pepeito kap haniger a huol a katuun teka.”

²⁴ Tara pöata te hengoeien u ranga teka, ba nonei e haka ranen tara töa rum iogana nitöa me hakits kap ranei a man mouren a makumun ruei a tiama.

²⁵ Tara gusuna bong bere Pol mere Sailas e singo uaier tere Sunahan me soloseieren turu köman lotu, a palair u karabus i hehengoia ti köma uaien.

²⁶ Ba töa nun a pannen koru e songots butuna me gas hapanena a luman karabus me tagas hanöa nitöa nama i kopina u tul tara luma. Ba man tamana hoboto e takalatar, na u tsien i tapurese ba hasir a mour u karabus me rusur.

²⁷ Ba tson pepeito kap e supakatana me tagulena. Ba pöata te tareien u tamana i takalata hakapa, ba nonei e lousena u kilatan hiatatung i tanen me katsin ngats hamate iena a peisanen, taraha nonei e pei u karabus i bus hakapa.

²⁸ Be Pol e ku hapan koruna me poeiena, “Möa tu ngatsi a peisamölö! Alam hoboto e kam!”

²⁹ Ba tson pepeito kap e ngö silena tu alesala me piata tasuna mena tuhatukun nena i matana ere Pol mere Sailas, bate toltololo tala mena a nimatout.

³⁰ Ba nonei e las mera neien i biou me poeiena, “A matsi tsunono, aha tego kati lia balia te luegou a nihitaguhu tere Sunahan?”

³¹ Ba nori e poeier, “Hamana uu tara Tsunono e Iesu, balö te lueiem a nihitaguhu tere Sunahan, na pal katuun has i tamölö.”

³² Ba nori e hatei rien u raranga tere Sunahan na u katuun hoboto has ti kaia i luma tanen.

³³ Ba nonei noahas tara bong teka ba tson pepeito kap e lu rena ere Pol mere Sailas me galus rena a man takiraha i taren. Ba nonei na u katuun hoboto i tanen e lu sokön töa ner a baptais.

³⁴ Ba nonei e lu rena ere Pol mere Sailas mena sei ria i luma i tanen, ba nonei e hanou ranen. Nonei na pala hoboto i tanen i sasaala koru mei ti hamana uaien tere Sunahan.

³⁵ Tara bongbong ba gamman e tula ranama u polis, nonei e hatei rema u polis me poeiena, “Halakasa raiam u katuun teka.”

³⁶ Ba tson pepeito kap ena hatei rena ere Pol mere Sailas me poeiena, “A gamman e hala nenama u ranga te poeiena, alimiou mere Sailas egi halakasa raiou. Bara! Lakasa tala muma, a masalohana e tatei la gono mera noulimiou.”

³⁷ Be Pol e poeiena turu polis, “Nori i ma kout hamatskö merai lam na nori i singata railam a pata i matar u katuun. Alam has u katunura i Rom, kaba nori i haka has raia lam tara karabus. Nori e katsin halakasa hamous rariou lam. E möa koru! Nori peisa egi lama batemi halakasa rariou lam!”

³⁸ Ba u polis ena hatei ner u raranga teka tara gamman. Pöata ti hengo naien ere Pol mere Sailas u katunura i Rom, ba nori e matout korur.

³⁹ Ba nori ena ranga hataatagi koru ria i taren ba nori e lakasa gono mera ren tara luman karabus be tahul raren egi laban a taun.

⁴⁰ Bere Pol mere Sailas e laba ner a luman karabus me lauaier i luma tere Lidia, ba nori ena tara raier u katuun ti hamanaia tere Iesu. Ba nori e ranga gono mera ren me kato hatagaler u nihamana i taren, ba nori e töan lar.