Aposol 15 - U Bulunagana U Niga

¹ A palair u katunura i Judia i la uama i Antiok memi hatuts raier u kristen me poeier, “Tema kukute moi limiou a markato tere Mosis ba tema hapö mi, e Sunahan ema taguhu ranoui limiou.”

² Pöata timar ranga uu katuun teka, be Pol mere Banabas e hia raharaha gono me raren. Ba u kristen e hatuol raier ere Pol mere Banabas na palair u katuun has tegi la uaien i Jerusalem mena hamatskö gono merari u aposol na pal kapan turu kristen lotu u raranga teka.

U hagum u kapan turu kristen te butuia i Jerusalem

³ Ba u kristen e tula merarien i Jerusalem ba nori e sila ria i gusuna i Pinisia na i Samaria. U kristen tara huol a han teka i sasaala koru mei ti hatei meraien, e Sunahan e habiritsir a torir u katuun tema Jiu ri.

⁴ Pöata tina tukuien i Jerusalem, u aposol na pal kapan na palair u kristen i sasaala koru meraien be Pol mere Banabas e hatei rarien a mamanaka te kato gono meraien e Sunahan.

⁵ Kaba a palair u kristen tara pala turu Parasi i takei me poeier, “U katuun tema Jiu ri egi hapö bate kukutier a Lo tere Mosis.”

⁶ Ba u aposol na pal kapan e gono siler tegi hamatskö menaien u ranga teka.

⁷ Nori i solon gum a pöata a ngahangaha be Pita e tuoluna me poeiena i taren, “A matsi hatoulana, alimiou e atei silemiou i manasa e Sunahan e mola raira a toukui. Na nonei e hopö kap naiou lia tego hatei menai lia u Bulungana u Niga tara pala tema Jiu ri, ba nori te tatei hengor bate hamanar.

⁸ E Sunahan e atei silena a torir u katuun hoboto, bate haröto ranei ra nonei e haniga has rena a pala tema Jiu ri. Nonei e hala raneien u Namnamei u Göagono i tanen, e kato has uana temar hala mera neien ra.

⁹ Kaba nonei ema katoe ii a tabina markato i tarara na tabina markato i taren. E möa. Nori i hamanaia i tanen, na tara markato lasi teka te luba meien a markato a omi i taren.

¹⁰ Alimiou e namots torohanan kato haraharahemiou e Sunahan tego haka mena milimiou a markato a tiama teka turu kristen. I manasa u tuburara na ra has ima antunan söate ii a mar nitiama teka.

¹¹ Ara e mar hamana las uara teka: e Sunahan e lu pouts ranou ra tara nihitaguhu tere Iesu a Tsunono, markato has uana te lu pouts mera neien u katuun teka.”

¹² Ba u hagum e gumuna me hahengona turu raranga tere Banabas mere Pol ti hahatei menaien u mamana u mirakol te kato sila nai e Sunahan i taren i gusuna u katuun tema Jiu ri.

¹³ Pöata ti ranga hakapaien, be Jemis e poeiena, “A matsi hahatoulana, hengo bumia i tar.

¹⁴ E Saimon e ranga hakapa mera lo limiou me hatei nena temar la tutuun uama e Sunahan turu katuun tema Jiu ri, memi hopö kap bera neien a peisanen i gusura u katuun.

¹⁵ U ranga teka e matskö gono mena u raranga turu propet timar koloto uaien:

¹⁶ ‘I murimuri alia ena la pouts guma romana, ba lia temi kato haniga pouts ragou a pala tere Devit, e here nei a luma te omi ba katuun temi kui hatsimus poutse nen.

¹⁷ Ba u katuun halhal te tatei sake hase riou a Tsunono, u katuun has tema Jiu ri te opö kap mer a solor.

¹⁸ A Tsunono e mar ranga uu teka, nonei te habuti u raranga teka i manasa koru.’ “U propet timar koloto uu teka.

¹⁹ “Bora: aragi ma tatei kato homi rai u katuun tema Jiu ri te habirits menarien a toriren tere Sunahan.

²⁰ Aragi koloto uu i taren, bate hatei rarien nori egi agonein a mamanaka te haats ba naria turu kesa na nori gima tsikolo ii. Ba nori tema tatei noueri a haröete te kepa hamate naria i totongolo nen, na egima tatei nou hase ii u rahatsing.

²¹ Taraha, i manasa na te la noahasina i romana, u katuun te hahatei ner u raranga tere Mosis e ka ria turu taun hoboto. Na nori i roron habulunganein u raranga i tanen iahana u luman lotu turu Jiu turu mamana u lanin lotu i taren.” E Jemis temar ranga uu teka.

Nori i hala menai u pas turu kristen tema Jiu ri

²² Ba u aposol na pal kapan na palair u kristen hoboto e kitseier u ranga ba nori e hopö kap naier a huol katuun i taren, tego la gono mer ere Banabas mere Pol i Antiok. Nori i halani ere Judas (a tana solo i tanen e Basabas) mere Sailas u tson mammam has turu kristen.

²³ Nori i hala gono meraien u pas temar ranga uu teka: “Alam u aposol na pal kapan, alam a töa pala has i tamilimiou te hamana uaiem tere Iesu. Alam e koloto menami u pas teka i tamilimiou a matsi hahatoulana tu tuhana ma tara pala tema Jiu ri, te ka mia tara taun i Antiok na tara provins i Siria na i Silisia.

²⁴ “Alam u hengoen a palair u katuun i tamulam ina hasingoto koru merai limiou a man raranga i taren. Ba nori e kato hatutueier u hakats i tamilimiou. Kaba alam uma ranga mera leien tegina markato uaien teka. E möa.

²⁵ Alam u hengo u ranga teka ba lam e ka mem u töa u tori me kitsem u raranga tego hopö kap menai a huol katuun bate hala mera muleien i tamilimiou, nori mera taina huol a katuun te ngil koru remuma lam, ere Banabas mere Pol.

²⁶ E Judas ne Sailas i roron solosei e Iesu Kristo a Tsunono i tarara, na ima matoute ii ti katsin puli meraien u katuun.

²⁷ Alam e hala rem ere Judas mere Sailas. Nori tena hatei peisa rariou limiou u töa noahas u mar raranga te kana turu pas teka.

^28-29 U Namnamei u Göagono na lam u mar kits menai u raranga teka: alam ema tatei hakeiemi a markato a tiama koru i tamilimiou. A man markato lasi teka tegoma katoe milimiou: alimiou go agono naiam a manka te haats ba naria turu kesa, batema tatei nou hasemi u rahatsing na haröete te kepa hamate naria i totongolonen. Na limiou goma tatei tsikolomi. Te hatalis ba nemia limiou a man markato teka, ba limiou te ka haniga mou. Nonei talasi.” U pas e mar ranga uana teka.

³⁰ Ba u kristen e tula raren ba nori e la uaier i Antiok. Nori i goner u kristenira i Antiok ba nori e hala rarien u pas teka.

³¹ Ba nori e tara hakape ren me sasaala koru mer u raranga te kaia turu pas teka.

³² Ere Judas mere Sailas nori has u propet i hala rai u kristen u raranga u niga u parpara te kato hatagali a toriren.

³³ A huol a katuun teka i gamon kaia i Antiok, bu kristen e hala pouts rarien a masalohana. Nori i hala pouts mera leien turu katuun ti hala ramen.

³⁴ Kaba e Sailas e kaka poutsia i Antiok.

³⁵ E Pol mere Banabas i ka hasia i Antiok. Nori i kui gono mer a palair u katuun u para ti hatuts meraien u katuun na ti hatei menaien u Bulungana u Niga tara Tsunono.

Ere Pol mere Banabas i la kalakala

³⁶ U lahisa u lan e la hakapa, be Pol e ranga mena e Banabas me poeiena, “Aragi la pouts batena tara raiera u kristen tara mamana taun ti hatei mam ramei ra u raranga tara Tsunono. Ba ra tena tarera ime te marka uaren.”

³⁷ E Banabas e katsin peigi hasi e Jon ti ngö hase ii e Mak.

³⁸ Kaba e Pol ema ngilin la gono mei a katuun te laba namen i Pampilia na tema la gono meraien tara man toukui.

³⁹ A hiaraharaha taren e tagala koru ba nori e hialala kalakalar be Banabas e peigeiena e Mak be na osa ria tara tolaala me lauaier tara tolo i Saiprus.

⁴⁰ Kaba e Pol e lui e Sailas, ba u kristen e poeier, “A niniganiga tara Tsunono e tatei la gono mera noulimiou.”

⁴¹ Ba nori e sila ria tara provins i Siria na i Silisia, mena hatagala raier u kristen tara man makum teka.