Aposol 14 - U Bulunagana U Niga

U aposol i kui ia i Aikoniam

¹ A markato teka e takato has ia tara taun i Aikoniam, e Pol mere Banabas i tasu ia tara luman lotu turu Jiu me hatei ner u ranga. Nori i hatein u raranga u niga ba u katuun u parpara turu Jiu na turu Grik e hamanar.

² Kaba palair u Jiu i ma hamana ii, ba nori e hatakeier a hiaraharaha turu katuun tema Jiu ri, ba nori e tori hasoala raren

³ Kaba e Pol mere Banabas i kei a pöata a ngahangaha i Aikoniam, na nori i tagala mei ti hatei menaien u raranga tara Tsunono. Ba Tsunono e hatagala ranen ba nori e katoeier u mamana u mirakol. Tara ka teka, a Tsunono e haröto raien u rangan hitaguhu i tanen e mana koru.

⁴ Kaba u katuun tara taun teka i lu kataia i hagus. A palai i hanigei u ranga turu Jiu, na palai i hanigei u raranga turu aposol.

⁵ Kaba u Jiu na u katuun tema Jiu ri na man tsunono i taren i katsin kato homir ere Pol mere Banabas na i katsin titi hatu has raien.

^6-7 Ere Pol mere Banabas i hengo sabeni a ka teka, ba nori e bus uaier tara provins i Likonia, na tara taun i Listra na i Debi, na tara man han te sukusukuia tara makum ti kaien, ti hatei la naien u Bulungana u Niga.

U aposol i kui ia i Listra

⁸ Tara taun i Listra a töa katuun a mou omi e gum. I posa noahas mei a mar niomi teka na nonei ema mala tataala ii.

⁹ Nonei e hahengoia turu raranga te katoe e Pol. Pol e tari a katuun teka e kamei a nihamana te antunaia tegi kato haniga pouts menaien.

¹⁰ Be Pol e tara tötose nen me ranga hapanina me poeiena i tanen, “Takei balö te tuol hamatskö nem a moumölö.” Ba nonei e kurapa takeina me hula tataalana.

¹¹ Pöata ti tareia u katuun u para koru a ka te katoi e Pol ba nori e ku hapan korur turu rangan HaLikonia me poeier, “U got e butun katuun hamanasa tala rima, bate koul uarima i tarara i puta!”

¹² E Banabas nori i ngöeien e Sius, na e Pol i ngöeien e Hermis, taraha e Pol a katunun raranga.

¹³ A luman lotu pan tere Sius e kaia i matana taun ielesala. Ba pris tara luman lotu pan teka e las ranama u bulmakau u tson na u palaua ti hil haperpereri. Ba nonei e la uanama tara tamana tara ololo tara taun. Nori emi ngilin katoei u haats tara huol a aposol.

¹⁴ Kaba a pöata te hengo naia e Banabas mere Pol u raranga tara ka teka, ba nori e kiiseier u hasobö i taren, e haröto nena te rama koru mena rien a markato teka. Ba nori e piata uar i gusur u katuun ba nori e kur,

¹⁵ “A matsi hahatoulana, aha te kato sile milimiou a ka teka! Alam u katuun tuun, e here has rami limiou. Alam emi piou namula u Bulungana u Niga ba limiou te hapolase miou a markato a tutu teka, bate habirits uamiou tere Sunahan te töatöana. Nonei te katoe u kolö na u puta nu tasi, na mamanaka te kana iaharen.

¹⁶ E manana, tara mamana man pöata i manasa u katuun i markato uu ti ngil uaien, na e Sunahan ema hapiou raien.

¹⁷ Kaba nonei e haröto has nena temar kato haniga uanen i tamilimiou. Nonei e roron hapolena a langits, na e hahua hanigeiena u kui i tamilimiou. Nonei e hala hantue nena a kannou i tamilimiou bate kato hasasaala has ranou limiou.”

¹⁸ U aposol i mastein mar ranga has uu teka kaba nori u katuun i hasoso sil noahasi tegina kato menaien u haats i taren.

¹⁹ Kaba a palair u Jiu turu taun i Antiok na i Aikoniam i lama, memi kato homier u hakats turu katuun. Ba nori e ti homi korueri e Pol u hatu, ba nori e las halakasa ba narien a taun. Nori i pei nonei e mate hakapa, ba nori e laba naren.

²⁰ Kaba u kristen emi gono hahiseien, ba nonei e takeina be tasu pouts uana iahana taun. Turu hamahö be Pol mere Banabas e lauaier tara taun i Debi.

U aposol i kopis pouts uu i Antiok tara provins i Siria

²¹ I murina ti hatei hakapa naien u Bulungana u Niga tara taun i Debi ti lu has raien u katunun tsitsilo u para tere Iesu. Ba nori e la sila pouts uaier tara man taun i Listra na i Aikoniam, na i Antiok te kana tara provins i Pisidia.

²² Ba nori e hatagala raier a torir u kristen me hala ner u rangan hitaguhu i taren tegi pile hatagala menaien u nihamana i taren tara Tsunono. E Pol mere Barabas i pei hasi, a maroro te lauana tara Nipepeito tere Sunahan e ka mena u hakats u tiama u parpara i tanen.

²³ Tara mamana taun i murina ti hopö kap hakapa raien u katunun pepeito kap i taren ti hamana uu tara Tsunono. Ba nori e agono ner a kannou me singo sil raren, me haka rarien tara nipepeito kap tara nitagala tara Tsunono tega tatei tara kap raien.

²⁴ Be Pol mere Banabas e la sila uaier tara provins i Pisidia me na tuku ria tara provins i Pampilia.

²⁵ Pöata ti hatei hakapa naien u raranga tara taun i Pega, ba nori e gala lel uaier tara taun i Atalia.

²⁶ Ba nori e osa ria tara tolaala me lauaier i Antiok na i Siria, a taun ti tanie men a toukui ti kato hakape men.

²⁷ Temi butu talaien i Antiok ba nori e gono hoboto raier u kristen, ba nori e hahatei naier a mamanaka hoboto te kato be raien e Sunahan, me poeier, “E Sunahan e kalati a maroro turu katuun tema Jiu ri, ba nori te hamanar.”

²⁸ Bere Pol mere Banabas e ka gono meraier u kristenira i Antiok a pöata a ngahangaha.