2 Timoti 2 - U Bulunagana U Niga

A soldia a niga tere Iesu Kristo

¹ O Timoti alö te heremi a pien i tar, lueia a nitagala tara nihitaguhu te kana tere Iesu Kristo.

² Na lö go hala hasiin u raranga tu hengoeia lö i tar i matar u katuun u para, turu katuun te hamana remölö, ba nori te tatei hatuts has raier a palai.

³ Alö go sagoho gono has mei lia a kamits, tego tagala sil menai lö e Iesu Kristo.

⁴ Tara toukuina tara ami, a soldia ema tatei gono benei a peisanen a mamana toukuina ielesala. Nonei ega hakats lasiin tega kato hasasaala menaien a tson mammam te lu mena meien tara ami.

⁵ Na e kato has uana tara katuun te pipiatana turu resis, ega kukute hanigei a lo turu resis.

⁶ A katuun te kui hatagalana tara kui i tanen e tatei lu benei a peisanen a hua tutuun tara toukui i tanen.

⁷ Hakatsin a ka te ranga ne gulia, ba Tsunono te halesale nou u hakats i tamölö ba lö te atei sile mou a manka teka.

⁸ Hakats kapiin e Iesu Kristo te takei poutsia tara tou mate, a hatutubunei tere Devit a King. U Bulungana u Niga te habulungana naiegulia te hatei nanen.

⁹ U Bulungana u Niga teka te sagoho sila nagia lia a kamits tara luman karabus. Nori e kits here nari lia a kopkop, kaba u bulungana tere Sunahan ema tatei kits nari.

¹⁰ Ba lia te söata sila nagia a mamanaka te butuna i tar tego taguhu merai lia u katuun te hopö kapir e Sunahan. Alia e ngilegu nori egi lu hasi a nitöatöa te kana tere Iesu Kristo, na nitsunono pan has te ka nitöana.

¹¹ U raranga teka e manana: Ti mate gono meia ra e Kristo, a ra ena töatöa gono has merouen romana.

¹² Te tuol hakarapoto nitöa roua ra, a ra ena tsunono gono has merouen. Kaba te holis narouen ra, ba nonei tena holis has ranou ra romana.

¹³ Noahasina tema kamena reira tu nihamana, nonei e ka nitöa mena u nihamana, taraha nonei ema antunan palis pouts lel nanei u raranga i tanen.

A katunun kui te hanigeiena e Sunahan

¹⁴ Alö go hatei lel rai u katuun a manka teka balö te ranga hatagala meramen i matana a Tsunono tegima pilits menaien u ranga. A markato teka ema taguhe nei a katuun, e kato hohomi tuun rena u katuun te hengoer u raranga teka.

¹⁵ Alö go torohana hatagala sil tego haniga menai lö e Sunahan bate ngöe nei lö a katuun a kukui tema matsingolo mena milö a toukui i tamölö bate hihatuts hamatskö nem u raranga u mana.

¹⁶ Ka halehana ban u ranga pinopino tema hapanenei e Sunahan, taraha e las halhal ba nanei a katuun e Sunahan.

¹⁷ A man raranga teka e here nei a pi a omi te nouena u benö tara katuun. A huol a katuun turu mar katuun teka, ere Himenias mere Pailitas.

¹⁸ Nori i la halehana ban u raranga u mana bate kato homi raier a palair u kristen ti pei menaien, a tou takei pouts e butu hakapa. Nori e kato homier u nihamana turu katuun.

¹⁹ Kaba a mouna u raranga tere Sunahan e ka hatagala noa hasina bate here nei u simen te ka mena a nikoloto teka: “A Tsunono e atei sil rena u katuun te pala uaier i tanen. Na katuun te poeiena e pala uana tara Tsunono e tatei laba nena a markato a omi.”

²⁰ I luma tara katuun te ka mena a mamanaka, te kana a man tabeli na man kap na mamana kaan hongo. A palai e niga korur te kuieri a silva tsi a goul, na palai e kuieri u ruei tsi u tsiktsiki. A man kaan hongo a man niga e ka silena a man toukui pan, na palai e ka silena a man toukui pinopino.

²¹ Te luba nemia lö a markato a omi, ba lö te here moi a kaan hongo te ka mena a toukui pan. Alö e gogoso mou bate hahalosem a saha toukui a niga te hopö kap benoi lö a Tsunono.

²² Alö go tori tsugani a mamanaka te habutena u ngilngil u omi te roron kamer u hitots, ba lö te tagala silem a markato te hamana uaria tere Sunahan bate matskö has mia i matanen. Alö go ngil noa hasir u katuun bate ka haniga gono mera men. Alia e hala menagi u raranga teka i tamölö na turu katuun hoboto a toriren te gogosona, bate singo siler a Tsunono ega taguhu raien.

²³ Na lö goma ka gono mei a katuun te ranga pinopino nena a mamanaka te tatei keitsena a raharaha bate kato homi rena u katuun.

²⁴ A katunun kui tara Tsunono ema tatei hatapo neia tara hiaraharaha, kaba nonei ega tua tami ia turu katuun hoboto, bate hatuts haniga ranen.

²⁵ Bate tuatami merena u katuun te tori tsuga ner u raranga i tanen bate hamatskö ranen. E Sunahan te tatei haniga nanou tegi palis uen bate atei siler u raranga u mana.

²⁶ Ba nori te lue riou u hakats u niga bate bus kopis ba nariou a tanga tere Satan te pile kap ranen bate kukutieier u ngilngil i tanen.