2 Tesalonaika 3 - U Bulunagana U Niga

Alimiou go singo bera moulam

¹ A matsi hahatoulana, alimiou go singo bera moulam ba u raranga tara Tsunono te tasata boroboro nou bate pan noua i matar u katuun u parpara, te kato has uaien i tamilimiou.

² Alimiou go singo has iam be Sunahan te hatongo kap ba ranoui lam u katuun u omi, taraha u katuun u parpara e hahamanar.

³ Kaba a Tsunono a katuun a hihipakoko. Nonei e kato hatagale nou a torimilimiou bate hatongo kap ranoua limiou tere Satan.

⁴ A Tsunono e kato hagigahi a torimulam ba lam te hamanem alimiou e hengo hanige miou u ranga i tamulam na e kato lel hasemoien romana.

⁵ A Tsunono e tatei hantuna ranou limiou ba limiou te atei silemiou ime temar ngil koru mera nei e Sunahan alimiou, ba limiou te kato noahas uamiou te kato uana e Kristo batema hanöa moi.

U katuun egi kui

⁶ Alam e hatei ramou limiou a matsi hahatoulana, tara solona e Iesu Kristo a Tsunono i tarara, alimiou go ka halehana ba raiam a man hahatoulana a man karous tema hengori batema kukutie ri a ka tu hatuts railam alimiou.

⁷ Kaba limiou ego atei sileiam i me tego mar kukute merami limiou alam. Alam uma karous ii tara pöata tu kaia lam i tamilimiou. E möa.

⁸ Alam u hol peisa a kannou hoboto i tamulam. Alam u kuin moni hatagala koru mei a lan na bong. Taraha, alam uma ngilei ta töa i tamilimiou go hanou pukpuku raiou lam.

⁹ Alam sanena tu ngil ba lam te hatei ramou limiou tego hanou pukpuku merami limiou alam. Kaba e möa. Taraha, alam e ngilin haröto rami limiou tego kui peisa sil mena milimiou a kannou i tamilimiou, tu kato has uu lam.

¹⁰ Pöata tu kaia lam i tamilimiou ba lam te hala rami limiou u raranga teka, a katuun tema kukui nei ema tatei nou has nei.

¹¹ Alam e mar ranga uaiem teka te hengo mena milam u raranga te poeiena a palai i tamilimiou e karousur batema kuiri, ba nori te ranga pinopino homi ner a manka tara palair u katuun.

¹² Alam e ranga hatagala mia turu katuun teka tara solo tere Iesu Kristo a Tsunono, alimiou go hanoeiam u ranga pinopino ba limiou te kuin moni peisamiou.

¹³ A matsi hahatoulana, alimiou goma sökana memi te kato haniga uami limiou.

¹⁴ Te raman hengo nena ta töa i tamilimiou u raranga i tamulam turu pas teka, balimiou te tara kap haniga namen bate ka halhal ba namen, ba nonei te matsingolo mena a markato i tanen.

¹⁵ Kaba limiou goma kato here namien u pakö i tamilimiou. E möa. Alimiou go hale mien u raranga u tagala, taraha nonei a hahatoulana i tamilimiou.

Kapakapana u raranga

¹⁶ A Tsunono noahas, nonei a mouna a masalohana, e tatei hamasalohana ranou limiou tara mamana pöata na tara mamana markato. A Tsunono e tatei ka gono mera noulimiou hoboto.

¹⁷ Alia e Pol, na lia peisa te hakapegu u raranga turu pas teka. Nonei temar koloto uagulia teka, te ka hasna tara man pas hoboto i tar na e haröto has nena temar koloto uagu lia.

¹⁸ E Iesu Kristo a Tsunono i tarara e tatei taguhu ranou limiou hoboto. Nonei talasi. Alam ere Pol mere Sailas ne Timoti