2 Pita 3 - U Bulunagana U Niga

U Lan te la pouts nama romana a Tsunono

¹ A man hahikapien i tar, alia e koloto menagi u hahuoluna u pas teka i tamilimiou. Turu huol hoboto u pas teka alia e torohanan hatakeiegu u hakhakats u niga i tamilimiou bate hatei lel ragi limiou a manka ti atei sil hakapa haseiam limiou.

² Alimiou go hakhakats kap naiam u raranga ti rangein u propet u niga i manasa, na u raranga tara Tsunono te lu pouts raiou ra, u ranga ti hala mera lelam u aposol i tamilimiou.

^3-4 Alimiou go atei mam sileiam a ka teka: tara kapakapana pöata i murimuri, u katuun te kukutier u ngilngil u omi i peisaren e butur romana. Nori e hahakos rariou romana limiou bate ranga ner a Tsunono bate poeier, “Nonei e ranga mamin tega la pouts uamen, ga ime te ka nen, gega la talama. U tamarara i mate hakapa, ga mamanaka e marka noahas uana te ka uaien tara pöata te habuteia e Sunahan a han i puta!”

^5-6 Kaba nori ema ngilin hakats hanigari bate atei siler, e Sunahan e kato homi hakapi a han i puta teka te katoeien. E markato uana teka, i manasa koru e Sunahan e ranga tuun ba u kolö e butuna ba u tsiktsiki e butu nama i gusuna u ramun ba nonei e ololo kap nanei u tsiktsiki u ramun. Ba i murinen be Sunahan e ranga lenina ba uolo pan e kato homiena a han i puta.

⁷ Ba turu töa u mar raranga noahas u kolö na u puta e hahaloser a pöata tega kato homi lel meraien u tula. A han i puta na i kolö e hahaloser a pöata te kout mera noi e Sunahan u katuun u omi bate kato hataia ranen.

⁸ A man hahikapien i tar, alimiou go hakats kap naiam a ka teka: te tara mena nei a Tsunono a man pöata, e markato uana teka, u töa u lan e antunana turu 1,000 u hiningal, na u 1,000 u hiningal e antunana turu töa u lan.

⁹ A Tsunono ema hamokomoko nei tega kato menaien a manka te ranga hamana naien tega katoeien, temar hakats uaier a palair u katuun. E möa. Nonei e hahaloso ranou limiou, taraha nonei ema ngile nei ta töa ta katuun ega taia, kaba e ngilena u katuun hoboto egi habirits ban a man hakats na man markato a man omi i taren.

¹⁰ Kaba u Lan Pan tara Tsunono e songots butu hasingoto tuun nama romana, temar butu hasingoto uana a katuun a kopkop. Nonei turu Lan, u kolö e taia mena romana u gururu u kapan, na manka i kolö e kulupu hakapa riou, na han i puta na mamanaka te kana i tanen e ats hakapa nitöa riou.

¹¹ Na temar taia tala uana romana a mamanaka tara markato teka, ba limiou te kato hatagala sil talemiou tego niga koru uaiam limiou bate hala nemiou a peisa milimiou tere Sunahan.

¹² Alimiou go hahaloseiam u Lan tere Sunahan bate kato silemiou tega butu boroboro uamen. Nonei u Lan te ats hakapa noua romana u kolö, ba mankana i kolö te ramun mena romana u hiski pan koru.

¹³ Kaba ara e hahalosera u kolö na u puta u tsimus te ranga hamanein e Sunahan, a han te ka noua romana a markato a matskö peisa.

¹⁴ Na man hahikapien i tar, tara pöata te hahalose mia limiou nonei u Lan, torohana hatagala sileiam tego gogoso uaia limiou i matana e Sunahan bate katoemiou a markato tara masalohana.

^15-16 Alimiou go atei sileiam a Tsunono e hahalosena tegi habirits uu katuun i tanen, ba nonei te lupouts ranen. Nonei e hale ii e toularara e Pol u hakhakats u niga ba nonei e mar koloto has ualala iesana i tamilimiou, te markato uanen tara man pas hoboto i tanen. Palaina a man raranga i tanen e ka mena a toukui pan tegi atei sil menaien, na u katuun u tutu na u katuun te hula hakatsir e hatuts hakölo ner a mouna a manka teka, te markato has mena rien a palaina u raranga turu Buku u Göagono. Ba nori te kato homi tsiponer a peisaren.

¹⁷ Kaba a matsi hahatoulana i tar, alimiou u atei sil hakapeiam a ka teka. Na limiou go haneiam, u katuun u omi e tatei gamo rari limiou a man markato a man tutu ba limiou tema tuol hatagala lel moi turu nihamana i tamilimiou

¹⁸ Kaba limiou u katuun ego tagalaiam bate atei silemiou a Tsunono i tarara e Iesu Kristo te lupouts raioura bate hitaguhuna i tarara. Aragi solo sei nitöa naien i romana na tara mamana pöata i murimuri. U mana. Nonei talasi. Alia e Pita