2 Pita 2 - U Bulunagana U Niga

U tson hihatuts u gamogamo

¹ Kaba u propet u gamogamo i butu hasia i gusur u katuun, na e kato has uanou iesana, u tson hihatuts u gamogamo e butu has ria romana i gusumilimiou. Nori e la momous merima romana u hihatuts u gamo te antunan kato homi korueiena u hakhakats turu katuun. Na nori e holis has ner romana a Tsunono te sakahis pouts raien, ba nori te taia boroboro pouts has mer romana a man markato a man omi i taren.

² Na u katuun u parpara e kukutier romana a man markato a man hamatsingolo tua i taren, na pala te hahamanar e tarer romana u katuun tegi kukute meraien u tson hihatuts u gamogamo teka bate ranga hohomi ner romana a marorona turu mana.

³ Tara markato te gono be menarien a peisaren a mamanaka, nori e hatei has rari limiou romana a man ranga pinopino bate luer a moni. E Sunahan e solon hopö kapiin a nihahuna i taren, na nori e taia hamana riou.

⁴ E Sunahan ema taatagi rai u katuun u omi i manasa, na nonei ema tatei taatagi has ranei romana u tson hihatuts u gamogamo teka. Nonei ema taatagi has rai u angelo ti kato homi. E möa. Nonei e lapo ba raien i hel me haka ranen tara man kiou a man kuhil koru i puta e antunana te butuna romana u lanin hahuna.

⁵ Na e Sunahan ema taatagi has rai u katuun u omi i manasa koru, ba nonei e habutena uolo pan me kato hamate rena u katuun ti kato homi. Nonei e haka haniga lasi e Noa, a katuun te roron habulunganen a markato a matskö, na tana tohit puku a katuun.

⁶ Na te hakulupu hakapan töa menaien a taun i Sodom na i Gomora mena köahu tununa bate hatara nena aha te hahalosena u katuun te kato homir.

^7-8 Kaba a töa katuun a niga te kaia i Sodom a solonen e Lot. Turu mamanu lan nonei e hengoen a man raranga a man omi na te tara menaien a man markato a man omi bate kato hatiama korueiena a torinen batema mala matskö nei. Na e Sunahan e haka hanigeien tara pöata te kato homieien nonei a taun.

⁹ E Sunahan e tatei haka haniga rena u katuun u niga tegi torohana meraien, bate haka rena u katuun u omi tara nihahuna e antunana te butuna romana u Kout Pan i tanen.

¹⁰ Na nonei e tatei hahuna koru has rena u katuun te roron kukuteier u ngilngil u omi i peisaren, bate hipus ner a nitsunono tere Sunahan. U tson hihatuts teka ema matout koruri ba nori te hipusur, na nori ema matoutun ranga homi has rari a pal kapan i Kolö.

¹¹ U angelo e ka mer a nitagala e pan bala nena a nitagala turu tson hihatuts u gamogamo teka, nu angelo has ema antunan ranga homi rari a pal kapanira i Kolö i matana a Tsunono.

^12-13 Kaba u tson hihatuts teka e kukute laser u ngilngil i tuenreiren, te kato has uaier u poum u hie na u kori na mankana i latu ti tuhana mei a niatei peisa i peisaren tegi kukute tuun meraien u tsinaren. Nori i tuhana sil tegi pile kap meraien bate atung hamate raier. Na u tson hihatuts u gamogamo teka e ranga hohomi has naier a manka tema atei sile rien, na nori ena kato hataia has rariou. Nori e alater romana te kato hohomi merarien a palair u katuun. Bate ngil koruer tegi kukute menaien u ngilngil u omi i peisaren tara lan. Na nori e nou gono mera riou limiou tara kannou, kaba e kato homi here rari limiou a ka a korkoriana te kato homiena u hasobö. Ba nori te roron sasaala mer a markatona turu gamo i taren.

¹⁴ Nori e ngilin tara las uaier turu touhaliou u omi. Ba tema hakaperi u ngilngil i taren te ngil mena rien a markato a omi. Nori e ron gamogamo raier u katuun te hula hakatsir. Na nori i solon alena talein a markato te riri sil menari a ka tara tana katuun, na e Sunahan e ranga hohomi hakapa raien.

^15-16 Nori i la ban a maroro a matskö me kukutier a maroro tere Balam a pien tere Beor. E Balam e ngil korui a hihol te lueien tara markato a omi te katoeien, kaba e Sunahan e ranga hapiou meien. Ba rongki i tanen e ranga here nei a katuun te hapiou menaien tegoma tatei kato menai e Balam a markato a tutu na omi te katsin katoeien.

¹⁷ U katuun teka e hererari a man kioun ramun ti rakaraka hakapa, na e here haseri u köasi te hula bahu nena a lomolomo bate hula la pinopinona. Nori e la uaier romana tara makum a kuhil koru te ruruhana nitöana, ti kato hahaloso beraien.

¹⁸ Nori e ranga sesei koru ner u raranga u tutu bate hamamangil reri u katuun u ngilngil na man markato a man omi i peisaren, u katuun ti hagou bus bar u katuun te roron kato homir.

¹⁹ U tson hihatuts teka e roron ranga meraier u katuun egi kukute raien batema tatei karia tara kits kap, kaba nori pouts has te kits kap gono meri a peisa ren a markato a omi i taren. Taraha, a katuun e ron kits silena a saha ka te roron mammam nanen.

²⁰ Kaba tego atei sileia a katuun e Iesu Kristo a Tsunono i tarara, te lu pouts raiou ra, bara te laba naiera a man markatona i puta. Ga te pilpiloto pouts roien tara markato a omi i taren, ba a nikaka turu katuun teka te omi bala koru lel tala nanou a nikaka taren i manasa.

²¹ Ega mala niga balein tegima atei sil mam menaien a maroro a matskö. Ga e omi tala mena te gamon atei sil mena rien a maroro a matskö bate töan tori hasoala lel ner u raranga u göagono ti hala raien.

²² A markato teka e haröto nena te mana uana u rangan haharuei turu Buku u Göagono te poeiena, “A muki e luana bate nou poutsena u nilua i tanen.” Na u tai e mar ranga uana teka, “A poum e totobu hagogoso nama batena susupa pouts len na tara mömoa.” Te markato has uaier u katuun te habirits sil pouts leneier a man markato a man omi i taren.