2 Korin 6 - U Bulunagana U Niga

¹ Te kui gono tala memia lam e Sunahan, alam e ranga hatagala koru mera moulimiou, goma hapolase mi e Sunahan te taatagi koru raiou limiou.

² Taraha nonei e pei, “Tara pöata tu taatagi raia lia u katuun, alia u hahengo uu i tamilimiou, na turu lanin hilu pouts, alia u taguhu raiou limiou.” Tara, i romana, nonei a pöata a niga te kato haniga renara e Sunahan. Tara, nonei a pöata te tatei lu pouts ranouara e Sunahan.

³ Alam e tataala hatskapa korum batema ngilin kato homi nami ta katuun ba nori te tatei ranga homi nariou a toukui te kate mulam.

⁴ Kaba, te kui be mialam e Sunahan tara mamanaka te katoe mulam, a nomi na toukui pan a parpara e butuna i tamulam na lam e roron makmakum ba has nem a manka te ngile mulam, kaba lam e hamana haniga noa hasim.

⁵ Nori i singata raiou lam, na i karabus raiou lam, na i hiagetageta me torohanan kato homi rariou lam. Alam u kui hatagala koru me kalata halanim me mate has mem a bes.

⁶ Alam e kato hanigam ne atei silem a ka a mana ne tuatamim na e niga mia turu katuun. Na man markato teka e haröto nena alam u katunun kui tere Sunahan. U Namnamei u Göagono te hakui ranou lam ba lam te ngil hamana has rem u katuun.

⁷ Alam e ranga hamanam na lam e ka mem a nitagala tere Sunahan. Alam e kui mem a markato a niga na matskö tara pal matou na u raranga tere Sunahan tara pal keruka.

⁸ A palair u katuun e hapan rariou lam bate solosei rariou lam. Ba palai te sigala rariou lam bate ranga hohomi rariou lam. U katuun e poeier alam u gamogamo, kaba u raranga i tamulam e mana nitöana.

⁹ U katuun e atei sil rariou lam, kaba nori e kato here rari lam u katuun papala. Alam e heremi u katuun te katsin mater kaba lam e töatöa noam. Alam e sagohem a kamits pan kaba lam ema matemi.

¹⁰ U katuun e kato here rari lam u katuun te taatagir, kaba lam e sasaala noa hasim. Alam u katuun tu möa ta moni, kaba lam e hala noa has nem a manka man niga tere Sunahan turu katuun u para. Alam u möa koru ta ka ni puta, kaba lam e ka noa has mem a mamanaka a niga tere Sunahan.

¹¹ A matsomir i Korin, alam e ranga hamatskö koru uaiem i tamilimiou, alam e hatei baba nem a manka i torimulam.

¹² Alam ema pile kap nami te ngil koru mera milam alimiou. E möa. Alimiou te pile kap namiou tego ngil koru mera milimiou alam.

¹³ Alia e ranga here mera gilimiou a galapien i tar. Alimiou go ngil ramou lam temar ngil has mera milam alimiou.

Aragi ka halhal ban a ka a omi

¹⁴ Na limiou goma ka gono merami u katuun te hahamanar bate taguhu ramen tara markato i taren. E möa. Ime temar kui haniga uariou a markato a niga na markato a omi? E möa. U ualesala na u kuhil ema tatei ka hobotori.

¹⁵ E Kristo na e Satan e tatei hiahanhanigar? E möa koru. A katuun te hamanana, na katuun te hahamanana ema tatei ka has meri u töa u hakats.

¹⁶ U saha u hanhaniga te kamer a luma tere Sunahan na u kesa? Taraha, ara e here rei a Luma tere Sunahan te töatöana. Te mar ranga peisa noa has uu e Sunahan, “Alia ena ka goua i toriren bate hula la goua i gusuren. Alia e Sunahan i taren na nori u katuun i tar.”

¹⁷ E kato uana teka ba Tsunono te pei hasena, “Alimiou go laba ramen bate ka halhal ba ramen. Alimiou go rama koru naiam a ka a korkoriana, balia te töan lu ragou limiou.”

¹⁸ “Alimiou ena hatamana moua romana i tar, na limiou ena galapien tson, na ena galapien touhaliou uamou i tar. Temar ranga uana a Tsunono te tagala soköna.”