2 Korin 11 - U Bulunagana U Niga

E Pol na u aposol gamogamo

¹ Alia e ngilegu alimiou go haka ba buna moulia balia te kato begu a tsitabubun ranga a tsi tutu. Kaba lia e taregu alimiou e hengoe moulia.

² Alia e hakats hapara ragou limiou temar hakats has uana e Sunahan. Taraha, alimiou e heremi a tahol a kukubei, na lia u hopö kap merai limiou tego tölo mena milimiou a töa puku lahas a tson, nonei e Kristo. Alimiou u peiam nonei lasi a töa Tsunono te hamana uami limiou.

³ Kaba lia e matoutegu, alimiou ena mots heremi e Eva te hengo sila nai u gamo tere Satan a kökötsi, batema hakats sil lenemi e Kristo puku lahas a töa.

⁴ Taraha! Tena la menama romana ta katuun a taina a Iesu tsi u taina u namnamei u göagono tsi u taina u bulungana u niga te halhal nena a Iesu na u Namnamei u Göagono na u Bulungana u Niga tu la mema lam, alimiou e toul here noahas me moien temar toul menai e Eva e Satan.

⁵ Alia e peiegu u aposol gamogamo teka ema pan bala nari lia.

⁶ Alia ema tatei raranga balagi, kaba lia e atei silegu a ka te ranga negu lia. Alia u haröto hakapa rai limiou a mamana niatei na mamana markato a niga.

⁷ Alia u kato homi, tu hala puta menai a peisar tego hapan merai lia limiou bate rarare pukpukuegu u Bulungana tere Sunahan i tamilimiou? E möa.

⁸ Alia u lui a monin hitaguhu tara palair a hun katuun tere Kristo tegomi taguhu merai lia limiou.

⁹ Na pöata tu ka gono meraia lia limiou ba moni i tar e makmakumuna, alia uma singoe ii ta moni i tamilimiou. Taraha, a matsi hahatoulana ti lama i Masedonia i mi pioue ii lia a manka tu ngili lia. Alia uma mala singoe ii ta moni i tamilimiou, na lia ema antunan hatiama ragi limiou bate singoe gou ta moni tara man pöata te la nama.

¹⁰ Alia e hatei hamana ragia limiou tara solo tere Kristo, u ranga te hatei la nena a markato teka i tar ema hapiou naria tara man han i Gris.

¹¹ Taraha e hana? Alia e rama ragou limiou? E möa. E Sunahan e atei silena alia e ngil ragou limiou.

¹² A ka te katoe gulia, alia e kato noahase gouen. Bu katuun te ngiler egi soloseri, na egi tara mareieri tema tatei peiroi, nori e mar kui has uaier temar kui uamu lam.

¹³ U katuun teka ema aposol hamanari. E möa. U katuun u gamogamo te kato here nari a peisaren u aposol tere Kristo.

¹⁴ E manana, e Satan e kato here has nai a peisanen a angelona turu ualesala.

¹⁵ Ba tema tutu nei tegi gamo has uu katunun kui tere Satan bate kato hereri nori u katunun pepeito kap turu lotu te hihatuts nena a markato a niga. Nori ena lu hase riou a nihahuna te matsköna tara man markato i taren.

U kamits na u tori tiama tere Pol a aposol

¹⁶ Alia e ranga leligu, alimiou goma poeiemi alia e tutugu. Kaba te pei mia limiou alia e tutugu, bara, lu here tala namilia a katuun a tutu balia te solosei hasegu a peisar.

¹⁷ Alia ema kukute talegi u raranga tere Sunahan. E möa. Alia e ranga heregi a katuun a tutu bate soloseiegu a peisar.

¹⁸ U katuun u para e kukuteier a markatona i puta bate solo seseier a peisaren, alia has e markato uagou iesana.

¹⁹ Alimiou e peimiou alimiou e atei korumiou, kaba limiou e sasaala noahas memiou te hengo merami u katuun u tutu.

²⁰ Alimiou ema ka hamana memi ta niatei. Taraha, a pal tson teka e hakui pukpuku rariou limiou bate a angoso rariou limiou na e gul haser a moni na mamanaka i tamilimiou, na alimiou ema hapiou ramien. Nori e sigala rariou limiou bate tapaler a pole milimiou.

²¹ Alia e ranga here noa hasegi a katuun a tutu. Tema matoutun ranga sesei narien ta ka, alia e ranga heregi a katuun a tutu, ema matoutun ranga sesei has goi.

²² Nori a tei Hibru? Alia has a toun Hibru. Nori a tei Israel? Ga lia has a toun Israel. Nori e hatubuna ria tere Abraham? Ga lia has.

²³ Nori u katunun kui tere Kristo? Bara, alia e ranga heregi a katuun a tutu. Ga lia a katunun kui te niga bala ragen. Tara, alia u kui hatagala bala raien na lia u ka haparaia tara karabus. Alia i singateiou a para pöata, na u roron mate karasa has.

²⁴ U Jiu i lahuse ii lia a wip u topisa u maloto na tosie a pöata na ka teka e butu a tolima a pöata nitöa.

²⁵ Topisa a pöata u katuun i singate ii lia a pata. Na töa pöata alia i titi hateiou. A topisa a pöata alia u ka ia tara tolaala te omi ia i tasi. Na tara töa pöata alia uolo ia i tasi tara töa lan na töa bong.

²⁶ Tara man tou lala i tar, a ka a para e torohanan kato homi naiou lia: a man ramun te saputu piou, u kopkop, na u Jiu, na u katuun tema Jiu ri. A man nomi e butu has ia i tar tu kaia lia tara man taun na tara makum a palaka na i tasi has. Na u hatoulana na u hahahinana gamogamo i tar i torohanan kato homi haseiou lia.

²⁷ Alia u kamits koru mei a toukui pan i tar. A para a bong alia u namala soho ii. Alia u bes koru na u maka koru has. Tara parpara a pöata alia uma kamei ta kannou na tu hasobö na ta makumun soho.

²⁸ Tagono talamena a mamanaka, alia e ka has megu u hakats pan koru te pepeito kap mera gilia a man hun katuun tere Kristo.

²⁹ Pöata tema hamana hatagala neia a töa katuun, alia e hasagoho hase gen. Pöata te kato homie ria a töa katuun bate kato homina, ba torir te taktakots koru mena a raharaha. Ga e noa talana. Alia goma ranga sesei nai a manka teka.

³⁰ Tego ngilin ranga seseia lia, alia u ranga sesei ni a manka te haröto nena alia ema tagalagi.

³¹ E Sunahan e Tamana e Iesu a Tsunono e atei silena alia ema gamo gi. Aragi solosei nitöa naien tara mamana pöata!

³² Tara taun i Damaskus, u katunun pepeito tere Aretas a king i taratara kapiin a man tamana tara ololo tara taun tegi pile kap menaien lia.

³³ Kaba man hahikapien i tar i hakoul mei lia a baskete te tara here ii a tohene a kapan tara binroa i hapalana ololo, ba lia e busugu.