2 Jon 1 - U Bulunagana U Niga

^1-2 Alia e Jon, a tson a kapan i tamilimiou. Alia e koloto menagi u pas teka i tamölö a tahol te hopö kapiin e Sunahan na galapien has i tamölö. Alia na u katuun hoboto te atei silem u hihatuts u mana, e ngil hamana koru ramou limiou, taraha u raranga u mana e ka nitöana i torirara.

³ E Sunahan e Tamarara na e Iesu Kristo a Pien Tson i tanen, turu ngilngil na tara nimana i tanen, e tatei taatagi rariou ra bate taguhu rariou ra bate hala rari ra a masalohana.

U nihamana na u ngilngil

⁴ Alia e sasaala koru megu te sabe mena gilia, te kukute menari a palair a galapien i tamölö u raranga u mana te hatei raira e Tamarara e Sunahan.

⁵ Kaba lia ema koloto menagi tu raranga tu tsimus i tamölö. E möa. Alia e koloto negu u raranga ti lu mamira te poeiena, ara a hun katuun tere Iesu egi hiangilngil.

⁶ Tegi ngil korueia ra e Sunahan, bara te hengo haniga hasera u raranga i tanen. Na u raranga i tanen i hatei mam noahasin tegi hiangilngil uu ra.

⁷ A para a katuun a gamogamo te hula la ria tara mamana han, bate holis ner te butun katuun hamana uu e Iesu Kristo. Na katuun te omiena e Kristo e markato has uana teka, nonei a katuun gamogamo.

⁸ Alimiou go haneiam, ma hapolase mi a manka man niga ti kui hatagala sili ra. Alimiou go kato nitöa sileiam tego lu mena milimiou a manka man niga te hopö kap berai limiou e Sunahan.

⁹ A katuun te poeiena u hihatuts tere Kristo ema antuna neia turu ngilngil i tanen bate kato silena u tana u hihatuts, e Sunahan ema ka neia tara katuun teka. Kaba a katuun te kukute nitöanena u hihatuts tere Kristo nonei e ka uana tere Tamarara na Pien Tson i tanen.

¹⁰ Temi hihatuts nena ta katuun u raranga tema matskö neia turu hihatuts tere Kristo, ba limiou tema tatei lu mena mien i luma i tamilimiou, batema tatei ranga hatami has mia i tanen.

¹¹ Na te ranga hatami tala moua limiou i tanen, e here talenei alimiou e taguhe men tara toukui a omi te katoe nen.

U kapakapana u raranga

¹² Alia e ngilin hatei gilö u raranga u parpara, kaba alia e raman koloto nagien turu pas. Alia e ngilin na taregu a matamölö bate hiararanga gono megou lö, bara te töan sasaala nitöara.

¹³ A galapien tere toulamölö, te hopö kapiin e Sunahan, e hala neruma u rarangan haniga taren i tamölö. Alia e Jon