1 Timoti 6 - U Bulunagana U Niga

¹ U katuun te karia tara tou kits turu katunun kukui puku egi tara marei a tsunono i taren bate solosei raren. Taraha, u katuun e namots ranga hohomi ner a solo tere Sunahan na u hihatuts i tarara.

² A katunun kukui puku te ka na tara katuun pan te kamena u nihamana goma tatei omieien, noahasina te pala uanen tere Kristo. Nonei ega ngil korueien bate kui hatagala koru beienen, taraha, nonei e kui beiena a katununa turu nihamana. Alö go hihatuts hatagalein a manka teka.

U hihatuts u gamo na u mana

³ A katuun te hihatuts nena u hihatuts u gamo ema tahongo neia turu hihatuts tere Iesu Kristo a Tsunono i tarara, u hihatuts u niga na u mana.

⁴ A mar katuun teka e ngil koruena a peisanen na ema atei silenei ta ka, na e ngilin ranga sisi tuun mena u ranga. A markato teka e habutena a hiomimi ba katuun te ranga homi nena a tai, bate hiahakhakats homir bate hiangenngenar.

⁵ A hiaraharaha te katon toa naier u katuun teka, u baku tutu tema atei sil haseri a ka a mana ba nori te poeier, u lotu a maroro te tatei lu sila namialö ta moni.

⁶ A hihol pan e tatei lue mialö te hapan mena mi lö e Sunahan bate sasaala mem a manka te ka memölö.

⁷ Ara ima la memei ta ka tara pöata ti posa raira, e möa. Na ra ema tatei la has merei ta ka tara pöata tena mate rouara.

⁸ Kaba ragi masa mei te ka menarei ra a kannou na u hasobö.

⁹ U katuun te ngilin ka mer a mamanaka a parpara e tutu lala tuun rena bate rus beier a maroro tara markato a omi. A maroro teka, a tanga turu mamana u ngilngil u omi na u tutu te antunan las mena nei a katuun tara han a omi i hel.

¹⁰ Taraha, u ngilngil tara moni a mouna koru a mamana markato a omi. Turu ngilngil pan koru tara moni ba palair u katuun te hapolasa susuler a markato te hamana uarara tere Sunahan bate katoeier a mamanaka a omi te kato hakamitsena a peisaren.

U hihatuts te la hamatskö uu tere Timoti

¹¹ Kaba lö o Timoti, alö a katuun tere Sunahan, ka halehana ban a manka teka. Torohanan tagala sil tego kato hamatskö uu lö bate kato haniga mia i matana e Sunahan bate hamane men. Alö go ngilir u katuun hoboto bate tuatami mia i taren na lö goma sökana has ii.

¹² Tagala sil e Sunahan ba lö te hamana haniga uam i tanen. Pile hakarapotein a nitöatöa te ka nitöana. E Sunahan e ngö sile ii lö a nitöatöa teka tara pöata tu ranga hanigaia lö i matar u katuun u parpara temar hamana uamia lö i tanen.

^13-14 Alö go pile hakarapotein u raranga tere Sunahan batema kamenei tu korkoriana e antunana tena la pouts nama romana e Iesu Kristo te ranga hanigein u raranga u mana i matana e Pontias Pailat. Alö go hengo hanigei u raranga tere Sunahan, ba u katuun tema tatei ranga homi naroi lö. Alö go markato uu teka e antunana tara pöata te butu pouts nama romana e Iesu Kristo a Tsunono i tarara.

¹⁵ Nonei e butu nama romana tara pöata te haniga hakapein e Sunahan. E Sunahan a töa puku te pan saluhena na mouna a nisasaala. Nonei te King pan rena u king hoboto na te Tsunono pan rena u tsunono hoboto.

¹⁶ Nonei a töa tema antunan mate noi na nonei e kana turu ualesala pan tema antunan la hasukusuku uari u katuun. Emoa ta katuun tega antunan tareien i manasa na ema antunan tara noahas nari i romana. Aragi soloseien, nonei te tagala saluhe nitöana. U mana.

¹⁷ Hateir u katuun te ka mer a mamanaka a para i romana gima solose ii a peisaren. Nori gima hasolaia tara moni tuun te antunan taia boroborona. E möa. Nori gi hasolaia tere Sunahan a tatangana koru te hala raneira a mamanaka te kato hasasaala ranoura.

¹⁸ Hateiri egi kato haniga bate katoeier a mamana markato a niga. Nori egi tatangana bate hia halhala ner a manka i taren.

¹⁹ Te kato uarouen teka ba nori te haputu beri a peisaren a manka man niga hamana, a man kana i Kolö te taguhu ranouen i murimuri. Ba nori te antunan lue riou a nitöatöa hamana.

²⁰ O Timoti, tara kapiin a manka hoboto ti hale ii lö. Ka halehana ban u ranga pinopino tema hapane nei e Sunahan, na turu rangan raharaha turu katuun te gamor bate poeier e ka mer a niatei.

²¹ A palair u katuun e poeier e ka mer a niatei, kaba nori i laba hakapein a marorona turu nihamana. E Sunahan e tatei taguhu ranou limiou. Nonei talasi. Alia e Pol