1 Timoti 5 - U Bulunagana U Niga

A markato te tatei katoe rara turu katuun te hamanar

¹ Alö goma ranga sisi nai a katuun te tsonpan nenou lö. E möa. Alö go ranga hatami ia i tanen temar ranga mena milö e tamamölö. Na lö go kato rai a man hitots a man hahatoulana i tamölö.

² Na lö go kato rai a touhaliou pan u tsinamölö bate kato here has rami u kukubei u hahinamölö turu hakats u gogoso.

³ Alö go taguhir u amoaba ti möa koru ta katuun tega taguhu raien.

⁴ Kaba te ka mena a amoaba a galapien tsi a man hatutubunei i tanen, ba nori te hatutseria a peisaren tegi kato menaien a toukui i taren bate taguher a hun katuun i taren, ba nori te hamatana poutseier a nihihipakoko turu tamaren na u tsinaren. A markato teka e Sunahan e haniga korue nen.

⁵ Kaba a amoaba te möa koru ta katuun tega tara kap naien, nonei e hakena u nihamana i tanen tere Sunahan bate singo hataatagi nitöa uana i tanen tara lan na tara bong.

⁶ Kaba a amoaba te kukutiena u mamana u ngilngil turu tuenrei i tanen e here nei a tahol a mate, noahasina te töatöa noa uanen.

⁷ Hatagali u raranga teka turu amoaba bu katuun tema tatei ranga sil rarien.

⁸ Kaba tema tara kap nanei a katuun a sungutunen, e la bala uana tara tahol na galapien i tanen, nonei e holis has nena u nihamana turu kristen na nonei e omi bala nena a katuun te hahamanana.

⁹ A amoaba te kamena u 60 u hiningal, na te töli a töa puku a tson, nonei a amoaba te tatei hopö naria turu solo turu amoaba te tatei taguhu raier.

¹⁰ Na nonei has a amoaba teka te kamena a solo a niga tara man markato a man niga te kato mameien. Hena, te hatuts haniga raien a galapien i tanen bate tara kap haniga ranen, a solonen e tatei kana tara man solo. Na te taguhu haniga raien u katuun ti tuku ti lama tara tana han, bate galus hasena a mour u katuun u kristen na te taguhu raien u katuun te ka mer a siki bate torohanan katoena a mamana markato a niga, nonei e tatei hakoloto nena a solonen tara man solo.

^11-12 Kaba, möa tu kolotein a solor u amoaba te kukubei noar. Taraha, u ngilngil i taren ena mots las halhal ba raneien e Kristo, ba nori tena ngilin hitöl lel riou i murimuri bate peko taleier u rangan hamana ti katoeien tere Kristo.

¹³ Nori u amoaba teka toum e ka pinopino riou bate hula la uar tara man luma. Na nori toum e ranga pinopino sil hase riou a palair u katuun bate kato pinopino tunur bate ranga has ner a manka tegi ma ranga naien.

¹⁴ Na lia e ngil taleiegu u amoaba u kukubei gi hitöl bate posaposar bate tara kap rer a galapien na mamanaka i taren, bu katuun tema ngileri e Kristo tema antunan ranga hohomi rarien.

¹⁵ A palair u amoaba i laba hakapein e Kristo bate kukutier e Satan.

¹⁶ Te kana a amoaba tara pala tara tahol a kristen, haka ban ba nonei te taguhe nen. A hun katuun tere Sunahan ema tatei söate nei a nitiama turu mar amoaba teka ba nori te tatei tara kap las nariou u amoaba hamana ti möa koru ta katuun tega taguhu raien.

¹⁷ U tsunono te kui haniger a toukui i taren egi hala rai u tara marei pan, e la koru uana turu tsunono te rararer na te hihatuts hasir.

¹⁸ Taraha, u Buku u Göagono e poeiena, “Alö goma kopo kap nai a runguna a bulmakau tara pöata te pita patspatsike nen u wit. Nonei e tatei nou hasina tara pöata te kui nen.” Na u Buku u Göagono e pei hasena, “A katuun te kuina ega lui a hihol i tanen.”

¹⁹ Möa tu hengo u kout tara tsunono. Te kana a huol tsi a topisa a katuun tegi hatangana hobotein a ka teka ba lö te töan hengoe men.

²⁰ Kaba te kato homi noahasina a töa katuun, ba lö te ranga hapiou namen i matar u katuun hoboto, ba nori te tatei matoutur.

²¹ Alia e hala hatagale goi lö u raranga teka i matana e Sunahan na i matana e Iesu Kristo na i matar u angelo u göagono. Alö go hengo hanigei u raranga teka batema kato homie mi a tana katuun. Alö go markato merai u katuun hoboto iesana.

²² Na lö goma hasese nai tego hatakopo menai a limamölö ta töa ta katuun bate hopö kap namen tara toukui turu kristen. Taraha, alö e namots heremi a hahuol i tanen tega kato homi uen romana. Alö go tara kap nitöani a peisamölö balö te gogoso nitöamia i matana e Sunahan.

²³ Möa tu ua puku lasi u ramun, ua hasi a tsi tabubun uain bate taguhena a torimölö na siki has te roron lue noulö.

²⁴ A palair u katuun te roron kato homir a markato i taren e hatara mareiena na e haröto nena tena lu mena roien a nihahuna. Na markato a omi tara palair u katuun ema atei sileri, kaba ena lakasa moto nou i murimuri.

²⁵ Na te kato has uana a markato a niga, e atei sil haseier, na markato a niga tema lakasa noa nei ena lakasa moto has nou i murimuri.