1 Timoti 4 - U Bulunagana U Niga

A toukui tere Timoti i murimuri

¹ Hengo! U Namnamei u Göagono e ranga halesalana bate poeiena, a palair u katuun e laba nariou romana u lotu hamana tara kapakapana a pöata. Nori e ngilin hengo rariou u katuun u gamogamo bate kukutier u hihatuts turu liliahanei u omi.

² U hihatuts teka e la nama romana turu ranga u gamo turu katuun u gamogamo tema matsingolo lel meri a ka a omi.

³ Nori ena hapiou nariou tegi hitöl uu katuun, na e hapiou ba has raroui a palaina a kannou te habuti e Sunahan egi lu mei u katuun te hamanar na te atei siler a ka a mana, a niniganiga.

⁴ A mamanaka hoboto te katoe e Sunahan e nigana, ara gima höanei ta töa ta ka, aragi lu mei a mamanaka a niniganiga.

⁵ Taraha, u raranga tere Sunahan na u singo e kato hagöagonena a kannou i matana e Sunahan.

A katunun kui a niga tere Iesu Kristo

⁶ Te hatara namoua lö a manka teka turu hahinamölö na u toulamölö, alö a katunun kui a niga tere Iesu Kristo, e kato hatagale moilö a peisamölö na u rarangana tara nihamana turu hihatuts u niga te kukutie mölö.

⁷ Kaba, alö go hapolasa bani a man hahatate pinopinona i manasa, tema hanigenei e Sunahan. Alö go hahangeia a peisamölö a markato a niga tere Sunahan.

⁸ Te kato hatagale mia lö u tuenrei, e nigana. Kaba tego kato hagogoso mei lö u namnamei i tamölö te niga balana, taraha a markato teka e taguhe noulö tara nitöatöana i puta na tara nitöatöana i Kolö has.

⁹ U raranga teka e manana, na ra hoboto gi hamaneien.

¹⁰ Tara a nimanamana nen, ara e kui hatagala sil noahasera a ka a niga teka, taraha ara e hakera u nihamana i tarara tere Sunahan te töatöana. Nonei te taguhu rena u katuun hoboto bate lu pouts rena u katuun te hamana uaier i tanen.

¹¹ Ranga balö te hihatuts nem a manka teka, a manka tegi hengoe.

¹² Alö a katuun a hitots, ego möa ta katuun tega pita putputeiou lö. Harötein ta markato ta niga turu katuun te hamanar te markato uana a katuun a kristen turu hihatuts i tamölö, na tara markato i tamölö na te ngil mera milö u katuun hoboto na te hamana ua mölö tere Sunahan, bate ka mem a markato a gogoso.

¹³ E antunana tena la guma lia, alö go hatagala nitöani tego rit menai lö u Buku u Göagono turu katuun bate hahengor, balö te rararie men bate hihatuts has namen.

¹⁴ Alö goma totonei a ka a niga te halei lö e Sunahan, ti hatagali a pal kapan turu kristen ti katoi u rangan propet bate hatakoper a limaren i tamölö.

¹⁵ Kato hatagala nitöani a toukui teka bate hakats nitöa namen, bu katuun hoboto te tatei tarer a toukui i tamölö e tataalana.

¹⁶ Tara hanigei temar ka uamölö na manka te hihatuts nemölö. Pile hakarapotein a markato teka, ba lö te taguhe mou a peisamölö na u katuun has te hengoe riou lö.