1 Timoti 3 - U Bulunagana U Niga

A katuun pan turu Lotu ga hatarein a saha markato i tanen

¹ U raranga u mana e poeiena, “A katuun te ngilin katoena a toukui tara katunun pepeito kap turu lotu e ngilena a toukui a niga.”

² A katunun pepeito kap turu lotu ema tatei ka menei ta ka ta omi i tanen. Nonei ga ka mei a töa puku a tahol. Na nonei ga hakats haniga bate hala puteiena u ngil i peisanen bate kato hamatsköna. Nonei ga tara sil a taina katuun bate ngö menaneien i luma i tanen. Na nonei ga atein hihatuts has.

³ Nonei goma tatei ua hatutu ii na egoma katunun hiatatung ii na egoma ngil hasei a moni a parpara. E möa. Nonei has a katuun te tatei tuatamina turu katuun bate kato haniga ranen.

⁴ Nonei e antunan tara kap haniga nena a tahol na galapien i tanen na galapien e tatei hengo haniga hase ren na e tatei tara marei hase ren.

⁵ Taraha, tema antunan tara kap haniga nanei a tson a tahol na galapien i tanen, nonei ma antunan tara kap haniga has nanei a hun katuun tere Sunahan.

⁶ A kristen a tsimus ma tatei lue nei a toukui tara katunun pepeito kap turu lotu. Nonei e namots ranga sesei nena a peisanen pouts bate lueiena a nihahuna te lui e Satan.

⁷ A katunun pepeito kap turu lotu ega markato uu tegi tara marei u katuun tema hamanari. Nonei e namos kurapa mena a nimatsingolo, bate tanga noa tara tanga tere Satan.

U katunun hihitaguhu turu lotu

⁸ U katunun hihitaguhu turu lotu egi kato haniga has, batema ka meri u huol u baku. Nori egima antunan ua haparei u uain bate ua hatutur na nori egima gono bei a peisaren a mamanaka.

⁹ Nori egi pile kap hakarapotein a mouna u nihamana batema katoeri ta ka tega hamatsingolo raien, na nori egi ka mei u hakats u gogoso.

¹⁰ U katuun teka egi torohana mam bir, te hatara na roien nori e ka mer u baku u matskö, ba nori te tatei lue riou a toukui tara katunun hihitaguhu turu lotu.

¹¹ A touhaliou has i taren egi kato haniga batema katoeri tu ranga te poeiena a tana katuun e kato homina. Nori e tatei hakats hanigar bate pakokeier a mamanaka te katoe ren.

¹² A katunun hitaguhu turu lotu ega ka mei a töa puku a tahol i tanen, bate tara kap haniga nena a galapien na mamanaka i tanen.

¹³ U katuun te kato hanigeier a toukui tara katunun hihitaguhu e lu beri a peisaren a nitaratara marei a niga, na e ka has meriou a nitagala te hamana uaren tere Iesu Kristo.

A mouna u lotu i tarara

^14-15 Alia ena la guma romana, kaba lia e koloto megi a man raranga teka i tamilimiou tena mots hamokomoko ua guma lia, ba limiou te atei sile mou ime tego markato uaiam limiou turu katuun hoboto tere Sunahan. Taraha nori a luma tere Sunahan te töatöa nitöana, na nonei a mouna u nihamana.

¹⁶ Na ra hoboto e hia hanhaniga ner u lotu i tarara e ka mena a mamanaka a niga koru te haröto halakasa ner: E Kristo e butun Katunuma. U Namnamei u Göagono e harötein te matskö uanen. U angelo i tareien. U katuun i habulungana naien turu han hoboto. U katuun e hamana uaier i tanen. E Sunahan e lu pouts menaien i Kolö.