1 Timoti 2 - U Bulunagana U Niga

Singo sil raiam u katuun hoboto

¹ U raranga tutuun i tar e mar la uana teka, singo sil raiam u katuun hoboto, singo sileiam ta hitaguhu na limiou ego haniga be sil has ramen tere Sunahan.

² Singo sil has raiam u king na palair u katuun pan hoboto, ba ra te tatei karia tara masalohana bate kakamoto hanigara i matana e Sunahan na turu katuun hoboto.

³ A man mar singosingo teka e niga koruna, na e Sunahan te ngilin lu pouts ranou ra e haniga korue nen.

⁴ Nonei e ngilin lu pouts ranoura u katuun hoboto bate atei silera a ka te manana.

⁵ Taraha e Sunahan a töa puku, na e Iesu Kristo puku lahas te tuol na i gusura u katuun na e Sunahan.

⁶ Nonei e hala sile ii a peisanen tego sakahis meraien u katuun hoboto, bate haröto nena u ngilngil tere Sunahan i tarara, tere na pöata peisa noahas ien.

⁷ Nonei a ka te hala sile mei lia e Sunahan tego aposol uu lia i tanen, bate hatuts raiegu u katuun tema Jiu ri ba nori te tatei hamaner a ka te manana bate atei sileren. Alia ema gamogi. E möa! Alia e ranga hamanagu.

⁸ Alia e ngilegu a pal tson turu han hoboto, egi hasöani u ualima u gogoso te möa ta raharaha bate singo uar tere Sunahan.

A markato tara tahol

⁹ Na lia e ngil hasegu a touhaliou gi hasei u mar hasobö tega tara hanigaia i matar u katuun. Nori gi hasei mei u hasobö u hakats u niga. Nori gima hakats hapara nai tegi maman kato menaien a huluren bate hakeier a manka a man kankanaha na u hasobö na mamanaka a hihol i tanen te pan koruna. E möa.

¹⁰ Nori gi kato nitöani a man markato a man niga. A markato teka e matsköna tara touhaliou te poeier nori e hatsunoner e Sunahan.

¹¹ Alimiou a touhaliou go hahengo halongolo tuun iam te hihatuts ria bate hala putemiou a peisa milimiou.

¹² Kaba lia ema hanigegi tega hihatuts uu a tahol bate mammam nena a tson. Nonei ga hahengo tuun lasi.

¹³ Taraha, e Sunahan e kato mami e Adam, ba nonei e töan katoeiena e Eva.

¹⁴ E Adam ima gamoei. E möa. E Eva ti gami me pekoena a lo tere Sunahan.

¹⁵ Kaba a touhaliou ena lu sila pouts raroua tena posa mera roien a galapien, na tena hamana nitöa uarouen tere Sunahan bate ngil raier a palair u katuun bate kamer u hakats u matskö na u niga.