1 Tesalonaika 3 - U Bulunagana U Niga

¹ Alam uma ngilin hahalosoi, taraha alam u taatagi koru raiou limiou. Na lam e hakats has nem alam gona ka buia tara taun i Atens.

² Ba tara markato tala teka ba lam e tula namula e Timoti a hahatoulana i tarara te kui gono mera noulam tara toukui te habulungana menari u Bulungana u Niga tere Kristo. Nonei e la silela tegona hatagala meraien limiou na tegona kato hatagala menien u nihamana i tamilimiou.

³ Ba u katuun te omi ra riou limiou tema tatei hamatout rari limiou. Alimiou e atei silemiou a ka a omi teka e tatei butuna i tarara, u katuun te hamana ria tere Kristo.

⁴ U mana koru, a pöata tu ka gono meraia lam alimiou i manasa, alam u hatei mam railimiou tego lu merai ra a kamits. Ba nonei e mar butu hamana has uana ti mar atei uaiam limiou.

⁵ Ba tara markato teka, alam uma antunan hahaloso leli, ba lam e tula namula e Timoti egona sakesake te popo hamanasana u nihamana i tamilimiou. Alia u toku sil korui e Satan e namots kato homi ranou limiou ba toukui i tamulam te lala pukuna.

U hahatei tere Timoti e hatagali e Pol

⁶ E Timoti e tuku poutsia i tamulam te laba mera meien limiou. Nonei e piou nema u bulungana u niga te hamana hatagala noahas uami limiou tara Tsunono bate hiangilngil noa hasmiou. Na nonei e hatei has railam alimiou ema solopala rami lam, kaba limiou e ngilin tara koru ramou lam temar ngilin tara koru has merami lam alimiou.

⁷ Pöata tu hengo nai lam u ranga teka, ba torimulam e nigana me sasaala poutsuna. Alam u tori tiama koru mei a kamits te lue mulam turu katuun te hahamanar, kaba lam e sasaala pouts talam te hengo mena milam te hamana noa uami limiou tara Tsunono.

⁸ Na te kato nitöa uamou limiou teka, ba torimulam te niga nitöa hasi nou.

⁹ Na pöata te singo bera mia lam alimiou tere Sunahan, alam e haniga koru uaiem tere Sunahan te kato hasasaala koru mera milimiou alam.

¹⁰ Na lam e roron singo hatagala korum tara lan na bong tego tatei tara menai lam a peisa milimiou na tego taguhu merai lam alimiou tara pöata te lagi hamana mia limiou.

¹¹ Alam e ngilem e Tamarara e Sunahan na Tsunono i tarara e Iesu egi hala pouts merai lam i tamilimiou.

¹² Na lam e ngil hasem a Tsunono ega kato raiou limiou balimiou te hiangilngil hatagalamiou bate ngil hatagala has ramiou u katuun hoboto, bate kato talasina. Na lam e ngil hasem alimiou go mar ngil koru merami a palair u katuun temar ngil koru has mera milam alimiou.

¹³ Taraha, a Tsunono e ngilena a torimilimiou ega gogoso nega matsköia i matana e Tamarara e Sunahan, tara pöata tena la pouts nama romana a Tsunono i tarara e Iesu na u katuun hoboto i tanen.