1 Pita 5 - U Bulunagana U Niga

U sipsip tere Sunahan

^1-2 Alia e ka hamanasa megu u raranga i tamilimiou a pal kapan te tara kap ner u lotu. Na lia has a katuun pan turu lotu i tarara. Alia u tara hakapi temar kamits uu e Kristo, na lia e lu gono has megoen romana a nikapan tara pöata te butu namen romana. Alia e ranga hataatagi mera goulimiou, alimiou go taratara kap haniga raiam u katuun te hala railimiou e Sunahan. Nori e hereri u sipsip na limiou u katunun taratarakap i taren. Alimiou goma kato memi a toukui teka te hakui tuun mera nei limiou e Sunahan. E möa. Alimiou go ka meiam u ngilngil i peisa milimiou bate katoe men. Alimiou goma kato sile mien tego lu mena milimiou ta moni. E möa. Alimiou go kame iam u ngil u tagala tara toukui teka.

³ Alimiou goma kato here rami u katuun u kapan bate pita puta ramiou u katuun te taratara kap rami limiou. E möa. Alimiou go katoeiam a markato a niga te tatei kukutieren.

⁴ Ba tara pöata te butu nama romana a katuun a kapan turu katunun taratarakap, ba limiou te luemiou romana a praisina i Kolö tema tatei taia nei.

⁵ Na e markato has uana iesana, alimiou u katuun u hitots ego hala puteiam a peisa milimiou turu katuun u kapan. Na limiou hoboto ego hateteneiam a peisa milimiou bate hiatagtaguhumiou. Taraha, u Buku u Göagono e poeiena, “E Sunahan e tokitoki rena u katuun te hangiser, kaba nonei e taguhu rena u katuun te hateteneier a peisaren.”

⁶ Ba limiou te hatetenei talemiou a peisa milimiou bate ka puta mia tara nitagala tere Sunahan, ba tara pöata a matskö ba nonei te hala sei has ranou romana limiou.

⁷ Haka menami a nitaatagi hoboto i tamilimiou i tanen, taraha nonei te tarakap ranou limiou.

⁸ Alimiou go hakats haniga mia i peisamilimiou, na ego haneiam! Taraha, u pakö i tamilimiou e Satan e roron hula lana bate sakeiena ta katuun tega kato homien. E here nei a laion te hula ngala lamena te sake menaneien ta ka ta töatöa tega noueien.

⁹ Ka hatagala mia turu nihamana i tamilimiou bate tuol kakap nemiou e Satan, taraha u toulamilimiou u kristen te ka ria tara mamana han i puta e sagoho haser a mar nikamits te sagohe milimiou.

¹⁰ Alimiou e gamon sagoho lele mou a kamits, kaba i murinen e Sunahan e kato haniga pouts ranou u katuun u niga i tanen bate hatagala ranou limiou na u nihamana i tamilimiou tara mamana pöata. Nonei a Sunahan te roron taatagi ranou limiou bate ngö sil ranoui limiou tego na lu gono menami limiou e Kristo a nikapan i tanen te ka nitöana.

¹¹ E Sunahan te ka nitöa mena a nitagala pan tara mamana pöata. U mana.

U rangan haniga

¹² E Silbanus e koloto benei lia u pas teka te hala menagi lia i tamilimiou. Nonei e toularara tara markato turu kristen na lia e hamana korue gen. Turu pas teka alia e hala ra gilimiou u rarangan hitaguhu bate hatei ragi limiou nonei a nihitaguhu hamana tere Sunahan teka. Na limiou go tuol hakarapoto mia tara markato tara nihitaguhu teka.

¹³ A pal kristen te ka ria tara taun i Babilon na te hopö kap hasir e Sunahan, nori e hala neruma u rangan haniga i taren i tamilimiou. Na pien has i tar e Mak e hala has ranoui limiou u rangan haniga i tanen.

¹⁴ Hiahanhaniga meiam u ngilngil hamana. Na masalohana e tatei ka gono mera noulimiou hoboto u katuun tere Kristo. Alia e Pita