1 Pita 4 - U Bulunagana U Niga

A markato a tsimus

¹ E Kristo e sagohi a kamits i tuenreinen, na limiou go mar hakats hatagala has uaiam iesana batema rama nami a nikamits. Taraha, a katuun te sagohena a nikamits i tuenreinen ema hakats nanei tega kato menaien a markato a omi.

² Te markato tala uanen teka ba limiou tema tatei kato lenemi a markatona turu ngilngilina i puta. E möa. Na turu mamana u lan alimiou go markato las uaiam temar ngil uana e Sunahan.

³ Tara pöata i manasa alimiou u kato hantuna hakapeiam man markato a man omi te roron ngiler u katuun te hahamanar. Alimiou u ronge mia a peisa milimiou turu ngilngil u omi bate uaua pala mia tara man pati a man omi, bate tutu memiou u ramun u tagala, bate hatsunono hase miou a man got gamogamo. A markato teka alimiou u katoe men i manasa kaba i romana e möa.

⁴ Ba pala te hahamanar e asingoto koru ner tema kato lel gono mera mien limiou a man markato a man omi pinopino teka, ba nori te ranga hohomi rariou limiou.

⁵ Kaba i murimuri nori ena tatei ranga peisa ner romana a man mouna a man markato ti katoeien te tuol rien romana i matana e Sunahan, nonei te ona ranou u katuun te töatöar na u katuun ti mate.

⁶ Nonei a ka ti habulungana bei u Bulungana u Niga turu katuun ti mate, u tuanrei i taren ti onari bate mater, kaba u namnamei i taren te tatei töatöar temar töatöa uana e Sunahan.

Tarakap haniga naiam a man nitagala te hala railimiou e Sunahan

⁷ A nikapakapa tara mamanaka e susuku hakapa. Nonei tego hakats halesala haniga beiam limiou bate hakats haniga mia i peisamiou ba limiou te tatei singo uamiou tere Sunahan.

⁸ A ka te pan bala koruna tara mamanaka, alimiou go hiangilngil hatagalaiam, taraha u ngilngil nonei te kato hataie nou a mamana a markato a omi.

⁹ Alimiou go lu merami a palair u katuun i luma i tamilimiou, bate tarakap haniga ramen batema ranga sil ramien.

¹⁰ Alimiou a man tötöa hoboto u lu hakape muma a nitagala a niga tere Sunahan. Na limiou go tarakap haniga naiam a man nitagala teka bate taguhu ramiou a palair u katuun.

¹¹ A katuun te ka mena a nitagala tega habulungana menaien u raranga, ega habulungana hamatskön u raranga tere Sunahan. Na katuun te roron hitaguhuna ega hitaguhu mei a nitagala te lue nen tere Sunahan. Ba tara mamanaka a solona e Sunahan e hala sei sila naroa tere Iesu Kristo, nonei te ka nitöa mena a nikapan na nitagala tara mamana pöata. U mana.

U nikamits te söater u kristen

¹² A man hahatoulana i tar, alimiou goma asingoto nami a kamits pan te butu silena tega torohana merai limiou. Alimiou goma poeiemi, “Ta ka halhal ta omi te butuna i tarara.” E möa.

¹³ Alimiou go sasaalaiam, taraha e here nei alimiou e sagoho gono memi e Kristo a kamits. Nonei tego tatei sasaala koru beiam limiou romana tara pöata te butu mena men romana a nikapan i tanen.

¹⁴ Alimiou go sasaalaiam tegi ranga homi merai limiou te kukute mena milimiou e Kristo, taraha a ka teka e poeiena u Namnamei u tagala tere Sunahan e kana i tamilimiou.

¹⁵ Kaba, tego sagoho kamits ia lö, alö goma here ii a katuun a hihipuli, na katuun a kopkop, na katuun a herheroko, na taina katuun te kato homina.

¹⁶ Kaba tego kamits sil mena milimiou te kukute mena milimiou e Kristo, alimiou goma matsingolo memien. E möa. Alimiou go haniga uaiam tere Sunahan te ka mena milimiou u solon “kristen.”

¹⁷ A pöata tega hatanian ona merai e Sunahan u katuun e butu hakapa, na nonei e ona mam ranou u katuun i tanen. Na te hatania nen romana i tarara, ga ime tena mar kapa uanoen romana turu katuun te hipus ner u Bulungana u Niga i tanen?

¹⁸ U Buku u Göagono e mar ranga uana teka: “Te kamenen a tsi tabubun maroro koru te tatei lu pouts merari u katuun u matskö, Ga ime te markato ueier romana u katuun te habirits hasoala baner e Sunahan bate katoeier a markato a omi?”

¹⁹ Na e markato uana teka, te kamits sile mia limiou u ngilngil tere Sunahan, ba limiou te kato haniga miou, bate hake mia a nitöatöa i tamilimiou i limana e Sunahan te kato raiou limiou. Nonei e roron kato hamanena a ka te ranga nanen.