1 Pita 3 - U Bulunagana U Niga

A man munmun tahol

^1-2 Na tara markato hobotona tara nikaka a niga, alimiou a touhaliou ego haka pute mia a peisa milimiou tara pal tson i tamilimiou. Na sanena a palai i taren egima hamane ii u raranga tere Sunahan, nori e tatei hamana sila has ria tegi tara menaien a markato a niga i tamilimiou. Na tema katoe milimiou tu töa tu ranga i taren, a palai e tatei hamana noahasir, taraha nori e tare riou te kato mena milimiou a markato a gogoso na markato te hapan mena milimiou a Tsunono.

³ Alimiou goma hakats hapara silemi tego kato hatshats haniga menami a peisa milimiou ielesala, bate maman kato namiou a hulu milimiou bate hamagoemiou u kabono na tsien te holeri a hihol pan bate hasogemiou u hasobö u niga koru. E möa.

⁴ A nitaratara a niga i tamilimiou ega butuma i torimilimiou i iogana te ka mena milimiou a markato a niga bate tuatamimia turu katuun. A markato teka ema tatei hula palis nei. E ka nitöana, na e Sunahan e haniga korue nen.

⁵ A touhaliou u nigara i manasa ti hamana uu tere Sunahan i markato has uu teka, bate haka pute ria a peisaren tara pal tson i taren.

⁶ E Sara e markato has uu teka. Nonei e hengo korui a tson i tanen e Abraham me ngöe neien “A tsunono i tar.” Na te kato haniga moua limiou ba tema matoutemi ta ka, alimiou e here hamanasa talemi a galapien touhaliou tere Sara.

⁷ Alimiou has a pal tson, alimiou go hakats haniga raiam a touhaliou i tamilimiou, taraha a tahol ema mar tagala uanei temar tagala uana a tson. Na limiou go hapan has ramen, taraha nori has e lu gono mera roi limiou a nitöatöa tere Sunahan. Alimiou go markato uaiam teka, bate möa nou taka tega antunan hatu kap naiou a man singosingo i tamilimiou.

A kamits te lu sileri a markato a niga

⁸ U raranga teka e la uana i tamilimiou hoboto. Alimiou go ka meiam u töa puku u hakats bate hiataatagi miou. Alimiou go hiangilngil iam te hamana hoboto uamilimiou tere Kristo bate heremi a man munmun toulana. Ba limiou te tami mia tara tabi bate haka putemiou a peisa milimiou.

⁹ Alimiou goma palisemi a man markato a man omi te katoe ria tamilimiou, na limiou goma hipou has mia turu katuun te kato homi ria i tamilimiou. E nigana tego hamatana mena milimiou a nikalkalala, taraha a nikalkalala nonei a ka te rangein e Sunahan tega hala raien limiou tara pöata te ngö raien limiou.

¹⁰ U Buku u Göagono e mar ranga uana teka: “A katuun te ngil koruena a nitöatöa bate ngilin ka mena a nitöatöa a niga, a katuun teka ega matatei ranga homii. Na nonei ega hanöan rangein a man raranga a man gamo.

¹¹ Nonei ega habirits ban a man markato a man omi bate kato hanigana. Na nonei ega ngil korui a markato tara masalohana bate kukute hatagala korue nen.

¹² Taraha, a Tsunono e roron tara uana turu katuun u matskö bate ron hengoena u singo i taren. Ba nonei te raharaha rena u katuun te kato homir.”

¹³ E möa ta katuun tega kato homi raiou limiou, tego kato hatagala sil mena milimiou a markato a niga.

¹⁴ Kaba te kamits sil mena milimiou a markato a niga te katoe milimiou, e Sunahan e kalala has ranou limiou romana! Alimiou goma matout rami u katuun teka, bate toku miou. E möa.

¹⁵ Alimiou go hapaneiam e Kristo i tori milimiou, ba nonei te Tsunono ranou limiou. Na tara mamana pöata alimiou go hanei sileiam ta katuun tego rangata railimiou a saha ka te hamana sile milimiou, ba limiou te ranga palis ramen bate ranga hatami mia i taren batema sigala ramien.

¹⁶ Na limiou go kato hanigaiam ba torimilimiou tema tatei kout ranoui limiou. Ba u katuun te ranga homi ner a man markato a man niga i tamilimiou, te kukute mena milimiou e Kristo, te tatei matsingolo mer romana a man raranga a man omi i taren.

¹⁷ Te tus raira e Sunahan aragi sagoho kamits, e nigana. Na te kamits merara te katoe rara a markato a omi, e niga hasina. Kaba te kamits merara te katoe rara a markato a niga, a ka teka e niga balana.

^18-19 Taraha, e Kristo e sagoho kamits sil hasi a man markato a man omi i tarara. Na nonei e mate a töa puku a pöata. Nonei a katuun a niga te mate silir u katuun u omi. E kato sil tega peigi meraien ra tere Sunahan. A tuenreinen e mate, kaba nonei e töatöa mei a markato turu namnamei, batena rarariena u raranga tara man namnamei ti kaia tara makumun kits.

²⁰ A man namnamei teka nori u katuun u hihipus ti kaia tara pöata tere Noa i manasa. Nonei tara pöata e Sunahan e solon hahaloso me tuatami koruna tara pöata te kuie ia e Noa a tolaala. Kaba a töal puku a katuun ti töatöa turu uolo pan, a palai i mate.

²¹ U uolo e haharuei nena a tou baptais i tarara. U uolo e taguhir a pala tere Noa, na tou baptais e taguhu has ranou ra. E ma ka sile nei tega galus ba menaien u korkoriana turu tuenrei tuun i tarara. E möa. A tou baptais i tarara e mar mouna uana teka, e hateie nei e Sunahan a torirara ema kout raneira. Ara e tatei markato uara teka, taraha e Sunahan e hatakei poutsi e Iesu Kristo tara tou mate.

²² Na e Kristo e la hakapa uu i Kolö mena kana tara pal matou tere Sunahan. Nonei e tsunono rena u angelo na pal kapan na mamanaka hoboto te kamena a nitagala i Kolö.