1 Korin 6 - U Bulunagana U Niga

E möa tegi hia kokout uu kristen i matar u katuun tema kristen ri.

¹ Te raharahena a töa i tamilimiou a tana kristen, e hana, nonei e kout nanen tara tsonun ona a tematan batema la meneien turu palair u kristen? A hun katuun tere Sunahan te tatei hakaper a raharaha teka.

² Alimiou e atei sil hasemiou u katuun tere Sunahan ena ona rer romana u katunura i puta? Aa. Na temar kato uaien teka, ba limiou te antunan hakapa korue miou a matsi raharaha teka.

³ Alimiou e atei sil hasemiou ara ena ona has rariou u angelo? Ga e hana ba ra tema antunan hamatskö korueri a mamanaka i puta teka?

⁴ Te butuna a hia raharaha i gusumilimiou, e hana balö tena tareiem a katuun tema tara mareieri u kristen?

⁵ Alia e ranga megi a ka teka tego hamatsingolo merailia alimiou. E möa koru lasi ta töa i gusumilimiou u kristen tega ka mei ta niatei tega ona menaien a raharaha tara huol a katuun?

⁶ Kaba limiou ena kout namiou u hahatoulana i tamilimiou bate haniga namiou tega ona menaien a tsonun ona tema kristen nei.

⁷ Alimiou goma hiakokot nami a tabi. A markato teka e haröto nena alimiou u rus hakapa ba naiam a markato turu kristen. E niga bala nena tegi kato homi merai limiou u katuun na tegi kop uaien i tamilimiou.

⁸ Kaba e möa, alimiou pouts e hia katokato homi miou na e hia kopkop hasmiou, bate katoemiou a man markato teka turu kristen, a man hahatoulana pouts i tamilimiou.

⁹ Alimiou e atei sil hasemiou u katuun te kato homir ema tahongo ria tara Nipepeito tere Sunahan? Alimiou goma gamoemi a peisa milimiou. U katuun u tsiktsikolo na u katuun te hatsunoner u kesa na pal tson te hiasesein tsonur na touhaliou te hiasesei poutsur ema tatei tahongo has ria tara Nipepeito tere Sunahan.

¹⁰ Na u kopkop na u katuun te gono beri a peisaren a manka na u katuun te roron spakir na u katuun te tuts siler a tai ema antunan tahongo has roi tara Nipepeito tere Sunahan.

¹¹ A palai i tamilimiou i kato has uu teka i manasa. Kaba e Sunahan e galus hakapa ban a man markato a man omi i tamilimiou bate hagöagono ranou limiou. Nonei e kato hamatskö sila raia limiou tara solona e Iesu Kristo a Tsunono na turu Namnamei tere Sunahan i tarara.

Solosei memi e Sunahan u tuenrei i tamilimiou

¹² A palai i tamilimiou e pei riou, “E nigana te kato mena gilia a mamanaka.” Kaba, a palaina manka ema taguhe noi lö. “E nigana te kato mena gilia a mamanaka.” Kaba lia ema haka pute goi a peisar ta töa ta ka.

¹³ Na palair u katuun e poeier, “A kannou e ka silena u tori, na u tori e ka silena a kannou.” U mana, kaba e Sunahan e kato hataie nou romana a kannou na u tori has. A tuenriena katuun ema ka sile nei egi tsikolein. E möa. E ka silena tego solosei menaien a Tsunono, na Tsunono e ka silena tega taguhu menaien a peisarara.

¹⁴ E Sunahan e hatakei poutsi a Tsunono tara tou mate, na nonei e hatakei pouts has ranoua ra tara tou mate tara nitagala i tanen.

¹⁵ Alimiou e atei sil hase miou u tuenrei i tarara, e pala uana tere Kristo? Alimiou e ngilemiou alia go lui a töa makumun tuenrei tere Kristo bate katoe gien a töa pala turu tuenrei tara tahol a lulu tson? E möa, me möana!

¹⁶ Alimiou e atei sil hase miou, a tson te kaka gono mena a tahol a lulu tson e katoe riou u töa u tuenrei? I ranga hasiin, “A huol e katoe riou u töa puku u tuenrei.”

¹⁷ Kaba a katuun te ka gono mena a Tsunono, nori e ka hoboto ria turu töa puku u namnamei.

¹⁸ Bus ba naiam a markaton tsikolo. A palaina markato a omi te katoena a katuun e ka puku na ielesala turu tuenrei. Kaba a katuun te tsikolona e kato homiena u tuenrei i tanen pouts.

¹⁹ U tuenrei i tamilimiou a luman lotu turu Namnamei u Göagono te kana i tori milimiou, u Namnamei te halani e Sunahan. U tuenrei i tamilimiou ema ka uanei i tamilimiou. E möa. E ka uana tere Sunahan.

²⁰ Taraha, nonei e sakahis rai limiou a hihol pan. Alimiou go solosei memi e Sunahan u tuenrei i tamilimiou.