1 Korin 4 - U Bulunagana U Niga

U aposol tere Kristo

¹ Alimiou go mar tara mera milam teka, alam u katunun kui tere Kristo, ti hapepeito kap rai a man raranga tere Sunahan ti mous i manasa.

² Kaba a toukui teka e ngilena a katuun a hihipakoko na katuun te hamana uana tere Sunahan na te kukuteiena u raranga i tanen.

³ Kaba i tar, a ka a tetenei koru tego ona mei lia limiou. Alia ema hakats hapara nagi temar hakats uana a tana katuun. Na lia ema tatei ona pouts hasegi a peisar.

⁴ Alia ema hakats sabe nagi ta töa ta ka ta omi tu kati lia, kaba a ka teka ema haröto nanei tego möa menai lia ta ka ta omi. A Tsunono peisa nonei te one noulia.

⁵ Na limiou goma ona rami u katuun i mamuna a pöata tena la nama romana a Tsunono. Nonei te ona hamatsköe nou a manka te mousna turu kuhil bate hakei nouen turu ualesala, bate haröto has nanou u hakats turu katuun. Be Sunahan te hala ranoui u katuun hoboto u rangan haniga i taren.

⁶ A matsi hahatoulana, a man raranga teka te kato beregu lei lia limiou e hatei nena e Apolos na lia. Alimiou go röteiam a markato i tamulam bate kukute hasemiou u Buku u Göagono. Alimiou goma soloseiemi a töa bate omiemiou a tabi. E möa.

⁷ Esi te haka sil rai limiou go pan naiam a tabi? E Sunahan te hala railimiou a manka hoboto te ka memi limiou. Na limiou goma ranga seseimi bate peimiou, tara nitagala i tamulam peisa ba lam te ka mem a manka te ka memu lam. E möa.

⁸ Turu hakats i tamilimiou, alimiou e peimiou, “Alam u ka hakapa mei a manka tere Sunahan. Alam ema ngil lenemi taka.” Alimiou e peimiou alimiou e heremi u king tara nipepeito tere Sunahan bate mam ramou lam. Alia e ngilegu alimiou go king hamanaiam, ba lam te tatei tsunono hoboto gono mera moulimiou.

⁹ Kaba e Sunahan e haka raia lam u aposol i murimuri koru, bate heremi u katuun ti hopö kap merai tegi mate uaien. Alam e heremi a kaan hiharöto te haröto naria turu katuun na turu angelo has.

¹⁰ Alam e heremi u katuun u tutu i matara u katuun te hengo mena milam e Kristo, kaba e noahasina alimiou u katuun u atei tere Kristo. Alam ema tagalami, kaba e noahasina alimiou e tagala korumiou. U katuun e sigala rariou lam bate hapan rariou limiou.

¹¹ I romana noahas alam e besim na e maka hasim. A man hasobö i tamulam e taktakiis hakapa. Na u katuun e muku rariou lam. Na lam e hula lam bate möam ta luma.

¹² Alam e kui hatagala silem a monin kannou i tamulam. Na pöata te ranga homi ria u katuun i tamulam, ba lam te ranga haniga mia i taren. Na te kato homi ria u katuun i tamulam, ba lam tema raharahami.

¹³ Na pöata te tuts sil rarien lam, alam e ranga hatami tuun mia i taren. Kaba u katuun e kato here noahas rari lam a bita na manka te ba ner.

¹⁴ Alia ema mar koloto uagi teka tego hamatsingolo merai limiou. E möa. Alia e mar ranga uagu teka tego hatuts merai limiou, a matsomi i tar.

¹⁵ Noahasina te ka memia limiou a parpara koru a katuun te tatei hatuts rari limiou e Kristo, alimiou go hakats pouts naiam alia puku a töa i tamamilimiou. Taraha, alia u butu here ii e tamamilimiou tara pöata tu hatuts naia lia u Bulungana u Niga bate taguhu ragou limiou tego hamana uaiam limiou tere Iesu Kristo.

¹⁶ Na lia e ranga hataatagi uagu i tamilimiou, alimiou go kukuteiam a markato i tar.

¹⁷ Na lia e hala menagi e Timoti i tamilimiou, a pien tson a tsomi koru i tar te ngil korue gulia na te hamana gono menou lia tara Tsunono bate tara kap haniga nena a toukui tara Tsunono. Nonei ena hatei lel ranoui limiou a markato i tar te kukute mena gilia e Kristo, te hatuts has nagia lia turu katuun hoboto tere Kristo tara mamana han.

¹⁸ A palai i tamilimiou e hipusur bate poeier alia ema antunan na hamatskö ragi limiou.

¹⁹ Kaba alia e la hasesei uagou i tamilimiou tega ngil u a Tsunono. Ba lia tena tara peisa gou tegi ka menai u katuun u hihipus a nitagala tega popoia turu ranga i taren.

²⁰ Taraha, a mouna a Nipepeito tere Sunahan ema ka neia turu ranga, kaba e kana tara nitagala.

²¹ Alimiou e ngilemiou aha? Alia go la mema a niomi i tamilimiou tsi alia go la mema u ngil na u tori tami i tamilimiou?