1 Korin 3 - U Bulunagana U Niga

U katunun kui tere Sunahan

¹ A matsi hahatoulana, alia uma antunan ranga uai i tamilimiou temar ranga uagu lia turu katuun te kukutier u Namnamei tere Sunahan. Alia u ranga uu i tamilimiou te tatei ranga uagu lia turu katuun te ka las mer u hakatsina i puta.

² Alia u haua railimiou u ramununa tara sus, ema kannou a tiama nei. Taraha, alimiou uma antunan nou noe mi a kannou a tagala. I romana noahas alimiou ema antuna noahas mi.

³ Taraha, alimiou e ka here noahas mi u katunura i puta. Alimiou e hiomor miou na e hia o omi miou na e hiangenngena hasmiou. A markato teka e haröto nena alimiou e ka noa las mia tara markatona i puta.

⁴ Taraha, te pei a töa i tamilimiou, “Alia e kukuteiegu e Pol” na tabi e poeiena, “Alia e kukuteiegu e Apolos,” alimiou e kato here rami u katunura i puta.

⁵ Ere Apolos mere Pol, u saha u mar katuun? Alam u katunun kui tuun tere Sunahan tu hatuts railimiou tego hamana uaiam limiou i tanen. Alam a man tötöa e katoeiem a man toukui te hala railam e Sunahan.

⁶ Alia u lebi a kannou be Apolos tena haramun ranen. Kaba e Sunahan lasi a töa te katoeiena a kannou bate pusuku hanigana.

⁷ A katuun te halebana, na katuun te haramununa ema pan ri. Kaba e Sunahan lasi a töa te panina, taraha nonei te taguhena a mamanaka bate pan haniga susulur.

⁸ A katuun te halebana na katuun te haramununa e kuieier a töa puku a toukui. E Sunahan e hol ranoien a man tötöa, e antunana timar kui hapopo uaien.

⁹ Alam u katunun kui hoboto tere Sunahan. Alimiou a kui i tanen na luma has i tanen.

¹⁰ Tara nitagala tere Sunahan te haleien lia, nonei e hale ii lia a niatei tego kui mei lia a luma a niga, na lia u haka hakapi u pos simen tara luma. Kaba a taina katuun te kuienou a luma ieluna u pos simen. A man tötöa man katunun kui teka egi harare haniga koruni temar kui menaroien a luma.

¹¹ Taraha, e Sunahan e haka hakapi e Iesu Kristo, nonei puku lahas a pos simen, na e möa lel ta taina ta pos simen tegi tatei hagumeiou.

¹² U katuun e tatei kuieri u luma i taren a goul tsi a silva na u hatu u niga, na u timba na u rue ti sis tuni na uotoho.

¹³ Taraha, turu Lan Pan tere Kristo, ba toukui turu katuun hoboto te haröto naria romana turu ualesala. U tula te haröto nanou a toukui turu katuun hoboto, na u tula noahas te torohane nou a saha mar toukui ti katoi a man tötöa man katunun kui.

¹⁴ Tema kulupenoi u tula aha ti kuieia ioluna a pos simen, e Sunahan e hale noi a katuun te kuieien u hamatana i tanen.

¹⁵ Te kulupu noa a toukui teka, e Sunahan ema hale noi a katuun te kuieien u hamatana i tanen, kaba nonei e ka noahas menou a nitöatöa te ka nitöana te haleien e Sunahan. Nonei e here noi a katuun te lakasama turu tula kaba mamanaka i tanen e kulupu hakapa.

¹⁶ Alimiou e atei sil hase miou alimiou u luman lotu tere Sunahan na u Namnamei tere Sunahan e kana i tamilimiou?

¹⁷ Te kato homie noa ta töa ta katuun a luman lotu tere Sunahan, e Sunahan e kato homi hase nou a katuun teka. Taraha a luman lotu tere Sunahan e göagonona, na limiou u luman lotu i tanen.

¹⁸ Alimiou goma gamoemi a peisamiou. Te peiena a töa i tamilimiou nonei e atei koruna tara markatona i puta, nonei e tatei kato here nanei a peisanen a katuun a tutu, ba nonei te töan luena a niatei hamana.

¹⁹ Taraha, a niateina i han i puta teka e tutuna i matana e Sunahan. U Buku u Göagono e pei hasena, “E Sunahan e kato homi mera nei u katuun u atei a man niatei pouts i taren.”

²⁰ Na u Buku u Göagono e mar ranga has uana teka, “A Tsunono e atei silena u hakats turu katuun u atei, a manka pinopino.”

^21-22 Na e möa ta töa tega tatei solosei u katuun te mam mamir. Alam na mamanaka e ka hoboto uam i tamilimiou, alia e Pol na e Apolos na e Pita na han i puta teka na nitöatöa na tou mate na pöata i romana na pöata has i murimuri. A manka hoboto teka e ka uaier i tamilimiou.

²³ Na limiou e ka has uamiou tere Kristo, na e Kristo e ka has uana tere Sunahan.