1 Korin 2 - U Bulunagana U Niga

U hihatutsina te mate uu e Kristo tara kuruse

¹ Tara pöata tu lama lia i tamilimiou, a matsi hahatoulana, alia uma la memei u raranga u mola tsi u mar raranga tara katuun a atei temi habulungana naia lia u raranga tere Sunahan. E möa.

² Alia uma ngilin ranga nai ta taina ta ka kaba lia u ngilin hatagali e Iesu Kristo i gusumilimiou na saha ka te mate sileien tara kuruse.

³ Na pöata tu kaia lia i tamilimiou, alia uma tagala ii na lia u toltololo mei a nimatout.

⁴ A man raranga na man hihatuts i tar ema tagala ii tego tuke menaien a katuun. E möa. U raranga i tar e harötein a nitagala turu Namnamei tere Sunahan.

⁵ A ka teka i kato sila naia alimiou goma hamana mia tara niatei turu katuun, kaba limiou go hamana mia tara nitagala tere Sunahan.

⁶ Alia e ranga noa has megu a niatei turu katuun te atei siler a markato tere Sunahan. Kaba ema niatei uanei tara han i puta teka tsi tara pal kapanira i puta te taia riou romana. E möa.

⁷ Kaba a niatei te ranga nemu lam nonei a niatei tere Sunahan te mous i manasa. Na a niniganiga tere Sunahan e haka beraien ra i mamuna te taniaia a pöata.

⁸ U tsunono panira i puta ima atei sile ii a manka teka. Sanena nori ti atei sileien, ba nori tema antunan nila nari a Tsunono Pan i tarara tara kuruse.

⁹ U Buku u Göagono e mar ranga uana teka: “A ka ti namala tare ii u katuun na tima hengo naien na tima hakats has naien, nonei a ka te kato hahaloso berai e Sunahan u katuun ti ngileien.”

¹⁰ A mamanaka teka e Sunahan e haröto sila raien ra turu Namnamei i tanen. Taraha u Namnamei e tara sabiena a mamanaka tara mamana makum na e tara sabe hasena a mouna a manka tere Sunahan te mousuna.

¹¹ Esi i gusuna u katuun te atei silena temar hakats uana a katuun? U namnamei peisa lasi tara katuun te atei silena u hakats i tanen. Na e markato has uana iesana tere Sunahan. U Namnamei peisa has tere Sunahan te atei silena u hakats tere Sunahan.

¹² Ara ima lue ii u namnamei tara han i puta teka. E möa. Ara i lui u Namnamei te lama tere Sunahan tegi tatei atei sil menai ra a manka te hala raira e Sunahan.

¹³ Ba lam tema ranga nami u raranga tara niatei turu katuun tuun. E möa. Alam e ranga nem u raranga te hatuts railam u Namnamei tere Sunahan bate hatarare nem a manka tere Sunahan turu katuun te ka mer u Namnamei tere Sunahan.

¹⁴ A katuun tema ka menei u Namnamei tere Sunahan ema tatei lue nei a manka te hala nena u Namnamei tere Sunahan. Turu hakats tara katuun teka, a manka tere Sunahan e here nei a manka man tutu. Nonei a katuun ema antunan atei sile neien, taraha u Namnamei lasi tere Sunahan te antunan haröto nena a mouna a manka teka.

¹⁵ A katuun te ka mena u Namnamei tere Sunahan e antunan sabiena a mouna a mamanaka, kaba tana mar katuun ema antunan atei haniga sile neien.

¹⁶ U Buku u Göagono e mar ranga has uana teka: “Esi te atei silena u hakats tara Tsunono? E möa. Esi te antunan hatutse neien ta ka? E möa koru.” Kaba ara e ka mera u hakats tere Kristo.