1 Korin 16 - U Bulunagana U Niga

A monin hitaguhu turu katuun tere Sunahan

¹ Turu rarangana tara moni tegi taguhu merai u katuun tere Kristo, alimiou e markato uamou tu mar ranga merai lia u katuun tere Sunahan i Galesia.

² Turu mamana u Sandei, alimiou hoboto a man tötöa e haka halhale mou a hapalana matsi moni i tamilimiou, antunana temar lu uami limiou. Haputeiam ba limiou tema gonemi romana ta moni tara pöata tego la uu lia i tamilimiou.

³ Ba tara pöata tena tuku gia romana lia, ba lia te hala regu u katuun tena haniga ramou limiou ba nori te söater a monin hitaguhu teka, a man pas tena haröto nena nori u katunura i tarara, bate lauaier i Jerusalem.

⁴ Na tega niga uaien alia go la has, ba nori te tatei peige riou lia.

U hirari na tara tou lala tere Pol

⁵ Alia e la mam buagou i Masedonia, ba lia te töan la uagou i tamilimiou.

⁶ Alia ena ka gono toum mera goulimiou e antunana tego kapaia a pöata tara eihalata. Ba limiou te tatei taguhe moulia tego la lel uu lia tara tou lala i tar.

⁷ Alia ema ngilin tara meragi limiou ats tabubun pöata puku, alia e ngilin ka halehana gono mera goulimiou, temar ngil uana a Tsunono.

⁸ Kaba lia e ka mam goua i Epesis e antunana tara pöata turu Pentikos.

⁹ Taraha, a tamana e takalata hapan talana tego kato menai lia a toukui a niga teka, na katuun a parpara te katsin kato homier a toukui tara Tsunono.

¹⁰ A pöata te tukuna romana e Timoti hateiam, e möa ta ka tego matouteien i tamilimiou, taraha nonei e kuiena a toukui tara Tsunono te kui hasegu lia.

¹¹ E möa koru tego tor tsuga menaien ta töa i tamilimiou. Taguheiam bate hala gono memien a masalohana tara tou lala lel i tanen, ba nonei te kopis pouts uanama romana i tar. Taraha, alia e hahalose gen tega kopis pouts gono mera men a palair a man hatoulana i tarara.

¹² Na tere Apolos, alia u ranga hatagala koru meien tegana tara gono meraien limiou a palair u hatoulana. Kaba nonei ema hakatsin la noa namei. Nonei ena la nama romana tega ka meien ta pöata.

U rarangan hanhanöa

¹³ Kahete kap nitöaiam, bate tuol hakarapoto mia tara nihamana i tamilimiou. Möa tu matout iam, hatagala kakap nitöaiam.

¹⁴ Katoeiam a mamanaka bate kato memien a tui milimiou.

¹⁵ Bara a matsi hahatoulana alimiou e atei silemiou e Stepanas na pal katuun i tanen. Nori u katunura i Gris ti hamana tutuun uu tere Kristo. Turu ngil peisa i taren ba nori te taguhu koru rer u katuun tere Sunahan.

¹⁶ Alia e ranga hatagala meragou limiou go kui gono meraiam u mar katuun teka na palai hasir u katuun te kui gono mera ren.

¹⁷ Alia e sasaala koru megu ti la uama ere Stepanas mere Potunatus ne Akaikas. Taraha, nori i la tupu naiema tima la uamumei limiou teka.

¹⁸ Nori i kato hatagali a torir na torimilimiou has. Alimiou go tara marei raiam u mar katuun teka.

¹⁹ U katuun tere Kristo tara provins i Eisia e hala rari limiou u hanhaniga i taren. Ere Akuila mere Priska na u katuun tere Kristo i luma i taren e hala has rari limiou u hanhaniga u nigan töa tara solona a Tsunono.

²⁰ A man hatoulana hoboto teka e hala has rari limiou u hanhaniga. Alimiou go halemi a man tötöa i tamilimiou a nihanhaniga a göagono.

²¹ Alia e Pol te koloto peisegi a limar u hanhaniga teka.

²² Esi te rama nena a Tsunono, egi korupakö ni. O Tsunono i tamulam, lama!

²³ A nihitaguhu tara Tsunono e Iesu e tatei ka gono mera noulimiou.

²⁴ Alia e hala ragi limiou hoboto a niniganiga i tar te hamana hoboto uara ra tere Iesu Kristo. U mana. Alia e Pol