1 Korin 15 - U Bulunagana U Niga

E Kristo e takei poutsia tara tou mate

¹ Na matsi hatoulana, alia e hatakei poutsegu u hakatsina turu Bulungana u Niga tu hatei nela lia i tamilimiou. Alimiou u lu hakapeiam u Bulungana u Niga teka na limiou e tuol hakarapoto mia i tanen.

² Na e Sunahan e lu pouts sila ranoua limiou, te pile hakarapoto menami limiou u Bulungana u Niga te hatei negulia, tegoma hamana pinopino bemi limiou.

³ Na lia u hala rai limiou u raranga u kapan koru tu lu mami lia te markato uana a ka teka, e Kristo e mate sil a man markato a man omi i tarara, temar ranga uana u Buku u Göagono.

⁴ Na e Kristo i kahoein me takei poutsuna turu hatopisana u lan, temar ranga uana u Buku u Göagono.

⁵ Ba nonei e butuna tere Pita, bena butu hasna turu aposol.

⁶ Nonei e butu has ia tara man hatoulana a man parpara tara töa puku a pöata, u hihase i taren e tusaluhe banena u 500 tara katuun. A pal para turu katuun teka e tötöa noar, kaba palai i mate hakapa.

⁷ Ba nonei e butu lel na tere Jemis, na turu aposol hoboto.

⁸ Nonei e butu hamurimuri koruia i tar, e herenei alia i poseia tara pöata tegima posei lia.

⁹ Alia e ka puta koru gia turu aposol hoboton töa. Ema antunanei tegi ngö menai lia a aposol, taraha alia u kato homir u katuun tere Sunahan.

¹⁰ Kaba tara nihitaguhu tere Sunahan ba lia temar butu uagu teka, na nikalala i tanen ema la pukpuku nei. Alia e kui hatagala bala regu a palair u aposol hoboto, kaba ema lia nei. E Sunahan te ka gono menou lia.

¹¹ Ti habulungana naia lia tsi tu rarare ia lia na palair u aposol, alam u habulungana naien ba limiou te hengo miou bate hamana miou.

Ni taktakei turu katuun ti mate

¹² Tu hahatei menai lam e Kristo e takei poutsia tara tou mate, ga taraha ba palai i tamilimiou te poeier a katuun te matena ema antunan takei pouts nei?

¹³ Te möa na ta tou takei pouts tara tou mate, bara, ge Kristo egima hatakei pouts hase ii.

¹⁴ Na tegima hatakei pouts menai e Kristo tara tou mate, ba u raranga te hatei nemu lam te lala puku talana ba u nihamana i tamilimiou te moana ta nimana i tanen.

¹⁵ Sanena tega mana uu raranga te poeiena a katuun te matena ema antunan takei pouts nei, e Sunahan sane ma antunan hatakei pouts hase ii e Kristo, na lam sane gamo hasim tu pei menai lam e Sunahan e hatakei poutsi e Kristo.

¹⁶ Tema hatakei pouts rari u katuun te mater, ge hatei has nena e Kristo ima hatakei poutse ii.

¹⁷ Na tima hatakei tale ii e Kristo, a nihamana i tamilimiou e la pinopino talana ba limiou te ka noa has mia turu kato homi i tamilimiou.

¹⁸ Ba u katuun ti hamana mam ia tere Kristo, ti mate hakapa, ga i taia hakapa tala.

¹⁹ Ba tara nitöatöa puku teka tara han i puta bara te hamana uara tere Kristo, a nitiama i tarara e pan bala koru nena a nitiama turu katuun hoboto.

²⁰ Kaba u mana koru, e Kristo i hatakei poutseia tara tou mate, nonei a nitania tara tou takei pouts, e haröto nena u katuun ti mate e takei pouts has riou romana.

²¹ A markato te mate uar e butu silama tara katuun, e Adam. Na markato te takei pouts uaier tara tou mate e butu sila hasma tara katuun, e Kristo.

²² Na ti mate hoboto ia ra tere Adam ara ena töatöa hoboto has roua tere Kristo.

²³ Kaba ara a man tötöa egi hahaloso bi a pöata hamatskö i tarara. E Kristo te takei mam, ba ra te pala uaier tere Kristo te takei pouts has roua tara pöata tena la pouts namen romana.

²⁴ A kapakapana pöata e butu nou romana nonei tara pöata te hakape noa e Kristo a nikapan tara mamana tsunono hoboto na mamana nitagala hoboto, ba nonei te hala nanou a Nipepeito i tanen tere Tamanen e Sunahan.

²⁵ E Kristo e pepeitokap noahas nou e antunana te tö puta hakapa ranen u pakö hoboto i tanen.

²⁶ A tou mate, nonei a kapakapana a man pakö tega hakapeien.

²⁷ Taraha, u Buku u Göagono e poeiena, “E Sunahan e hakeia a mamanaka hoboto i mounen.” Kaba te pei nen e Sunahan e hakeia a mamanaka hoboto i mouna e Kristo, e hatara mareinena e Sunahan a töa ema ka neia i mouna e Kristo.

²⁸ Na pöata te ka hakapana romana a mamanaka hoboto i mouna e Kristo, ba nonei has a Pien Tson tere Sunahan te haka hasena romana a peisanen i mouna e Sunahan, be Sunahan te tsunono pan nanou a mamanaka hoboton töa.

²⁹ Ga ime te markato ua nen. U katuun te luer a baptais tegi taguhu meraien u katuun ti mate hakapa e lu silerien aha? Tema hatakei pouts rari u katuun ti mate, u katuun e baptais sil rari aha tara solo ren.

³⁰ E hana bara te haka nitöa raria tara niomi a para?

³¹ Alia e mate nitöagu turu mamana u lan a matsi hatoulana. U mana koru alia e sasaala korugu ba lia te rangan hangisei mera gou limiou, u hangisei te kato hasegia lia tere Iesu Kristo a Tsunono i tarara.

³² Sanena lia tu hiatatung peisa mei a nitagala i tar, gono mer u enimol u hie ra i Epesis, alia ena lui gou aha? Tema hatakei pouts raroia u katuun ti mate, “Aragi töa nou bate uara, taraha i mahö bara te matera.”

³³ Möa tu hengo koruiam. “Te hikapien gono mera moa lö u katuun te omir, ba lö tena omi hasi mou.”

³⁴ La pouts muma turu hakhakats u haniga bate hanöa ba namiou a man markato a man omi taraha a palai ema atei sil noeri e Sunahan. Alia e ranga sila gia tara nimatsingolo i tamilimiou.

U tuenrei te takei pouts noua tara tou mate

³⁵ A töa ena rangata nou, “Ime temar takei pouts uanou a katuun te mate? U sahu mar tuenrei te takei menoen?”

³⁶ Ba lia te pei gou, alö a katuun a tutu. A ka te haleba nemölö e mate buna bate töan pusuku nama.

³⁷ Na tara ka te haleba nemölö, alö ma haleba namoi u tuenrei tena butu nou, e möa, a ngal tuun, te markato uana turu koun tsi a man taina a man mar ngal has.

³⁸ Kaba e Sunahan e hale neien u tuenrei turu ngil peisa i tanen, na tara mamana a mar ngal e ka mena u tuenrei peisa i tanen.

³⁹ U tuenrei ema markato uanei iesana, e kamena u töa u mar tuenrei tara katuun na u töa u mar tuenrei turu enimol na u tana u mar tuenrei turu apena na u tabi turu iena.

⁴⁰ E kamena u tuenreina i kolö na u tuenreina i puta, na nitaratara turu tuenreina i kolö a töa ka, na nitaratara turu tuenreina i puta a taina ka.

⁴¹ A pitala e ka mena u ualesala peisa i tanen, na tsihou e ka has mena u ualesala peisa i tanen, na pitopito has e ka mena u ualesala peisa i tanen. Na u ualesala tara man tötöa a man pitopito e halhal hasina.

⁴² Na e kato has uana iesana tara pöata te takei pouts roua u katuun. U tuenrei te kaho ner e tia nou romana. Kaba u tuenrei te hatakei poutseier ema tatei tia noi.

⁴³ Tara pöata te kaho naria u tuenrei tara katuun, nonei ema tagala nei nema tara haniga nei. Kaba u tuenrei te hatakei poutse riou e tagala koruna na e tara hanigan töa nou.

⁴⁴ U tuenrei tuun te kaho ner, kaba u tuenrei u tsimus te hatakeier romana. Te kana u tuenreina turu tsiktsiki, u tuenrei na turu namnamei e ka hasina.

⁴⁵ I mar koloto menai teka turu Buku u Göagono, “A Adam tutuun, e butu mema u namnamei u töatöa.” Na Adam te butu hamururima, e Kristo, e butu mema u namnamei te hala nena a nitöatöa.

⁴⁶ Ema tuenrei nei turu namnamei te butu mamima, kaba u tuenreina turu tsiktsiki te butu mamima, be murinen ba u tuenreina turu namnamei.

⁴⁷ A Adam tutuun i katoe ii u tsiktsikina i puta. Kaba a hahuoluna Adam, e Kristo, nonei a Tsunonona i Kolö.

⁴⁸ U katunura i puta te hereri nonei a katuun te katoe ii e Sunahan u tsiktsiki. Na u katunura i Kolö te hereri nonei a katuun te lama i Kolö.

⁴⁹ Ti mar posa has meraira, ara e herei e Adam, a katununa turu tsiktsiki, na ara e here haserei romana e Kristo, a katununa i Kolö.

⁵⁰ Alia emar ranga uagu teka a matsi hatoulana: u tuenreina turu tsiktsiki ema tatei la uanei tara Nipepeito tere Sunahan na u tuenrei te tia nou ema tatei la uanei tara han turu tuenrei te ma tatei tia nei.

⁵¹ Hengoiam! Alia e hatei ragi limiou aman raranga te mous: ara ema mate hoboto roi, kaba ra hoboto e palisira romana.

⁵² Ara e palis boroboro tuun here rei romana te mitskaloho uana u mata, tara pöata te pihun nönöana romana a tuhil. Aa, a tuhil e lingina romana, ba u katuun ti mate te lu berari u tuenrei tema tatei tia nei i kolö na ra has u katuun tema mate noa rei e palis has riou nonei tara pöata.

⁵³ Taraha, u tuenrei teka te mate nou ega palis uu turu tuenrei tema tatei mate nei romana. U tuenrei teka te koreme nou ega palis uu romana turu tuenrei tema tatei koreme nei.

⁵⁴ Pöata te palisna romana u tuenrei i tarara te tatei matena, ba u raranga ti kolotein turu Buku u Göagono te butu hamanana: “A tou mate e kapa. E Sunahan e tagala saluhe hakapa.”

⁵⁵ “Ime te kana a nitagala tara tou mate? Ime te kana a nikamits tara tou mate?”

⁵⁶ A nikamits tara tou mate, a markato a omi, na markato a omi e luena a nitagala i tanen tara Lo tere Mosis.

⁵⁷ Kaba ragi haniga uu tere Sunahan te hala ranei ra a nitagala tere Iesu Kristo a Tsunono i tarara tegi tagala saluhe uu ra.

⁵⁸ E markato uana teka a matsomi koru i tar, tuol hakarapotoiam, bate tagala miou, möa tu hasula ba naiam e Sunahan. Kui hatagala nitöa mia tara Tsunono, taraha alimiou e atei silemiou a toukui te katoe mia limiou tara Tsunono ema lala puku noi.