1 Korin 14 - U Bulunagana U Niga

A niatei na turu rangan propet na tara man ranga.

¹ Alimiou go tagala sileiam a markato te ngil menari a tabi, na te ngil has menari a nitagala turu Namnamei u Göagono, na limiou go ngil hatagala korueiam a nitagala tego habulungana mena milimiou u raranga hamatskö tere Sunahan te ngöeri u rangan propet.

² A katuun te ranga na turu tana u mar ranga ema ranga uanei turu katuun, taraha e möa ta katuun tega atei sileien. Nonei e ranga uana tere Sunahan bate katoena u rarangana tara nitagala turu Namnamei u Göagono.

³ Kaba a katuun te ranga nena u raranga u hamatskö tere Sunahan e ranga uana turu katuun, ba nori te atei sile ren. Ba nonei te hatagala ranen bate hatami ranen ba te taguhu sil raneien tegi hamana haniga uaien.

⁴ A katuun te rangana turu tana u mar ranga halhal e taguhena a peisanen, kaba a katuun te rangana turu ranga hamatskö tere Sunahan e taguhu rena u katuun tere Sunahan.

⁵ Alia e ngilegu alimiou hoboto go ka meiam a nitagala tego ranga mena milimiou u tana u mar ranga. Kaba lia e ngil koruegu alimiou hoboto go ka meiam a nitagala tego ranga mena milimiou u raranga hamatskö tere Sunahan. Taraha, a katuun te ranga nena u raranga tere Sunahan e taguhu rena u katuun hoboto turu lotu. Nonei e niga bala nena a katuun te ranga na turu tana u mar ranga. Tego kaia ta katuun tega antunan palisin u tana u mar ranga teka ba u lotu te pan susuluna.

⁶ A matsi hatoulana, tena ranga goua lia turu tana u mar ranga, ime temar taguhu mera noien limiou. Kaba te hatei ragoua lia limiou a ka te hatarei lia e Sunahan, tsi te hatei ragoua lia limiou a töa niatei na u töa u raranga u kapan na u töa u hihatuts, ba lia te antunan taguhu ragou limiou.

⁷ Te markato has uanen tara manka tema tötöa nei, a kohi tsi a gita, tema ling hamatskö rien, ba ime temar atei sil mena roi u köma te pileier? E möa tala.

⁸ Na te ling hatutuna a tuhil, ba ime temar atei sil mena roi u soldia a pöatan hiatatung hamanasa? E möa tala.

⁹ Na e kato has uana iesana i tamilimiou. Te ranga namia limiou u tana u mar ranga te tutu ner u katuun, ga ime temar atei sil mena roien a ka te ranga nami limiou? E möa. Taraha, u ranga i tamilimiou a lomolomo pinopino.

¹⁰ E kamena u mamana u mar ranga u parpara i puta, na nori hoboto e ka mer te mar mouna uaren.

¹¹ Na tema atei sile goi lia temar mouna uana u ranga tara töa katuun, nonei e here noi a katuun halhal i matar, na lia e here hasegoi a katuun halhal i matanen.

¹² Alimiou e ngil koruemiou tego lu mena milimiou a man nitagala turu Namnamei u Göagono. Na limiou go torohana hatagala sileiam a man nitagala te taguhu rena u katuun tere Sunahan.

¹³ A katuun te rangana turu tana u mar ranga e tatei singo silena a nitagala tego hatarare menaien u ranga i tanen.

¹⁴ Taraha, te singo gia lia turu tana u mar ranga, u namnamei i tar te singona, kaba u hakats i tar ema atei nei.

¹⁵ Gaha te kato tale gou lia? Alia e singo gia turu namnamei i tar, na lia e singo has gia turu hakats i tar. Alia e köma gia turu namnamei i tar, na lia e köma has gia turu hakats i tar.

¹⁶ Taraha te singo moalö tere Sunahan turu namnamei i tamölö, a tana katuun halhal koru ema tatei poa noi “U mana” turu hanhaniga i tamölö. Taraha, nonei ema atei sile nei aha te ranga nemölö.

¹⁷ Noahasina te singo haniga koru uamölö tere Sunahan kaba a niniganiga i tamölö ema taguhe nei a taina katuun.

¹⁸ Alia e haniga uagu tere Sunahan taraha, alia e atein ranga bala koru ragou limiou hoboton töa tara palaina man ranga.

¹⁹ Kaba i luman lotu, alia ema antunan ranga hapara koru gia turu tana u mar ranga, e niga balana tego ranga menai lia a tsi tabubun raranga te tatei hatuts ragi lia u katuun bate lueier a ka te ranga negulia.

²⁰ A matsi hatoulana, möa tu hakats here mi a pien. Kato here rami a galapien u tetenei te tutu ba ner a markato a omi. Kaba tara man palaina manka, mar hakats uaiam te hakats uana a katuun pan.

²¹ I mar koloto menai teka turu Buku u Göagono: “A Tsunono e poeiena, ‘Alia e ranga mera gou u katuun i tar bate ranga sila goua turu katuun halhal na turu ranga halhal, kaba u katuun i tar ema hengo noa hase roi lia.’”

²² Te ranga menari u tana u mar ranga ema hiharöto uanei turu katuun te hamanar kaba u hiharöto turu katuun tema hamana ri. Na nitagala te ranga menari u raranga hamatskö tere Sunahan ema ka sil hase nei u katuun tema hamanari. Kaba e ka silena u katuun te hamanar.

²³ Na te gono hoboto ria u katuun bate ranga hoboto ria turu tana u mar ranga, ba katuun tema hamananei te hengona, nonei e ranga nou bate poeiena alimiou e tutu korumiou.

²⁴ Kaba te ranga hoboto mia limiou turu rangan propet, ba katuun halhal tsi a katuun te hahamanana te tasuna bate hengo ranou limiou, u ranga i tamilimiou e saka korue noien bate haröte noien a man markato a man omi i tanen.

²⁵ Te halakase noa a katuun tema hamananei a man hakats a man omi te hamouse nen, ba nonei te hatukununa bate hatsunono uana tere Sunahan ba nonei te poeiena, “E Sunahan e ka hamanana i gusumilimiou teka!”

A maroro turu lotu

²⁶ Aha tala tego katoeiam limiou a matsi hahatoulana? A pöata te la gögono hoboto mia limiou, a man tötöa i tamilimiou e ka memiou a man toukui. A töa e kamena u köma, na tabi e hihatutsuna, na tai e haröto nena a ka a mana, na tai e ranga nena u tana u mar ranga, na tai e palise nen. A mamanaka teka ego hatakei hatagala memilimiou u lotu.

²⁷ Te ngilin ranga naria a palai i tamilimiou u tana u mar ranga, ega ka puku has mei a töa tsi a huol a katuun, kaba ega ma la banai a topisa na nori gima ranga mei a töa pöata. A töa ga ranga ba tai te palisena u ranga.

²⁸ Kaba te moana ta katuun tega antunan palisi u ranga, ba u katuun teka tema tatei ranga ria i luman lotu. Nori gi ranga pouts las ia i peisaren na tere Sunahan.

²⁹ A huol tsi a topisa propet e tatei ranga ner u ranga hamatskö tere Sunahan, ba palai te tatei hula habirits ner a man ranga i taren.

³⁰ Te haröto nanoua e Sunahan a töa ka tara tana katuun te kana turu hagum, ba katuun te rangana te tatei hanöana.

³¹ Alimiou hoboto e tatei ranga namiou u raranga hamatskö tere Sunahan, kaba a töa e ranga mamina ba tai te ranga lenina ba limiou te tatei lu hobotemiou a niatei na nitagala.

³² A katuun te ka mena a nitagala tego ranga menaien u raranga hamatskö tere Sunahan e ka has mena a nitagala tego hanöa menaien u ranga turu ngil i tanen.

³³ Taraha, e Sunahan ema Sunahan uanei tara nitutu. E möa, nonei e Sunahan tara nigumgum a niga.

³⁴ A touhaliou egi kakamotoia turu hagum turu lotu batema ranga ri. Nori egi ka putaia tara pal tson, te ranga uana u Buku u Göagono. Te markato hoboto uaier tara man lotu hoboto tere Sunahan.

³⁵ Te ngilin atei sile rien ta ka, nori ena tatei rangata raria a pal tson i taren i han. E ma niga nei te ranga uana a tahol turu hagum turu lotu.

³⁶ U raranga tere Sunahan e butu mam ia i tamilimiou? Tsi e la peisa uama i tamilimiou?

³⁷ Esi te poeiena nonei e ka mena a nitagala tego ranga menaien u raranga hamatskö tere Sunahan tsi e ka mena a nitagala turu Namnamei u Göagono, nonei e tatei atei silena a manka te koloto mena gilia i tamilimiou e Sunahan e ranga mam naien i tar.

³⁸ Esi tema tara marei nei u raranga teka egima tara marei hase ii.

³⁹ A matsi hatoulana, ngil hatagala korueiam a nitagala tego ranga mena milimiou u raranga hamatskö tere Sunahan, na e möa tu hapiou naim tegi ranga menai u tana u mar ranga.

⁴⁰ Kaba tara mamanaka hoboto te katoe milimiou, alimiou go kato haniga korue men bate matsköna.