1 Korin 12 - U Bulunagana U Niga

A manka te hala nena u Namnamei u Göagono

¹ A matsi hahatoulana, alia e ngilegu alimiou go atei sileiam a man nitagala te hala nena u Namnamei u Göagono turu katuun.

² Alimiou e atei silemiou a pöata tu tematan noa mia limiou, alimiou u kukuteiam a markato ti hatsunono menai u kesa tema töatöa nei.

³ Na lia e hatei ragi limiou, a katuun te ranga sila na turu Namnamei u Göagono tere Sunahan ema antunan ranga nanei, “Iesu egi korupaköni.” Na katuun tema kamenei u Namnamei u Göagono tere Sunahan ema antunan pei hase nei, “Iesu a Tsunono.”

⁴ E kamena mamana mar nitagala, kaba u töa puku u Namnamei te hala ranen.

^5-6 Na e ka has mena a mamana mar toukui kaba nonei noahas e Sunahan te kato hatakeiena a man toukui teka turu katuun hoboto i tanen

⁷ E Sunahan e hala ranei ra u Namnamei u Göagono i tanen bara te taguhu raiera u katuun hoboto.

⁸ A töa e haleri a nitagala tego ranga meien u hakats u niga, na tabi e haleri a nitagala tego habulungana menaien a niatei a niga.

⁹ Nonei noahas u Namnamei teka te halenei a tana katuun a nitagalana turu nihamana, na tabi e hala haseri a nitagalana tego kato haniga pouts menaien a katuun te ka mena a siki.

¹⁰ Tara tai, e haleri a nitagala tego kato menaien a man mirakol, na tai e haleri a nitagala tego ranga menaien u rangan propet, na tai e hala haseri a nitagala tego ona menaien u spirit u niga na u spirit u omi. U Namnamei tere Sunahan e hala hasenei a tana katuun a nitagala tego ranga menaien u tana u mar ranga ba tai te haleri a nitagala tego hatarare menaien ime temar mouna uana u raranga teka.

¹¹ A mamanaka teka, u töa puku u Namnamei te katoenen. Nonei e halana tara man tötöa man katuun hoboto turu ngil peisa i tanen.

A katuun a para turu töa u tuenrei

¹² Na u tuenrei e ka has mena a mamana makum, na mamana makum turu tuenrei e noahasina te para uaren, nori hoboto u töa puku u tuenrei. Te kato has uana e Kristo.

¹³ Na u töa u Namnamei ti habaptais iara hakapan töa me katoeiera u töa u tuenrei. U Jiu, na u Grik, na u katunun kukui puku, na u katuun tema kukui puku has ri. Ara hoboto i haua raia turu töa u Namnamei tere Sunahan.

¹⁴ U tuenrei ema töa puku nei a makum. E möa. E ka mena a makum a parpara.

¹⁵ Tego poeia u mou, “Tema ualima gia lia, alia ema pala has uagi turu tuenrei,” u mou e pala noahas uana turu tuenrei.

¹⁶ Na tego poeia u talinga, “Alia ema matagi na lia tema pala has uagi turu tuenrei,” u talinga e ka noahas uana turu tuenrei.

¹⁷ Sanena u tuenrei hoboto ega mata peisa, esi tena hengo nou? Na sanena u tuenrei hoboto tega talinga peisa, esi tena soka nou?

¹⁸ Kaba u tuenrei ena markato uanei teka, e Sunahan e hakeia a mamana makum turu tuenrei turu ngil peisa i tanen.

¹⁹ Sanena tego ka meien a töa puku a makum, ga ime tala te kana u tuenrei?

²⁰ Kaba e möa. U tuenrei e ka mena a makum a parpara, kaba u töa puku noalahas u tuenrei.

²¹ U mata ema antunan pei nei turu ualima, “Alia ema ngile gi lö.” Na u baku ema antunan pei nei turu mou, “Alia ema ngile gi lö.”

²² E möa. A man makum turu tuenrei tema tagala bala nei e ka noahas mer a toukui pan i taren.

²³ Na man makum turu tuenrei te pei rara ema niga koru nei, ara e hakopo rarien u hasobö. Na man makum turu tuenrei te hamouse rara, ara e tara kap haniga koru raren.

²⁴ Kaba ara ema mar hakats uarei teka tara man makum turu tuenrei te taratara hanigana. E Sunahan e markato menai u tuenrei tarara teka, ba ra te tarakap haniga nera a man makum te here nei ema niga koru nei.

²⁵ Ba man makum turu tuenrei tema tatei hia tsugtsuga ri, kaba nori gi hia taratara kap haniga nitöani a peisa ren.

²⁶ Te kamits na a töa makum turu tuenrei, a man makum turu tuenrei hoboto e kamits gono has meren. Na te hapane ria a töa makum, a makum hoboto turu tuenrei e sasaala gono has meren.

²⁷ Alimiou tala u tuenrei tere Kristo, na man tötöa i tamilimou a man makum turu tuenrei i tanen.

²⁸ Na e Sunahan e halani a mamana mar toukui tara man tötöa tara hun katuun i tanen. Tara makum tutuun nonei e hatuolir u aposol, na tara hahuoluna a makum nonei e hatuolir u propet, na tara a hatopisana makum nonei e hatuolir u tson hihatuts, na pala te antunan katoner u mirakol, na u katuun te antunan kato haniga pouts raier u katuun, na u katuun te taguhu raier a palai, na niatei na tara toukui na tara tson mammam, na tai te antunan ranga nena u mamana u mar ranga.

²⁹ Ga nori hoboto u aposol? Tsi nori hoboto u propet? Tsi nori hoboto u tson hihatuts, tsi u katuun te katoeier a man mirakol?

³⁰ Ga nori hoboto e antunan kato haniga pouts raier u katuun? Tsi e antunan ranga ria turu mamana u mar ranga? Tsi e atein hatarare hoboto ner temar mouna uana u ranga? E möa, nori e ka mer a man tötöa a man toukui taren.

³¹ Kaba limiou go tagalaiam bate hasoso sile miou a man nitagala te niga balana. Na lia e haröto tala ragoui limiou a maroro te niga bala koruna.