1 Korin 11 - U Bulunagana U Niga

¹ Alimiou go kukute mumou lia temar kukute has mena gilia e Kristo.

U kopo turu baku tara pöata turu lotu

² Alia e haniga ragou limiou, taraha alimiou e hakats kap namou lia tara mamanaka na limiou e kukutemiou u hihatuts hoboto tu hala railia limiou.

³ Kaba alia e ngilegu alimiou go atei sileiam a tson e pan nena a tahol i tanen, na e Kristo e pan rena a pal tson, na e Sunahan e pan nena e Kristo.

⁴ A tson te singona na te habulungana nena u raranga tere Sunahan bate ka mena u kopo i bakunen, a tson teka ema hatsunone nei e Kristo.

⁵ Na te singona a tahol tsi te habulungana nanen u raranga tere Sunahan batema kope nei a bakunen, a tahol teka ema hatsunone nei a tson i tanen. Nonei e markato uana tara tahol te kobana hakapa ban u hulu hoboto i bakunen.

⁶ Kaba tema kope neia a tahol a bakunen, ba nonei te tatei kobana ba nena u hulu hoboto i bakunen. Te omi nen tego kobana ba menaien u hulu hoboto i bakunen, tsi te omi nen tega kots hamakmakum menaien u hulu, nonei e tatei kopena a bakunen.

⁷ A tson ema tatei kope nei a bakunen tara pöata turu lotu, taraha a tson u hiharöto tara nikapan tere Sunahan. Na tahol u hiharöto tara nikapan tara tson.

⁸ Taraha, a tson ema butu meia turu tuenrei tara tahol. E möa. A tahol te butu ma turu tuenrei tara tson.

⁹ A tson ima habutu sile ii a tahol. E möa. A tahol ti habutu sile ii a tson.

¹⁰ Na tahol ega kopi a bakunen tara pöata turu lotu bate haröto nena nonei e ka putana tara tson i tanen, taraha, u angelo e tara hase ren.

¹¹ Kaba tara Tsunono, a tahol e sola na tara tson, na tson e sola hasna tara tahol.

¹² Taraha, a tahol i habutema turu tuenrei tara tson, na i romana a tson e butu nama turu tuenrei tara tahol. Kaba e Sunahan noahas te habutena a mamanaka.

¹³ Alimiou peisa tego tare men. E nigana tego singo uu a tahol tere Sunahan batema kope nei a bakunen?

¹⁴ A markato i tarara i puta e haröto nena, ema niga nei i matar u katuun te ka menanei a tson u hulu pan.

¹⁵ Kaba e nigana i matar u katuun te ka menanei a tahol u hulu pan. E Sunahan e hale ien u hulu pan tega kopo kapiin a bakunen.

¹⁶ Te hipus nanoua ta töa ta katuun a markato teka, alia e hatei ragou limiou alam na man hun katuun has tere Kristo alam i möa ta taina ta markato tara pöata te lotu mia lam.

A Komunio

¹⁷ Na turu rangan hatarare teka, alia ema haniga ragi limiou, taraha te hagum hoboto mia limiou, a markato a niga ema butu nei, a markato a omi te butuna.

¹⁸ Alia u hengoin u raranga te poeiena: tara pöata te hagum hoboto mia limiou, ba limiou te kats kilkil namiou temar hun katuun uami limiou, na lia e hamana hats tabubegu u ranga teka.

¹⁹ Alia e atei silegu ega kamei u kats kilkil i gusumilimiou, ba ra te atei sileriou esi i gusumilimiou te kukutena a markato te ngilena e Sunahan.

²⁰ Kaba pöata te hagum hoboto mia limiou, alimiou ema lu hamanemi a Komunio. E möa.

²¹ Taraha, tara pöatan nou, a man tötöa i tamilimiou e lueier a mats kannou peisa i taren bate nour, ba palai te besir, ba palai te ua hatutur.

²² Alimiou e ka memiou u luma. E hana ba limiou tema nou mia turu luma i tamilimiou? Alimiou e sigale miou a hun katuun tere Sunahan, bate hamatsingolo ramiou u katuun te kaka pukur. Alia go mar ranga uu ime i tamilimiou? Alia go haniga raiou limiou tara markato teka? E möa koru!

^23-24 U hihatuts te hale ii lia a Tsunono, te hala has ragilia alimiou. I mamina tega mateia e Iesu a Tsunono, nonei noahas tara bong ti hala naien turu pakö, banonei e lueiena a beret me haniga uana tere Sunahan, ba nonei e pose nen me poeiena, “Nonei u tuenrei i tar teka tena mate sil ranou limiou. Alimiou ena kato has uamou teka bate hakats pouts namou lia.”

²⁵ Na te markato has menaien a uain i murina ti nou hakapaien, be Iesu e lueiena a kap me poeiena, “A kap uain teka e haharuei nena u rangan kits u tsimus tena kato hatagale goi lia u rahatsing i tar. Alimiou ena kato has uamou teka bate hakats pouts namou lia.”

²⁶ Na tara mamana pöata te noue mia limiou a beret teka na te ua mia limiou tara kap teka, ba limiou tena haröto namiou a tou mate tara Tsunono, e antunana tena la pouts namen romana.

²⁷ Esi te nou pinopinoe nou a beret na te ua pinopino has noua tara kap tara Tsunono, nonei e kato homiena u tuenrei na u rahatsing tara Tsunono.

²⁸ Hamatskö mameiam a peisa milimiou bate töan noue miou a beret bate töan ua hasmia tara kap.

²⁹ Taraha, esi te nou pinopinoena a beret na te ua pinopinona tara kap batema hakats na nei ime temar mouana uana u tuenrei tara Tsunono, e las be hase nei a peisanen a raharaha tere Sunahan.

³⁰ Nonei a ka te pinolasa sila ria a palai i tamilimiou, ba palai te mate hakapar.

³¹ Kaba tegi hamatskö haniga mam menaira a peisarara, bara tema tatei hamatskö raroui.

³² Kaba te hamatskö rena ra a Tsunono, nonei e hahuna sil raneira ara gima tatei hahuna gono merai u katunura i puta.

³³ Na ma tsi toular, tara pöata te gono sile mia limiou a kannou tara Komunio, ba limiou te hahalosemiou a tabi.

³⁴ Te bes koruna a töa katuun, nonei e tatei nou mam nama i luma i tanen. Nonei ena mots nou mamna turu hagum ba limiou te lue mou a nihahuna tere Sunahan. A man tana man harangata ena hamatskö mote goulia tara pöata tena la romana guma lia i tamilimiou.